ރައީސް ޑރ.މުއިއްޒުވެސް ވިދާޅުވީ، އިއްޔެ ކުރަން އުޅުނީ ބަގާވާތެއްކަމަށް
ބޭންކް އޮފް މޯލްޑިވްސް އިން އިދިކޮޅު ފަރާތްތަކާ ގުޅިގެން އިއްޔެ ކުރަން އުޅުނީ ހަމަ ރަނގަޅަށްވެސް ބަގާވާތެއްކަމަށް ރައީސުލްޖުމްހޫރިއްޔާ ޑރ.މުހައްމަދު މުއިއްޒު ސިފަކުރައްވައިފިއެވެ.
ޕީއެންސީ ހަރުގެ ޖަލްސާގައި ވާހަކަދައްކަވަމުން ރައީސް ޑރ.މުއިއްޒު ވިދާޅުވީ، މިރޭގެ ޖަލްސާގައި ފިޝަރީޒް މިނިސްޓަރު ޝިޔާމް ވިދާޅުވިގޮތަށް އިއްޔެ ހިންގަން އުޅުނީ ބަގާވާތެއް ކަމަށާއި، އެކަމުގައި ހުދު އެމަނިކުފާނަށްވެސް ކަންތައްތަކެއް ފާހަގަކުރެވިފައިވާކަމަށެވެ. ރައީސް ވިދާޅުވީ، ރުފިޔާ އެކައުންޓަށް ދޫކޮށްފައިވާ ކާޑުތަކުން ޑޮލަރުގެ މުއާމަލާތް ކަނޑާނުލުމަށް އެމަނިކުފާނު ބީއެމްއެލަށް އަންގާފައިވާނޭކަމަށެވެ.
ބީއެމްއެލްގެ ނިންމުން ބަދަލުކުރުމަށް ސަރުކާރުން އިއްޔެ ކެނޑިނޭޅީ ހަވީރުގެ ވަގުތާ ހަމަޔަށް މަސައްކަތް ކުރަމުން ދިޔަކަމަށާއި، މިހާރު ބޭންކުގެ ބޯޑުގައި ސަރުކާރުގެ ބާރެއް މިވަގުތު ނެތްކަމަށްވެސް ރައީސް ވިދާޅުވިއެވެ.
މިކަން މިކުރީ ދުރާލާ ރޭވިގެން. ފުލުހުން މިހާރު އެދަކީ އެކަން ބަލަމުން
ރައީސް ޑރ.މުއިއްޒު ވިދާޅުވިއެވެ.
ރައީސް ވިދާޅުވީ، އިއްޔެގެ އެ ހައްސާސް ވަގުތުގައި ބީއެމްއެލްގެ ބޯޑުގައި ތިބި ސަރުކާރު ޑިރެކްޓަރުންނާއި، އާއްމު ހިއްސާދާރުންގެ ފަރާތުން ބޯޑުގައި ތަމްސީލްކުރާ ޑިރެކްޓަރުން ގުޅިގެން ސަރުކާރަށް އެއްބާރުލުން ދިންކަމަށެވެ. މިގޮތުން ބީއެމްއެލް އާއްމު ޑިރެކްޓަރުންގެ ފަރާތުން ޗަމްޕާ މުހައްމަދު މޫސާގެ ފަރާތުން ލިބުނު އެއްބާރުލުން ރައީސް ވަނީ ފާހަގަކުރައްވާފައެވެ.
ރައީސް ވަނީ ބީއެމްއެލްގެ ކަންކަން ހުރިގޮތުން އަދި މިހާތަނަށް ޗެއާމަނަކުވެސް އައްޔަނުކޮށް ނުނިމޭކަން ފާހަގަކުރައްވާފައެވެ. ބޭންކަށް ޗެއާމަނެއް އައްޔަނުކުރުމަށް ސަރުކާރުން ނިންމަންޖެހޭ ކަންކަން ވަނީ ނިންމާފައެވެ.
ރައީސް ވިދާޅުވީ އިއްޔެ ހިނގާދިޔަ ކަންތައްތަކުގައި ޤާނޫނާ ހިލާފް ކަންތައްތަކެއް ހުރިކަން ފާހަގަވެގެން ފުލުހުން މިހާރު އެކަން ބަލަމުންދާކަމަށެވެ. މިކަން ވީގޮތް ހާމަވާނީ ފުލުހުންކުރާ ތަހުގީގުތަކަށްފަހުކަމަށް ރައީސް ވިދާޅުވިއެވެ.
މި ލިޔުން ކަމުދިޔަނަމަ، ލައިކެއް ދެއްވާ
ކޮމެންޓް ކުރޭ
ކޮމެންޓްސް
މިހާތަނަށް ކޮމެންޓެއް ނެތް
