ޖަޕާނުގެ ސެކިއުރިޓީ އެހީ ރާއްޖެއަށް ފޯރުކޮށްދިނުމާ ގުޅޭ ގޮތުން މަޝްވަރާކުރައްވައިފި
ޖަޕާނު ސަރުކާރުން ރާއްޖެއަށް ފުރަތަމަ ފަހަރަށް ރަސްމީ ސެކިއުރިޓީ އެހީތެރިކަން ދިނުމާ މެދު ވިސްނަމުންދާ ކަމަށް ޚާރިޖީ ވަޒީރު އިރުތިޝާމް އާދަމް މިއަދު ވިދާޅުވެއްޖެއެވެ.
ރާއްޖޭގައި ޖަޕާނުގެ އެމްބަސީ ޤާއިމުކުރިތާ 10 އަހަރު ފުރުމުގެ މުނާސަބަތުގައި ހޮޓެލް ޖެންގައި ބޭއްވި ޚާއްޞަ ޙަފުލާގައި ވާހަކަދައްކަވަމުން ވަޒީރު ވިދާޅުވީ ދެ ޤައުމަކީ ވެސް ބޮޑު ކަނޑުގެ ސަރަޙައްދެއް ހިއްސާކުރާ ދެ ޤައުމު ކަމަށާއި އިންޑޯ-ޕެސިފިކް ސަރަޙައްދުގެ ސުލްޙައާއި މިނިވަންކަން ޙިމާޔަތްކުރުމަކީ ދެ ފަރާތުން ވެސް އިސްކަންދޭ ކަމެއް ކަމަށެވެ.
ސެކިއުރިޓީ ދާއިރާއިން ޖަޕާނުގެ އެހީ ލިބެން ފެށުމަކީ ދެ ޤައުމުގެ ގުޅުން ދެމެހެއްޓެނިވި ގޮތެއްގައި ބަދަހިކުރުމަށް ލިބޭ ބޮޑު ކުރިއެރުމެއް ކަމަށް ވެސް ވަޒީރު ފާހަގަކުރެއްވިއެވެ.
އެ ޙަފުލާގައި ވަޒީރު ވަނީ ބޮޑުތަކުރުފާނު މަގުގެ ތޮށިގަނޑު ހެދުމާއި ސްކޫލްތައް ބިނާކުރުމާއި ކާރިސާތަކުން އަރައިގަތުމުގެ ތެރޭގައި ޖަޕާނުން ރާއްޖެއަށް ފޯރުކޮށްދީފައިވާ އެކިއެކި އެހީތައް ޝުކުރުވެރިކަމާ އެކު ފާހަގަކުރައްވައިފައެވެ. ހަމައެހެންމެ ފާއިތުވި 10 އަހަރު ދެ ޤައުމުގެ ރައްޔިތުން ގުޅުވައިދީ ރާއްޖޭގެ އިޤުތިޞާދީ އަދި އިޖުތިމާޢީ ތަރައްޤީއަށް އެމްބަސީން ކޮށްދީފައިވާ މަސައްކަތްތަކަށް ޝުކުރު އަދާކުރައްވައި ސަފީރު އިޝިގާމީ ރުމީކޯއާއި އެމްބަސީގެ ޓީމަށް ވަޒީރު ތައުރީފުކުރެއްވިއެވެ.
މީގެ އިތުރުން ވަޒީރު ވިދާޅުވީ އދ. ގެ ޢާންމު މަޖިލީހުގެ ހަވާސާގައި ޖަޕާނުގެ ޚާރިޖީ ވަޒީރާ ބައްދަލުކުރައްވައި ކުރިއަށް އޮތް ތަނުގައި ގުޅުން އިތުރަށް ހަރުދަނާކުރެވޭނެ ގޮތްތަކާ މެދު މަޝްވަރާކުރެއްވި ކަމަށެވެ.
އަންނަ އަހަރަކީ ރާއްޖެއާއި ޖަޕާނާ ދެމެދު ސިޔާސީ ގުޅުން ޤާއިމުކުރިތާ 60 އަހަރު ފުރޭ އަހަރު ކަމަށް ވާތީ އެ މުނާސަބަތާ ގުޅިގެން ދެ ޤައުމުގެ ގުޅުން އައު ހަރުފަތަކަށް ގެންދެވޭނެ ކަމުގެ އުންމީދު އެބައޮތް ކަމަށް ވެސް ވަޒީރު އިރުތިޝާމް ވިދާޅުވިއެވެ.
މި ލިޔުން ކަމުދިޔަނަމަ، ލައިކެއް ދެއްވާ
ކޮމެންޓް ކުރޭ
ކޮމެންޓްސް
މިހާތަނަށް ކޮމެންޓެއް ނެތް
