އިދިކޮޅު ފަރާތްތަކުން ޤާނޫނާ ހިލާފަށް ސަރުކާރު ވައްޓާލަން އުޅުނު މައްސަލައެއް ފުލުހުން ބަލަން ފަށައިފި

ޤައުމީ ބޭންކުން ރުފިޔާ ކާޑަށް ޑޮލަރު ނުނެގޭގޮތަށް ނިންމި ނިންމުމާ ދިމާކޮށް، އެދުވަހު އިދިކޮޅު ސިޔާސީ ފަރާތްތަކުން ޤާނޫނާ ހިލާފަށް ސަރުކާރު ވައްޓާލަން އުޅުނު މައްސަލައެއް ފުލުހުން ބަލަން ފަށައިފިއެވެ.

މިކަމާ ގުޅިގެން ފުލުހުން މިރޭ ނެރުނު ބަޔާނެއްގައި ބުނެފައިވަނީ، ޤާނޫނިގޮތުން އުފެދިފައިވާ ސަރުކާރެއް ވައްޓާލުމަށް އިދިކޮޅު ސިޔާސީ ފަރާތްތަކުން ޤާނޫނާ ހިލާފަށް މަސައްކަތްކޮށްފައިވާތީވެ، އެމައްސަލަ ފުލުހުން ބަލަން ފަށާފައިވާކަމަށެވެ.

ފުލުހުން މިރޭ ނެރުނު ބަޔާނެއްގައި ބުނީ ސަރުކާރުގެ މައި ހިއްސާ އޮންނަ ބޭންކަކުން ސަރުކާޜުގެ މަޝްވަރާ އާ ހިލާފަށް ދިވެހި ގިނަ ރައްޔިތުންނަށް ކުއްލި ސިހުމެއް ލިބޭފަދަ ނިންމުމެއް ނިންމި ވަގުތާ ދިމާކޮށް، ސިޔާސީ ފަރާތްތަކުން ސަރުކާރުގެ މާލީ ހާލަތާ ބެހޭގޮތުން ނޫސްވެރިންގެ ބައްދަލުވުން ބާއްވައި ޤައުމުގެ އަމާންކަން ނަގާލުމަށް މަސައްކަތްކޮށްފައިވާކަމަށެވެ.

މިގޮތުން ހަމަ އެވަގުތު ސޯޝަލްމީޑިއާ އެތައް ސަތޭކަ ބޮޓް އެކައުންޓް ބޭނުންކޮށްގެން ސަރުކާރު ވައްޓާލަން މަގުތަކަށް ނިކުތުމަށާއި އާއްމު ހަމަޖެހުން ނަގާލުމަށް ގޮވައި، ޤައުމުގެ މަސްލަހަތު ނަގާލުމަށް ހިތްވަރުދީ ހަދާފައިވާތީ، މިކަމަކީ ގާނޫނީ ސަރުކާރެއް ގައިރު ޤާނޫނީކޮށް ބަދަލުކޮށްލުމަށް ކުރެވިގެންދިޔަ ކަމެއްކަމަށް ބެލުމުގެ ޖާގަ އޮތުމުން މި މައްސަލަ ފުލުހުންގެ އިދާރާއިން ތަހުގީގު ކުރަން ފަށާފައިވާކަމަށެވެ.

ސަރުކާރުން ބުނެފައިވަނީ އިއްޔެ ބޭންކް އޮފް މޯލްޑިވްސްއިން ރުފިޔާ ކާޑަށް ޑޮލަރު ދޫނުކުރަން ނިންމީ އެކަން ނުކުރަން ސަރުކާރުން އިލްތިމާސްކޮށްފައިވަނިކޮށެވެ. ބީއެމްއެލުން ފަހުން ވަނީ ނިންމުން ބަދަލުކޮށް ކުރިއެކޭ އެއްގޮތަށް ރުފިޔާ އެކައުންޓަށް ދޫކޮށްފައިވާ ވިސާ ޑެބިޓް ކާޑުން ބޭރުފައިސާގެ މުއާމަލާތް ކުރެވޭގޮތަށް ހަދާފައެވެ. ބީއެމްއެލުން ނިންމުން ބަދަލުކޮށްފައިވަނީ ބޭންކުތަކުގެ ރެގިއުލޭޓަރީ އިދާރާގެ ހައިސިއްޔަތުން އެމްއެމްއޭގެވެސް އިރުޝާދުގެ ދަށުންނެވެ.