ޝަމްއާންގެ 25 އަހަރުގެ ޖަލު ހުކުމް ހައި ކޯޓުގައި އިސްތިއުނާފުކޮށްފި

ބިދޭސީއެއްގެ އަތުން ފައިސާ ފޭރުމާ ގުޅޭ ތިން ދައުވާއެއް ސާބިތުވެ، ކްރިމިނަލް ކޯޓުން 25 އަހަރަށް ޖަލަށްލާން ހުކުމްކުރި ކުރީގެ އިމިގްރޭޝަން ކޮންޓްރޯލަރު މުޙައްމަދު ޝަމްއާން ވަޙީދުގެ ފަރާތުން އެ ހުކުމް ހައި ކޯޓުގައި އިސްތިއުނާފުކޮށްފިއެވެ.

ދައުލަތާ ދެކޮޅަށް ޝަމްއާން ހުށަހެޅި މި މައްސަލަ ހައި ކޯޓުން ބަލައިގަތުމާ މެދު އަދި ވަކި ގޮތެއް ކަނޑައަޅާފައެއް ނުވެއެވެ.

ޝަމްއާންގެ މައްޗަށް ދައުލަތުން އުފުލީ ފޭރުމުގައި ބައިވެރިވުމުގެ ކުށުގެ ދައުވާ އާއި ރަސްމީ ހައިސިއްޔަތު ނަހަމަ ގޮތުގައި ބޭނުންކުރުމުގެ ކުށުގެ ދައުވާ އާއި މަނީ ލޯންޑްރިންގެ ކުށުގެ ދައުވާއެވެ. އިމިގްރޭޝަންގެ ބެލުމުގެ ދަށުގައި ހުރި ބިދޭސީއެއް ދޫކޮށްލުމަށްފަހު އެ މީހާގެ އަތުން 500،000 ރުފިޔާ އަތުލައި އިމިގްރޭޝަންގެ މުވައްޒަފުންތަކެއް ލައްވައި އެ ފައިސާ ޝަމްއާންގެ ގެއަށް ގެންދިޔަ ކަމަށް ތުހުމަތުކޮށް ކުރި މި ތިން ދައުވާ ވެސް ކްރިމިނަލް ކޯޓުން ސާބިތުކޮށްފައިވެއެވެ.

ހުކުމުގެ ތަފްސީލަށް ބަލާއިރު މަނީ ލޯންޑްރިންގެ ކުށުގައި 15 އަހަރާއި ފޭރުމުގައި ބައިވެރިވުމުގެ ކުށުގައި އަށް އަހަރާއި ރަސްމީ ހައިސިއްޔަތު ނަހަމަ ގޮތުގައި ބޭނުންކުރުމުގެ ކުށުގައި ދެ އަހަރު ހިމެނޭ ގޮތަށް ޖުމްލަ 25 އަހަރުގެ ޖަލު ހުކުމެއް ކޮށްފައިވެއެވެ. ތަޙުޤީޤާއި ޝަރީޢަތުގެ މަރުޙަލާގައި ޝަމްއާން ޖަލުގައި ހޭދަކުރި 9 މަހާއި 10 ދުވަސް އަދަބުން އުނިކުރަން ވެސް ހުކުމުގައި އަންގާފައިވެއެވެ.

ޖަލު ހުކުމުގެ އިތުރުން 500،000 ރުފިޔާގެ ޖޫރިމަނާއެއް ދެއްކުމަށާއި ބިދޭސީ މީހާގެ އަތުން ފޭރިގަތް 500،000 ރުފިޔާ 3 މަސް ދުވަހުގެ ތެރޭގައި އެ މީހާއަށް އަނބުރާ ދެއްކުމަށް ވެސް ކޯޓުން އެންގިއެވެ. އޭގެ އިތުރުން، ޝަމްއާންގެ ގެއިން ފެނުނު 2 ލައްކަ ރުފިޔާ އާއި 10،000 ޑޮލަރު (154،000 ރުފިޔާ) ގެ ތެރެއިން 125،000 ރުފިޔާއަށް ވާ ދިވެހި ފައިސާ ދައުލަތަށް ނެގުމަށް ވެސް ހުކުމުގައި ކަނޑައެޅާފައިވެއެވެ.

މި މައްސަލައިގެ އިސްތިއުނާފު އަޑުއެހުންތައް ހައި ކޯޓުން ފެށޭނެ ދުވަހެއް އަދި ހާމަކޮށްފައެއް ނުވެއެވެ.