އެމްޑީޕީ އާއި ވާދަކޮށް ރަކީދޫ ކައުންސިލްގެ ގޮނޑި ޕީއެންސީންއަށް

އިދިކޮޅު އެންމެ ބޮޑުޕާރޓީ އެމްޑީޕީ އާއި ވާދަކޮށް ވ.ރަކީދޫ ކައުންސިލްގެ ހުސްވެފައިވާ ގޮނޑި މިހާރު ވެރިކަން ކުރާ މައިޕާރޓީ ޕީއެންސީއިން ކާމިޔާބުކޮށްފިއެވެ.

މިއަދު ބޭއްވުނު މި ބައި އިލެކްޝަން ކާމިޔާބު ކުރައްވާފައިވަނީ ޕީޕީއެމް/ޕީއެންސީ ހިމެނޭ ކޮންގްރެސް ކޯލިޝަންގެ ކެންޑިޑޭޓު އަބްދުއްރައްޒާގް އާދަމެވެ. އޭނާއާ ވާދަކޮށްފައިވަނީ އިދިކޮޅު މައި ޕާރޓީ އެމްޑީޕީގެ ކެންޑިޑޭޓު އާދަމް ސާމީއެވެ.

މި ބައި އިލެކްޝަންގައި އެރަށުގެ ރައްޔިތުންނަށް ހާއްސަ ކުރެވިގެން މާލޭގައި ބެހެއްޓުނު ވޯޓުފޮއްޓަށް ވޯޓުލުމުގެ ހައްގު 96 މީހަކަށް ލިބިފައިވާއިރު ޕީޕީއެމް/ޕީއެންސި ހިމެނޭ ކޮންގްރެންސް ކޯލިޝަން ކެންޑިޑޭޓު އަބްދުއްރައްޒާގް އާދަމަށް 57 ވޯޓް ލިބިފައިވާއިރު ، އެމްޑީޕީ ކެންޑީޑޭޓް އާދަމް ސާމީއަށް ލިބިފައިވަނީ 36 ވޯޓެވެ. އަދި 3 ވޯޓް ބާތިލުވެފައިވާ ކަމަށް އިލެކްޝަން ކޮމިޝަނުން އާއްމުކޮށްފައިވާ މަޢުލޫމާތުތަކުން އެނގެއެވެ.

ރަކީދޫ ކައުންސިލްގެ ގޮޑި ޕީޕަލްސް ނޭޝަނަލް ކޮންގްރެސްއިން ކާމިޔާބުކޮށްފައި ވާއިރު އަންނަ މަހުގެ 24ގައި ބެއްވުމަށް ހަމަޖެހިފައިވާ ހއ. ތަކަންދޫ ކައުންސިލުން ހުސްވެފައިވާ އަންހެނުންނަށް ޚާއްސަ ގޮނޑިވެސް ޕީއެންސީގެ ފަރާތުން ކުރިމަތިލެއްވި ހއ. ތަކަންދޫ، ޑޭޒީމާގެ ފަހީމާ މުޙައްމަދަށް ކާމިޔާބު ވެއްޖެކަމަށް އީސީން ވަނީ އިއުލާން ކުރައްވާފައެވެ.

އިލެކްޝަންސް ކޮމިޝަނުން ވިދާޅުވީ، އެ އިންތިޚާބުގައި ވާދަކުރުމަށް ހުޅުވާލި ފުރުޞަތުގައި އެ ގޮނޑިއަށް ކުރިމަތިލެއްވީ ކޮންގްރެސް ޕާޓީގެ ކެންޑިޑޭޓް ހއ. ތަކަންދޫ، ޑޭޒީމާގެ ފަހީމާ މުޙައްމަދު އެކަނިކަމަށް ވުމުން، ތަކަންދޫ ކައުންސިލުން ހުސްވެފައިވާ ގޮނޑިއަށް ފަހީމާ އިންތިހާބުވެފައިވާކަމަށެވެ.

މިފަހަކަށް އައިސް މިގޮތަށް ބޭއްވޭ ގިނަ ބައި އިލެކްޝަންތައް ކާމިޔާބު ކުރަމުން އަންނަނީ ސަރުކާރުހިންގާ ޕީޕީއެމް/ޕީއެންސީ ހިމެނޭ ކޮންގްރެސް ކޯލިޝަނުން ވާދަކުރައްވާ ކެންޑިޑޭޓުންނެވެ.