ފޮރިން އިންވެސްޓްމަންޓް އައު އުސޫލުތަކާއެކު، ބޭރުގެ ފަރާތްތަކަށް ބައެއް ވިޔަފާރިތައް ކުރުން މަނާވެއްޖެ

ފޮރިން އިންވެސްޓްމަންޓް އައު އުސޫލުތަކާއެކު ރާއްޖޭގައި ބިދޭސީން ކުރަމުން އައި ބައެއް ވިޔަފާރިތައް ކުރުން މަނާވެއްޖެއެވެ.

އަލަށް އެކުލަވާލެވުނު ފޮރިން އިންވެސްޓްމަންޓްގެ އައު ޤާނޫނުގެ ދަށުން ބިދޭސީންނަށް ވިޔަފާރި ނުކުރެވޭނެ ބައެއް ދާއިރާތައް ވަނީ ކަނޑައަޅާފައެވެ. އެގޮތުން ހޯލްސޭލް އެންޑް ރީޓެއިލް އަދި ލޮޖިސްޓިކްސް (ސީއެސްއޭ/ޖީއެސްއޭ/ޕީއެސްއޭ) ދާއިރާތައް ހިމެނެއެވެ. ކުރިން މި ވިޔަފާރިތައް ކުރަމުން އައި ފަރާތްތަކަށް އުސޫލްގެ ތެރެއިން ކަންކަން ފުރިހަމަކުރުމަށް ދިން މުއްދަތު މިދިޔަ ބްރާސްފަތި ދުވަހުގެ ނިޔަލަށް ވަނީ ހަމަވެފައެވެ.

މިކަމާ ގުޅޭގޮތުން އިކޮނޮމިކް މިނިސްޓްރީން ބުނީ، ބިދޭސީންނަށް ވިޔަފާރި ނުކުރެވޭ ދާއިރާތައް ކަނޑައެޅި އެފަރާތްތަކުގެ ވިޔަފާރިތައް އަލުން އިމުގެ ތެރެއަށް ފެއްތުމަށް ދިން މުއްދަތުގައި ގިނަ ވިޔަފާރިތަކެއްގެ ހުށަހެޅުންތައް ލިބުނުކަމަށެވެ. އެގޮތުން މިހާރު އެ ހުށަހެޅުންތައް މުރާޖަޢާ ކުރަމުންދާއިރު، ޝަރުތު ފުރިހަމަ ކުރުމުގެ މަރުޙަލާ ފަށާފައިވާ ވިޔަފާރިތަކުން، މިނިސްޓްރީން ކަނޑައަޅާ މުއްދަތެއްގެ ތެރޭގައި ބާކީ ހުރި ޝަރުތުތައް ފުރިހަމަ ކުރަންޖެހޭނެ ކަމަށް މިނިސްޓްރީން ބުންޏެވެ.

މުއްދަތު ހަމަވުމުގެ ކުރިން މިނިސްޓްރީއާ ނުގުޅައި ތިބި ވިޔަފާރިތަކަށް ފޮރިން އިންވެސްޓްމަންޓް ޤާނޫނުގެ ދަށުން ރަސްމީ ނޯޓިސް ފޮނުވުމަށް ނިންމާފައިވާއިރު، ނޯޓިހުގައި ބަޔާންކުރާ މުހުލަތެއްގެ ތެރޭގައި، ހުއްދަ ނެތި ހިންގާ ވިޔަފާރިތަކާމެދު ހަމަޖެހިފައިވާ އުސޫލުން ފިޔަވަޅު އަޅަމުންދާނޭކަމަށް މިނިސްޓްރީން ވަނީ ބުނެފައެވެ.

ދިވެހިންނަށް ހާއްސަކުރެވިފައިވާ ދާއިރާތައް

- ހޯލްސޭލް އަދި ރީޓެއިލް ވިޔަފާރި

- ލޮޖިސްޓިކްސްގެ ޚިދުމަތްތައް

- އާންމު ކަނޑު ދަތުރުފަތުރުގެ ޚިދުމަތްތައް

- ބަންކަރިންގެ ޚިދުމަތުގެ އިތުރުން

- 15 މިލިއަން ޑޮލަރުން ދަށުގެ ކޮންސްޓްރަކްޝަން މަޝްރޫޢުތައް

ދިވެހިންގެ ހިއްސާއާއެކު ބޭރުގެ ފަރާތްތަކަށް ކުރެވޭ ވިޔަފާރިތަކުގެ ތެރޭގައި އެންމެ ފާހަގަކޮށްލެވެނީ އޮޑިޓިންގެ ދާއިރާއެވެ. އިކޮނޮމިކް މިނިސްޓްރީގެ އައު އުސޫލުގައިވާގޮތުން ރާއްޖޭގައި ދެން އޮޑިޓިން ފާމެއް ހިންގަން ބޭނުންނަމަ، އެކުންފުނީގައި ދިވެއްސެއްގެ 25 އިންސައްތަ އޮންނަން ޖެހެއެވެ. އޮޑިޓިން ދާއިރާގައި ބޭރުގެ ފަރާތްތަކަށް ހަރަކާތްތެރިވެވޭނޭ އައު އުސޫލެއް ހަމަޖައްސާފައިވާއިރު، މިހާރު އޮޑިޓިންގައި ގިނައިން ހަރަކާތްތެރިވަނީ އަވައްޓެރި ޤައުމުތަކަށް ނިސްބަތްވާ ކުންފުނިތަކެވެ.