ކެންސަރު ބަލީގެ ފަރުވާއަށް ބޭނުންކުރާ އިންޖެކްޝަންއެއްގެ ނަކަލު ރާއްޖެ އެތެރެކޮށްފި؛ ބޭނުންކުރުން މަނާކޮށްފި

ކެންސަރު ބަލީގެ ފަރުވާއަށް ބޭނުންކުރާ "އޮޕްޑިވޯ" ބްރޭންޑުގެ އިންޖެކްޝަނެއްގެ ނަކަލު (ފޯލްސިފައިޑް) ބެޗެއް ރާއްޖެއަށް އެތެރެކޮށްފައިވާތީ، އެ ބޭނުންކުރުމާއި ވިއްކުން މޯލްޑިވްސް ފުޑް އެންޑް ޑްރަގް އޮތޯރިޓީ (އެމް.އެފް.ޑީ.އޭ) އިން މަނާކޮށްފިއެވެ.

އެމް.އެފް.ޑީ.އޭ އިން ނެރުނު އެލާޓެއްގައި ބަޔާންކޮށްފައިވާ ގޮތުގައި، އަސްލާ އެއްގޮތަށް ނަކަލުކޮށްގެން ހަދާފައިވާ މި ބޭހުގެ ބެޗު ނަންބަރަކީ 8081399 އެވެ. މި ބެޗުގެ އިންޖެކްޝަން ރާއްޖެއަށް އެތެރެކޮށްފައިވާކަން މިހާރު ވަނީ ކަށަވަރު ކުރެވިފައެވެ.

މި ބޭހާ ބެހޭ ތަފްސީލު:

ބްރޭންޑް ނަން: އޮޕްޑިވޯ

ޖެނެރިކް ނަން: ނިވޮލުމެބް

ބާވަތް: އިންޖެކްޝަން (10 mg/mL - 40 mg/4 mL)

އުފެއްދި ކުންފުނި: ސްވޯޑްސް ލެބޯޓްރީސް އަންލިމިޓެޑު

މި ބެޗުގެ ބޭސް އެއްވެސް ގޮތަކަށް ރާއްޖެ އެތެރެކުރުމާއި، ވިއްކުމާއި އަދި ބޭނުންކުރުމަކީ މަނާކަމެއް ކަމަށް އެ އޮތޯރިޓީން ވަނީ އާންމުކޮށް އަންގާފައެވެ. މިއީ އާންމު ސިއްހަތަށް ހުރި ނުރައްކަލަކަށް ވާތީ، މިކަމަށް ހާއްސަ ސަމާލުކަމެއް ދިނުމަށް ވަނީ އިލްތިމާސްކޮށްފައެވެ.

މި ކަމާ ގުޅޭގޮތުން އިތުރު މައުލޫމާތު ސާފުކުރަން ބޭނުންވާ ފަރާތްތަކުން ނުވަތަ މި ބޭހާ ގުޅޭ އެއްވެސް މައުލޫމާތެއް ހިއްސާކުރަން ބޭނުންވާ ފަރާތްތަކުން އެމް.އެފް.ޑީ.އޭގެ ހޮޓްލައިން ނަންބަރު 7200321 އަށް ގުޅުމަށް އެ އޮތޯރިޓީން އެދެއެވެ.