ޝެއިޚް ނައިފަރީ ފަރުވާއަށް މާލެއަށް، ބޭރަށް ފުރުން އަންނަ މަހު

ދީނީ އިލްމުވެރިޔާ ޝެއިޚް މުހައްމަދު އިބްރާހިމް (ނައިފަރީ) ބޭސްފަރުވާ އަށް މާލެއަށް ވަޑައިގެންފިއެވެ.

ޝެއިޚްގެ ބޭސްފަރުވާގެ ކަންކަމަށް ދިވެހިންގެ އެހީތެރިކަން ފޯރުކޮށްދިނުމުގެ ކަންކަމުގެ އިސްވެ ހަރަކާތްތެރިވާ އެހީ ޖަމިއްޔާއިން ބުނި ގޮތުގައި، ޝެއިޚް ބޭރަށް ފުރައިވަޑައިގަތުމަށް ތައްޔާރުވަމުން ގެންދަވަނީ ޖެނުއަރީ 2 ވަނަ ދުވަހުގެ ވަށައިގެންނެވެ. އަދި މާލޭގައި ޝެއިޚް ހުންނެވުމަށް ހަމަޖެހިފައިވަނީ ފަސް ދުވަހަށްވުރެ ކުރު މުއްދަތެއްގައެވެ.

އެހީ ޖަމިއްޔާއިން އިތުރަށް ބުނީ މިހާރު ބެންކޮކް ހޮސްޕިޓަލާއެކު ޝެއިޚްގެ އޮންލައިން ކޮންސަލްޓޭޝަންތައް ކުރިއަށް ގެންގޮސްފައިވާ ކަމަށެވެ. ނަމަވެސް، ކުރިން ހެދިފައިވާ ޓެސްޓުތަކުގެ މުއްދަތު ހަމަވެފައިވާތީ، މާލޭގައި ހުންނަވާއިރު ހޮސްޕިޓަލަކުން ފުރަތަމަ ލޮލުގެ ކަންކަމާ ގުޅޭ ޓެސްޓުތައް އަލުން ހައްދަވާނެ ކަމަށް އެ ޖަމިއްޔާއިން މައުލޫމާތު ދެއެވެ.

ޝެއިޚްގެ ބޭސްފަރުވާގެ ހަރަދުތަކަށް ބަލައި، އިތުރު އެހީއެއް ބޭނުންވެއްޖެ ހާލަތެއްގައި، ހޮސްޕިޓަލުން އެންގުމުން އެކަމަށް ޚާއްސަ ކެމްޕޭނެއް އަލުން ހުޅުވާނެ ކަމަށް އެހީ ޖަމިއްޔާއިން ބުނެއެވެ.

އަދި މިހާރުވެސް މި ކެމްޕޭނަކާ ގުޅޭ އެންމެފަހުގެ މައުލޫމާތުތައް ފެންނަން ހުންނާނެ ކަމަށް އެ ޖަމިއްޔާއިން ހާމަކުރެއެވެ.

މިދަތުރުގެ ތެރޭގައި ޝެއިޚް މުހައްމަދު އިބްރާހިމްއާ ބައްދަލުކުރުމަށް ގިނަ ބަޔަކު އެދިފައިވާތީ، އެފަދަ ހަފްލާއެއް ތައްޔާރުކުރެވޭތޯ މަސައްކަތް ކުރަމުންދާ ކަމަށް ވެސް އެހީ ޖަމިއްޔާއިން ބުނެއެވެ.

މީގެ އިތުރުން، ޝެއިޚްގެ ފޮތްތައް ޕަބްލިޝްކޮށް އާންމުންނަށް ލިބޭނެ ގޮތް ހެދުމުގެ މަސައްކަތްތައް ވެސް މިހާރު ކުރިއަށްދާ ކަމަށް އެ ޖަމިއްޔާއިން މައުލޫމާތު ދެއެވެ.

އެހީ ޖަމިއްޔާއިން ވަނީ ޝެއިޚް މުހައްމަދު އިބްރާހިމްގެ މި މެޑިކަލް ދަތުރު ކާމިޔާބު ކުރުމަށްޓަކައި އެންމެންގެ ދުޢާ އާއި، އިތުރު އެހީއެއް ބޭނުންވެއްޖެ ހާލަތެއްގައި އަބަދުވެސް ކައިރީގައި ތިބުމަށް އެދިފައެވެ.

ޝެއިހުގެ ދެ ލޮލުގެ ފެނުން ގެއްލި އެކަމަށް ފަރުވާ ހޯދުމަށް އާންމުންގެ އެހީތެރިކަން ހޯދުމަށް "އެހީ" ޖަމިއްޔާގެ "އެދިހަ" ޕޯޓަލް މެދުވެރިކޮށް ޚާއްސަ ހަރަކާތެއް ވަނީ ހިންގާފައެވެ.

އެ ޕޯޓަލުން ޝެއިޚްގެ ފަރުވާގެ ކަންކަމާގުޅޭ އަދާހަމަ ބަލާލެވޭނެ ކަމަށް އެހީ ޖަމިއްޔާއިން ބުނެއެވެ.