ވައުދުފުޅާއި އެއްގޮތަށް، މާވަރުލު އެއާޕޯޓާއި ގައްދޫއާ އެއްގަމުން ގުޅުވައިދެއްވާނެކަމަށް ރައީސް ޑރ.މުއިއްޒު ވިދާޅުވެއްޖެ

ރިޔާސީ އިންތިހާބު ގެ ކެމްޕޭން ތެރޭގައިވެސް ވައުދުވެވަޑައިގެންނެވި ފަދައިން، މާވަރުލު އެއާޕޯޓާއި ގައްދޫއާއި އެއްގަމުން ގުޅުވައިދެއްވާނެ ކަމަށް ރައީސް ޑރ.މުއިއްޒު ވިދާޅުވެއްޖެއެވެ.

މިއަދު ހެނދުނު ގދ. ގައްދޫއަށް ވަޑައިގެން، އެ ރަށުގެ ރައްޔިތުންނާ ބައްދަލުކުރައްވައި ދެއްކެވި ވާހަކަފުޅުގައި ރައީސް ޑރ.މުއިއްޒު ވިދާޅުވީ މާވަރުލު އެއާޕޯޓާއި ގައްދޫއާއި އެއްގަމުން ގުޅުވައިދެއްވުމުގެ އިތުރުން މާވަރުލު އެއާޕޯޓު އިތުރަށް ތަރައްޤީކޮށްދެއްވާނެ ކަމަށެވެ.

ގައްދޫ ގެ ރައްޔިތުންނާއި ބައްދަލު ކުރައްވާ ދެއްކެވި ވާހަކަފުޅުގައި ގައްދޫގެ ތަރައްޤީއަށް ބޭނުންވާ ގިނަ ކަންތައްތަކެއް ހުރިކަމަށް ރައީސް ޑރ.މުއިއްޒު ވަނީ ވިދާޅުވެފައެވެ. މިގޮތުން އެރަށަށް އެންމެ މުހިންމު ކަމެއްގެ ގޮތުގައި އެމަނިކުފާނު ފާހަގަކުރެއްވީ ގައްދޫގެ ތަރައްޤީއާ ގުޅިފައިވާ ބިން ހިއްކުމުގެ މަޝްރޫޢެވެ. ރައީސް ޑރ.މުއިއްޒު ވަނީ އެކަން މި ސަރުކާރުން ކޮށްދެއްވާނެކަމަށާއި ހޮސްޕިޓަލް މަޝްރޫޢުގެ މަސައްކަތް ވެސް ވީހާވެސް އަވަހަށް ކޮށްދޭނެ ކަމުގައި ވިދާޅުވެފައެވެ.

ރައީސް ޑރ.މުއިއްޒު ގެ ވައުދުފުޅުތައް ފުއްދެވުމުގައި އަދި ރަށުގެ ތަރައްޤީއަށް ކުރިއަށްގެންދާ މަސައްކަތްތައް ކުރުމުގައި ރައްޔިތުން އެއްބާރުލުން ދެއްވުމަށް ބާރުއަޅުއްވާ އެމަނިކުފާނު ވަނީ ރައްޔިތުންނަށް ޚިދުމަތްކުރުމުގެ ޒިންމާއާ ހަވާލުވެ އެކަމަށް ހުވައެއްކުރުމަށްފަހު، ހަމަހަމަކަމާއެކީ އެމީހަކު އެނިސްބަތްވާ ޕާޓީއަކަށް ބެލުމެއްނެތި ރައްޔިތުންނަށް ޚިދުމަތްކުރެއްވުމަށް، މަގާމުތަކަށް އިންތިޚާބުވާ ފަރާތްތަކަށް ވެސް ބާރު އަޅުއްވާފައެވެ.

"ރައްޔިތުން އިންތިޚާބެއްގައި އެމީހަކު ހޮވައި އެ ހަވާލުކުރާ ޒިންމާ އަދާކުރުމުގައި، ތެދުވެރިކަމާއި، އަމާނާތްތެރިކަން އިސްކޮށް ހަމަހަމަކަން އިސްކުރަން ޖެހޭނެ. ސިޔާސީ ފިކުރާއި ސިޔާސީ ވިސްނުމަކީ ދޭތެރެ މެދުން ހުރަހަކަށް ވާންޖެހޭކަމަކަށް ހަދައިގެން ނުވާނެ"

ރައީސް ޑރ.މުއިއްޒު ވިދާޅުވިއެވެ.

ގައްދޫގެ ރައްޔިތުންނާއި ރައީސް ޑރ.މުއިއްޒު ބައްދަލު ކުރައްވާ، އެމަނިކުފާނު ވަނީ  މި ސަރުކާރުން ވެފައިވާ ވަޢުދުތައް ފުއްދަވައި ޤައުމު ތަރައްޤީކޮށް ރައްޔިތުންގެ އާމްދަނީ އިތުރުކުރުމަށް ޚާއްޞަ އިސްކަމެއް ދެއްވައިގެން މަސައްކަތްތައް ކުރައްވާނެކަމުގައި ވިދާޅުވެފައެވެ.