ބިން ހިއްކަން ގޮވާލާ ދޮންފަނު ރައްޔިތުން މުޒާހަރާއަށް ކަނޑުމައްޗަށް
ލިޔުންތެރިޔާ
އަހުމަދު ހަމީދު އާދަމް
ސަރުކާރުން ދޮންފަނުގެ ބިން ހިއްކުން ކުރިއަށް ނުގެންދިއުމަށް ނިންމި ނިންމުން ބަދަލުކުރުމަށް ގޮވާލާ ދޮންފަނު ކައުންސިލުން އެރަށުގެ ފަރު ސަރަހައްދުގައި މުޒާހަރާކުރަން ނިންމި ނިންމުމާއި އެއްގޮތަށް ރައްޔިތުން ނިކުމެ މުޒާހަރާ ކޮށްފި އެވެ.
އެރަށު ފަރު ސަރަހައްދުގައި މުޒާހަރާ ކުރި މީހުން ތިބީ ދޯނިތަކުގައި އެކި ޝުއޫރުތައް ލިޔެފައިވާ ބޯޑްތައް ހިފައިގެންންނެވެ. އެ މީހުން ވަނީ ދޮންފަނު ބިންހިއްކުމަށްޓަކައި އެމްޓީސީސީއާ ހަވާލުކުރެވިފައިވާ ޕްރޮޖެކްޓުން ބިންހިއްކުމުގެބައި އުނިކޮށް ބިން ނުހިއްކާގޮތަށް ސަރުކާރުން ހަމަޖެއްސުމާއި ގުޅިގެން އެކަމާއި ދެކޮޅަށް އަޑުއުފުލާފަ އެވެ.
ދޮންފަނު ކައުންސިލުން ބުނީ ސިލްސިލާ މި މުޒާހަރާތައް ކުރިއަށްދާނީ، ދޮންފަނުގެ ފަރުންފެށިގެން 700 މީޓަރު ސަރަހައްދުގައި ކަނޑުމަތީގައި ކަމަށެވެ.
މުޒާހަރާ ކުރިއަށްދާއިރު، ސަރަހައްދުގައި ފީނުމާއި ޑައިވްކުރުމަކީ ރައްކާތެރިކަމެއް ނުވާތީވެ، އިއްޔެ ފެށިގެން ދޮންފަނު ފަރުން ފެށިގެން 700 މީޓަރު ސަރަހައްދުގައި އެއްވެސްފަރާތަކުން ފީނުމާއި އަދި ޑައިވުކުރުމަކީ މަނާކަމެއް ކަމަށާ އެންގުމާ ހިލާފުވާ ފަރާތްތަކާމެދު ފިޔަވަޅު އެޅުމަށް ކަމާބެހޭ އިދާރާތަކަށް އަންގަމުންދާނެ ކަމަށެވެ.
ނަމަވެސް އެލްޖީއޭ އިން ރޭ ވަނީ އެ ނިންމުން ބާތިލުކުރަން އަންގާފަ އެވެ. އެއީ ކައުންސިލަށް އެންގޭނެ އެންގުމެއް ނޫން ކަމަށްވެސް ބުނެފައިވެ އެވެ.
މިދިޔަ އަންގާރަ ދުވަހު ރައީސުލްޖުމްހޫރިއްޔާ ޑރ.މުހައްމަދު މުއިއްޒު ވަނީ، ބ. ދޮންފަނުގެ ބިން ހިއްކުން ކުރިޔަށް ނުގެންދިއުމަށް ނިންމަވާފައިވާކަން އިއުލާނު ކުރައްވާފަ އެެވެ. އެ ނިންމެވުން ނިންމެވީ ވަރަށް ގިނަ ބަޔަކު އެ ނިންމުން ބަދަލުކުރަން ގޮވާލަމުންދާތީ އެވެ.
ދޮންފަނު ބިން ހިއްކަން ނިންމުމާއި ގުޅިގެން އެ ރަށާއި ކިލޯމީޓަރެއްހާ ކައިރީގައި އޮންނަ ހަނިފަރަށް ދޮންފަނު ހިއްކުމުން އަސަރުކުރާނެ ކަމަށް ބުނެ ވަރަށް ގިނަ ބަޔަކު ވަނީ ކަންބޮޑުވުން ފާޅުކޮށްފަ އެވެ. އެތަނަކީ ބައޮސްފެއާ ރިޒާވްއަކަށް ވާއިރު، އެތަނަކީ މުޅި ދުނިޔެއިން ވެސް ވަރަށް މަދުން ފެންނަ ފަދަ މަންޒަރުތައް ފެންނަ ސަރަހައްދެކެވެ. 539 ހެކްޓަރުގެ ބޮޑު ސަރަހައްދަކީ ފެހުރިއްސާއި އެންމަޑި ފަދަ ތަކެތި ކާނާ ހޯދުމަށް ޖަމާވާ ތަނެކެވެ.
މި ލިޔުން ކަމުދިޔަނަމަ، ލައިކެއް ދެއްވާ
ކޮމެންޓް ކުރޭ
ކޮމެންޓްސް
މިހާތަނަށް ކޮމެންޓެއް ނެތް
