ނިއުޔޯކް ސިޓީގެ އެންމެ ފުރަތަމަ މުސްލިމު މޭޔަރު، މަމްދާނީ ހުވާ ކުރައްވައިފި

އެމެރިކާގެ އެންމެ ބޮޑު ސިޓީ ކަމަށްވާ ނިއުޔޯކް ސިޓީގެ މޭޔަރުކަމުގެ ހުވާ، ޒޯހްރާން މަމްދާނީ ކުރައްވައިފިއެވެ.

މިއާއެކު އޭނާ ވެވަޑައިގެންފައިވަނީ އެ ސިޓީގެ ތާރީޚުގައިވެސް އެ މަގާމާ ހަވާލުވި ފުރަތަމަ މުސްލިމް މޭޔަރަށެވެ. އަދި އޭނާއަކީ ފަހުގެ ތާރީޚެއްގައި އެ ސިޓީގެ މޭޔަރުކަމާ ހަވާލުވި އެންމެ ޒުވާން ބޭފުޅާވެސް މެއެވެ.

ޑިމޮކްރެޓިކް ޕާޓީއަށް ނިސްބަތްވާ އުމުރުން 34 އަހަރުގެ މަމްދާނީ މަގާމުގެ ހުވާ ކުރެއްވީ ބުރާސްފަތި ދުވަހު، މެންހަޓަންގައި ހުންނަ ތާރީޚީ ސަބްވޭ ސްޓޭޝަނެއްގައެވެ. ކީރިތި ގުރުއާނުގައި އަތް ބާއްވައިގެން އޭނާ ކުރެއްވި މި ހުވާލައިދެއްވީ ނިއުޔޯކްގެ އެޓާނީ ޖެނެރަލް ލެޓިޝިއާ ޖޭމްސްއެވެ. ހުވާ ކުރެއްވުމަށްފަހު މަމްދާނީ ވިދާޅުވީ މިއީ އޭނާގެ މުޅި ހަޔާތުގައިވެސް ލިބުނު އެންމެ ބޮޑު ޝަރަފު ކަމަށެވެ.

މަމްދާނީގެ ރަސްމީ ހުވާކުރުމުގެ ބޮޑު ރަސްމިއްޔާތު އޮންނާނީ މިއަދު މެންދުރުފަހު 1:00 ގައި ސިޓީ ހޯލްގައެވެ. މި ރަސްމިއްޔާތުގައި ހުވާލައިދެއްވާނީ ޔޫއެސް ސެނެޓަރ ބާނީ ސޭންޑާސްއެވެ.

ޔޫގަންޑާގެ ކަމްޕާލާއަށް އުފަން މަމްދާނީއަކީ ދެކުނު އޭޝިއާގެ ނަސްލަށް ނިސްބަތްވާ، އަދި އެފްރިކާއަށް އުފަންވި ފުރަތަމަ ނިއުޔޯކް މޭޔަރެވެ. އޭނާ އެމެރިކާގެ ރައްޔިތަކަށްވީ 2018 ވަނަ އަހަރުއެވެ.

މަމްދާނީގެ ކެމްޕޭން ބިނާކޮށްފައިވަނީ ދިރިއުޅުމުގެ އަގުތައް ތިރިކުރުމުގެ މައްޗަށެވެ. އެގޮތުން ހިލޭ ކުޑަކުދިން ބެލުމުގެ ޚިދުމަތް ދިނުމާއި، ބަސް ދަތުރުތައް ހިލޭ ކުރުމާއި، ކުލި ކޮންޓްރޯލް ކުރުން ފަދަ ސިޔާސަތުތައް އޭނާ ވަނީ ހުށަހަޅުއްވާފައެވެ.

މަމްދާނީ މޭޔަރު ކަމަށް ހުވާކުރައްވާއިރު އޭނާއާއި އެމެރިކާގެ ރައީސް ޑޮނަލްޑް ޓްރަމްޕާ ދެމެދު އޮންނަނީ ދެކޮޅުވެރިކަން ކަމަށް މީޑިއާ ރިޕޯޓްތައް ބުނެއެވެ. އެގޮތުން ކެމްޕޭން ތެރޭގައި ޓްރަމްޕް ވަނީ މަމްދާނީއަކީ "ކޮމިއުނިސްޓެއް" ކަމަށް ސިފަކޮށް، އޭނާ ހޮވިއްޖެނަމަ ފެޑަރަލް ފަންޑުތައް ކަނޑާލާނެ ކަމުގެ އިންޒާރު ދީފައެވެ.

ނަމަވެސް، މިދިޔަ ނޮވެމްބަރު މަހު ވައިޓް ހައުސްގައި ބޭއްވި ބައްދަލުވުމުގައި ޓްރަމްޕް ވަނީ މަމްދާނީއަށް އެހީތެރިވާނެ ކަމަށް ބުނެފައެވެ. އެހެންނަމަވެސް، މަމްދާނީ އަދިވެސް ގަބޫލުކުރައްވާ ގޮތުގައި ޓްރަމްޕަކީ "ފެސިސްޓް" އެކެވެ.

ސިޔާސީ މައިދާނަށް މާ ބޮޑަށް މަޝްހޫރު ނޫން ބޭފުޅެއްގެ ގޮތުގައި ނުކުމެ، މަމްދާނީ ވަނީ ކުރީގެ ގަވަރުނަރު އެންޑްރޫ ކޫމޯ ދެ ފަހަރެއްގެ މަތިން ބަލިކޮށް، ތާރީޚީ ކާމިޔާބީއެއް ހޯއްދަވާފައެވެ.