ޣައްޒާގެ ޝަހީދުންގެ ތެރެއިން 70 އިންސައްތައަކީ އަންހެނުންނާއި ކުޑަކުދިން: އދ
ޣައްޒާގައި ޔަހޫދީން ހިންގަމުން އަންނަ ގަތުލުއާއްމުގެ ސަބަބުން މިހާތަނަށް ޝަހީދުވެފައިވާ މީހުންގެ 70 އިންސައްތައަކީ އަންހެނުންނާއި ކުޑަކުދިންކަމަށް އދ އިން ބުނެފިއެވެ.
އދ ގެ އިންސާނީ ހައްގުތަކާއި ބެހޭ އޮފީހުން ނެރުނު ރިޕޯޓުގައި ބުނީ، ގަތުލުއާއްމުގެ ފުރަތަމަ 6 މަސްދުވަހުގެ ތެރޭގައި 34,500 އަށް ވުރެ ގިނަ މީހުން ޝަހީދުކޮށްލާފައިވާކަމަށާއި، ޔަހޫދީން ޝަހީދުކޮށްލި އެންމެ ހަގު ކުއްޖާގެ އުމުރަކީ އެންމެ ދުވަހެއް ކަމަށެވެ.
މިގޮތުން ނިރުބަވެރި ޔަހޫދީންގެ ލާއިންސާނީ އަމަލުތަކުގެ ސަބަބުން ޝަހީދުވި ފަރާތްތަކުގެ ތެރޭގައި 44 އިންސައްތަ ކުޑަކުދިން ހިމެނޭއިރު، އޭގެ ތެރޭގައި އެންމެ ގިނައީ 5 އަހަރާއި 9 އަހަރުގެ ކުދިން ކަމަށް އދ އިން ބުނެއެވެ.
އދ ގެ ރިޕޯޓުން ދައްކާ ގޮތުގައި 88 އިންސައްތަ ކޭސްތަކުގައި، އެއް ހަމަލާއެއްގައި ޔަހޫދީ ފައުޖުން ވަނީ 5 ނުވަތަ އެއަށް ވުރެ ގިނަ އަދަދަކަށް މީހުން ޝަހީދުކޮށްލާފައެވެ.
ޣައްޒާގައި ޔަހޫދީން ހިންގަމުންދާ ގަތުލުއާއްމަށް އަހަރަކަށް ވުރެ ގިނަ ދުވަސްވެފައިވާއިރު، ނިރުބަވެރިންގެ ހަމަލާތަކުގައި މިހާތަނަށް 43,469 މީހުން ޝަހީދުކޮށްލާފައިވާއިރު، 102,561 މީހުން ޒަހަމްވެފައިވާކަމަށް ޣައްޒާގެ ހެލްތު މިނިސްޓްރީން ވަނީ ހާމަކޮށްފައެވެ.
ކޮމެންޓް ކުރޭ
ކޮމެންޓްސް
މިހާތަނަށް ކޮމެންޓެއް ނެތް
