ކުރީ ސަރުކާރުތަކަށް އެއަރ އެމްބިއުލަންސްގެ ޚިދުމަތް ނުފެށި އޮތީ އެފަދަ ތަސައްވުރެއް ނެތުމުން: ޑރ.ޚަލީލް

މީގެ ކުރިން އައި ސަރުކާރުތަކަށް ރާއްޖޭގައި އެއަރ އެމްބިއުލަންސްގެ ޚިދުމަތް ނުފެށި އޮތީ އެފަދަ ތަސައްވުރެއް ނެތުމުން ކަމަށް ސިއްހަތާއި ބެހޭ ވަޒީރު ޑރ.އަބްދުالله ޚަލީލް ވިދާޅުވެއްޖެއެވެ.

ވަޒީރު ޚަލީލް މިފަދައިން ވިދާޅުވެފައިމިވަނީ މިއަދު ރައީސް ޑރ.މުއިއްޒު ރ.އަލިފުށީ ރައްޔިތުންނާ ބައްދަލުކުރެއްވުމަށް އެރަށުގައި ބޭއްވެވި ރަސްމިއްޔާތުގައި ބައިވެރިވެވަޑައިގެން ވާހަކަފުޅުދައްކަވަމުންނެވެ. އެއަރ އެމްބިއުލަންސްގެ ޚިދުމަތް ފެށިގެން ދިޔުމަކީ ބޮޑު ކާމިޔާބީއެއް ކަން ފާހަގަކުރައްވަމުން ވަޒީރު ވިދާޅުވީ، މިކަން ހާސިލްކުރެވިގެން މި ދިޔައީ ރައީސް ޑރ.މުއިއްޒުގެ ތަސައްވުރުގެ މޮޅުކަމުން ކަމަށެވެ.

ވަޒީރު ޚަލީލް ވިދާޅުވީ، މީގެ ކުރިންވެސް މި ޚިދުމަތް ގާއިމު ކުރެވޭނެ ވަސީލަތްތައް ހުރި ކަމަށާއި މިކަމަށް އެހާ ބޮޑު ހޭދަ އެއް ކުރަން ނުޖެހޭ ކަމަށެވެ. ރައީސް ޑރ.މުއިއްޒު އަށް އެންމެ މުހިންމުކަމަކީ ރައްޔިތުންނަށް ރަނގަޅު ޞިއްޙީ ޚިދުމަތްތަކެއް ފޯރުކޮށްދީ، ދިވެހި ރައްޔިތުންގެ ފުރާނަ ސަމާލަތްކޮށް ދެއްވުން ކަމަށްވެސް ވަޒީރު ޚަލީލް ވަނީ ވިދާޅުވެފައެވެ.

ކުރިއަށް އޮތް ތަނުގައި އެއަރ އެމްބިއުލަންސްގެ ޚިދުމަތް އިތުރަށް ތަރައްޤީކުރެއްވުމަށް ރައީސް ޑރ.މުއިއްޒު ނިންމަވާފައިވާކަމަށް ވިދާޅުވެ ވަޒީރު ޚަލީލް ވަނީ މިއީ "ރޮކެޓް ސައިންސް" ނޫން ކަމަށާއި، ވިސްނުންތެރި ވެރިއެއް ވަޑައިގެންފި ނަމަ ވަރަށް ސާދާކޮށް، ވިސްނުން ގެންގުޅެގެންވެސް މިއީ ކުރެވިދާނެ ކަމެއް ކަމަށް ވެސް ވިދާޅުވެފައެވެ.

"އެހެންވީމަ އަޅުގަނޑުމެންނަށް އެނގޭ ވިސްނުންތެރި ވެރިއެއް ވަޑައިގެންފީއާ، މިއިން ކޮންމެ ކަމަކީ ރޮކެޓު ސައިންސެއް ނޫންކަން، ވަރަށް ސާދާކޮށް، އާދައިގެކޮށް ވިސްނުން ގެންގުޅެގެންވެސް މިއީ ކުރެވިދާނެ ކަމެއް ކަން،"

ވަޒީރު ޚަލީލް ވިދާޅުވިއެވެ.

މީގެ އިތުރުންވެސް ރައީސް ޑރ.މުއިއްޒު ތަރައްގީގެ މަޝްރޫއުތައް ރާއްޖޭގެ އެކި ހިސާބުތަކުގައި ކުރިއަށްގެންދިޔުމަށް ގެންގުޅުއްވާ ސިޔާސަތަށް އަލިއަޅުއްވާލައްވާ ވަޒީރު ޚަލީލް ވިދާޅުވީ، ބާރު ދުވެލީގައި މިފަދަ މަޝްރޫޢުތައް ކުރިއަށްގެންދިޔުމަށް ރައީސް ޑރ.މުއިއްޒު ބޭނުންފުޅުވާކަމަށް ވިދާޅުވެފައެވެ. އެމަނިކުފާނުގެ މަސައްކަތްޕުޅު ރާއްވަވާފައި ހުންނަގޮތުން ވަޒީރުންނަށްވެސް އެ ސްޕީޑުގައި ދާން އުނދަގޫވާ ކަމަށާއި ރައީސް ޑރ.މުއިއްޒު ބޭނުންފުޅުވަނީ އެމަނިކުފާނުގެ ސްޕީޑްގައި ކަންކަން ކުރުމަށް ކަމަށް ވެސް ވަޒީރު ޚަލީލް ވަނީ ވިދާޅުވެފައެވެ.