ފ.ނިލަންދޫގައި ދަޅުގައި މަސް ބަންދުކުރާ ކާރުޚާނާއަށް ބިން ހިއްކުމާއި ބަނދަރު ހެދުމުގެ ޢަމަލީ މަސައްކަތް ފަށައިފި

ފ.ނިލަންދޫގައި ޤާއިމްކުރާ ދަޅުގައި މަސް ބަންދުކުރާ ކާރުޚާނާއަށް ބޭނުންވާ ބިން ހިއްކުމާއި ބަނދަރު ހެދުމުގެ މަޝްރޫޢުގެ ޢަމަލީ މަސައްކަތް ފަށައިފިއެވެ.

މި މަޝްރޫޢުގެ ދަށުން ދަޅުގައި މަސް ބަންދުކުރާ ކާރުޚާނާއަށް ބޭނުންވާ ބިން ހިއްކުމާއި ބަނދަރު ތަރައްޤީކުރުމުގެ މަސައްކަތް ޙަވާލުކޮށްފައިވަނީ މޯލްޑިވްސް ޓްރާންސްޕޯޓް އެންޑް ކޮންޓްރެކްޓިންގ ކޮމްޕެނީ (އެމްޓީސީސީ) އާއެވެ. މި މަޝްރޫޢުގެ ޚަރަދު ހަމަޖައްސަނީ ސަރުކާރުންނެވެ.

މި މަޝްރޫޢުގެ ދަށުން ޤާއިމްކުރާ ކާރުޚާނާގައި ދުވާލަކު 50 ޓަނުގެ މަސް ދަޅު ބަންދުކުރެވޭނެއެވެ. އަދި 1،500 މެޓްރިކް ޓަނުގެ ކޯލްޑް ސްޓޯރޭޖެއް ވެސް މި މަޝްރޫޢުގެ ދަށުން ޤާއިމްކުރެވޭނެއެވެ. މި މަޝްރޫޢުގެ ޖުމްލަ އަގު 75 މިލިއަން ޑޮލަރާއި 100 މިލިއަން ޑޮލަރާ ދެމެދުގެ ޢަދަދަކަށް އަރާނެ ކަމަށް ލަފާކުރެވެއެވެ.

މި ކާރުޚާނާ އަކީ ސަރުކާރުން މަސްވެރިކަމުގެ ދާއިރާ ކުރިއެރުވުމަށް ކުރިއަށް ގެންދާ 4.5 ބިލިއަން ރުފިޔާ (ގާތްގަނޑަކަށް 290 މިލިއަން ޑޮލަރު) ގެ ބޮޑު އިންވެސްޓްމެންޓުގެ ދަށުން ޤާއިމްކުރާ ކާރުޚާނާއެކެވެ.

މި މަޝްރޫޢުގެ ދަށުން ފެލިވަރު ދަޅުގައި މަސް ބަންދުކުރާ ކާރުހާނާ އަޕްގްރޭޑްކުރުމާއި ފ.ނިލަންދޫ އަދި ގދ.ފިޔޯރީގައި އައު ކާރުހާނާ ބިނާކުރުން ހިމެނެއެވެ. މި މަސައްކަތްތަކުގެ ސަބަބުން ބާނާ މަހުގެ 90 އިންސައްތަ ރާއްޖޭގައި ޕްރޮސެސް ކުރެވޭނެ ކަމަށް ލަފާކުރެވެއެވެ.

ފިޝަރީޒް މިނިސްޓަރ އަޙްމަދު ޝިޔާމް ވިދާޅުވެފައިވާ ގޮތުގައި، ސްޓޯރޭޖް ކެޕޭސިޓީ ދަށްވުމަކީ މަސްވެރިކަމުގެ ސިނާޢަތުން އެންމެ ރަނގަޅު އެކްސްޕޯޓް އަގު ނުލިބުމުގެ މައިގަނޑު އެއް ސަބަބެވެ. މިހާރު ރާއްޖެއިން ބާނާ މަހުގެ ގާތްގަނޑަކަށް 65 އިންސައްތަ ރޯ މެޓީރިއަލްގެ ގޮތުގައި ބޭރުކުރަން ޖެހެނީ ސްޓޯރޭޖް ނެތުމުގެ ސަބަބުންނެވެ.