އިސްރާއީލު ޖަލުގައި ހުރި ތިއާގޯގެ ސިޓީއެއް ދަރިފުޅަށް؛ "ފަލަސްޠީނު ހަނދާން ނައްތާނުލާތި!"

އިސްތިއުމާރީ އިސްރާއީލުގެ ޖަލުގައި ބަންދުކޮށްފައި ހުރި ތިއާގޯ އާވީލާ އޭނާގެ ކުޑަ ދަރިފުޅަށް ލިޔުނު އަސަރުގަދަ ސިޓީއެއް އާންމުވެއްޖެއެވެ.

އެ ސިޓީގައި ތިއާގޯ ބުނީ މިވަގުތު ދަރިފުޅު ގާތުގައި ނެތީތީ މަޢާފަށް އެދޭ ކަމަށާއި، ނަމަވެސް ދަރިފުޅުގެ ބައްޕައާއި މަންމައާއި ދުނިޔޭގެ އެތައް ބަޔަކު ވަނީ އެ މީހުންގެ ކޮނޑުގައި އެޅިފައިވާ ޒިންމާ އުފުލަންޖެހޭ ކަން ދެނެގެންފައި ކަމަށެވެ.

"މިއަދު މިލިއަނަކަށްވުރެ ގިނަ ކުޑަކުދިން ގެންދަނީ ގަތުލުއާންމެއް ތަހައްމަލުކުރަމުން، ބަނޑަށް މަރުވަމުން، އެނެސްތީޒިއާއާ ނުލައި ގުނަވަންތައް ބުރިކުރެވެމުން. ޒަޔަނިޒަމާއި އިސްތިއުމާރަކީ ކޮބައިކަން ނޭނގޭ ޙާލުގައި އެ ކުދިން އެ ދަނީ އެންމެ ބިރުވެރި ނަފުރަތުގެ ފިކުރުތައް ތަހައްމަލުކުރަމުން" ތިއާގޯ ލިޔެފައިވެއެވެ.

ތިއާގޯ އިތުރަށް ބުނީ ފަލަސްޠީނުގެ ކުޑަކުދިންގެ މައިންބަފައިންވެސް އެ މީހުންގެ ދަރިން މަތިން ހަނދާންވާ ކަމަށާއި، ނަސްލާއި ދީނާއި ނަސަބަށް ބެލުމެއް ނެތި ކޮންމެ އިންސާނަކު ހައްގުވާ ލޯތްބާއި އުފާވެރި ދިރިއުޅުން ހޯދައިދޭން ކޮންމެ ކަމެއްވެސް ކުރާނެ ކަމަށެވެ.

"ދަރިފުޅުގެ ދުނިޔެ އެންމެ ރައްކާތެރިވާނީ އެތައް މައިންބަފައިންނެއް ދަރިންނަށްޓަކައި ރަނގަޅު ދުނިޔެއެއް ބިނާކުރަން ހުރިހާ އެއްޗެއް ޤުރުބާންކުރީތީ. ބައްޕަ ދަރިފުޅު ދެކެ އެހާ ލޯބިވާތީ، ގަތުލުއާންމު ބަލައިގަންނަ ދުނިޔެއެއްގައި ދިރިއުޅުމަށްވުރެ ނުރައްކާތެރި ކަމެއް ދަރިފުޅަށާއި އެހެން ކުދިންނަށް ނެތް" ކަމަށް ތިއާގޯ ލިޔެފައިވެއެވެ.

ސިޓީ ނިންމާލަމުން ތިއާގޯ ވަނީ އޭނާ ހަނދާންކުރާއިރު ދަރިފުޅު ނިންދެވުމަށް ލަވަ ކިޔައިދިން މީހެއްގެ ގޮތުގައި ހަނދާންކުރުމަށް އެދިފައެވެ. އަދި އެ ދަރިފުޅު ބޮޑުވުމުން، އޭނާގެ ބައްޕައަކީ އިންގިލާބީ މީހެއް ކަމަށާއި، މި ޒަމާނުގެ އެންމެ ނުރައްކާތެރި މީހުން ކަމަށްވާ ޑޮނަލްޑް ޓްރަމްޕާއި ބެންޖަމިން ނަތަންޔާހޫ އާއި އިތަމާރު ބެން ގްވީރާ ފަދަ މީހުން ދެކޮޅަށް ތިބިއިރުވެސް އޭނާގެ ބައްޕަ ގަބޫލުކުރާ ކަންކަމުގެ މަތީގައި ސާބިތުވެ ހުރި ކަމަށެވެ.

ސިޓީ ނިންމާލީ "ފަލަސްޠީނު ހަނދާން ނައްތާނުލާން!" ދަރިފުޅަށް ހަނދާންކޮށްދެމުންނެވެ.

ފަލަސްތީނުގެ ކުށެއްނެތް މުސްލިމް އަޚުންނާއި އުޚުތުންނަށް ކުރިމަތިވެފައިވާ ލާއިންސާނީ އިސްތިޢުމާރީ އަނިޔާތަކުން ސަލާމަތްކުރުމަށާއި، ބަނޑުހައިހޫނުކަމުގައި ތިބި ރައްޔިތުންނަށް އިންސާނީ އެހީ ފޯރުކޮށްދިނުމަށްޓަކައި ދަތުރުކުރި "ގްލޯބަލް ސުމޫދު ފްލޮޓިއްލާ" އަށް އިސްރާއީލުގެ އަސްކަރިއްޔާއިން ހުރަސް އަޅައި ތިއާގޯ އާވިލާ އާއި ސައިފް އަބޫ ކަޝެކް ހައްޔަރުކުރީ މިދިޔަ މަހު 30 ގައެވެ.

އެފަހުން އެ ދެމީހުން ޖަލުގައި އަދިވެސް ތިބިއިރު، ތިއާގޯ ޖަލުގައި ހުއްޓާ އޭނާގެ މަންމަ ވެސް ވަނީ މަރުވެފައެވެ.