ރައީސް ސޯލިހް ކުރިމަތިލައްވަންވީ ސަބަބެއް ނުވިސްނޭ: ރައީސް ނަޝީދު

އެމްޑީޕީ ރިޔާސީ ޕްރައިމަރީގައި ކުރީގެ ރައީސް އިބްރާހިމް މުހައްމަދު ސޯލިހް ވާދަކުރައްވަންޖެހޭ ސަބަބެއް ނުވިސްނޭކަމަށް ކުރީގެ ރައީސް މުހައްމަދު ނަޝިދު ވިދާޅުވެއްޖެއެވެ.

އެސްއެސްޓީވީގެ ޕްރޮގްރާމެއްގައި ޕްރެޒެންޓަރު ކުރި ސުވާލަކާ ގުޅިގެން ރައީސް ނަޝީދު ވިދާޅުވީ، އެމްޑީޕީގެ ރިޔާސީ ޕްރައިމަރީގައި އެމަނިކްފާނު ތާއީދުކުރައްވަނީ ފައްޔާޒް އިސްމާއިލަށް ކަމަށާއި، ރައީސް ސޯލިހް ކުރިމަތިލައްވަންވީ ސަބަބެއް ވިސްނިވަޑައި ނުގަންނަވާ ކަމަށެވެ.

ރައީސް ނަޝީދު ވިދާޅުވީ، ރާއްޖޭގައި އެމަނިކުފާނަށް ތާއީދުކުރާ ގިނަ އަދަދެއްގެ ރައްޔިތުން ތިބި ނަމަވެސް، މިފަހަރުގެ ނިންމެވުމަކީ ފައްޔާޒް އިސްމާޢީލަށް ތާއީދުކުރެއްވުން ކަމަށެވެ. އަދި ރައީސް ޞާލިޙު ޕްރައިމަރީއަށް ނުކުމެވަޑައިގެންނެވި ނަމަވެސް އެމަނިކުފާނުގެ ވިސްނުންފުޅު ބަދަލުނުވާނެ ކަމަށެވެ.

ޕާޓީގެ އެތެރޭގެ ވާދަވެރިކަމާއި ކޯޅުންތަކާ ގުޅޭގޮތުން ވާހަކަދައްކަވަމުން ރައީސް ނަޝީދު ފާހަގަކުރެއްވީ، ސިޔާސީ ޕާޓީއެއްގެ ތެރޭގައި އެފަދަ ޚިޔާލުތަފާތުވުންތައް ހުންނާނެ ކަމަށެވެ. ނަމަވެސް، މިވަގުތު އެމްޑީޕީން އެންމެ ބޮޑު އިސްކަމެއް ދޭންވީ މިހާރު އޮތް ސަރުކާރު ޖަވާބުދާރީ ކުރުވުމަށް ކަމަށް އެމަނިކުފާނު ވިދާޅުވިއެވެ.

މީގެއިތުރުން، ޤައުމުގެ މިހާރުގެ ޙާލަތަށް އަލިއަޅުއްވާލައްވަމުން ރައީސް ނަޝީދު ވިދާޅުވީ، ތަކެތީގެ އަގު އިންތިހާއަށް އުފުލި، ޑޮލަރުގެ ދަތިކަން ބޮޑުވެ، ރައްޔިތުންގެ ކަންބޮޑުވުންތައް އިންތިހާއަށް އިތުރުވަމުންދާ ކަމަށެވެ. އަދި މަޖިލިސް މެންބަރުން ސަރުކާރާ ދުރުވަމުންދާ މަންޒަރު ފެންނަމުންދާ ކަމަށާއި، މިފަދަ ދަނޑިވަޅެއްގައި ސަރުކާރު ޒިންމާދާރުކުރުވުމަކީ އިދިކޮޅު ފަރާތްތަކުން އެންމެ ބޮޑު ސަމާލުކަމެއް ދޭންޖެހޭ ކަންތައް ކަމުގައި އެމަނިކުފާނު ފާހަގަކުރެއްވިއެވެ.

ކުރީގެ ރައީސް އިބްރާހީމް މުޙައްމަދު ޞާލިޙް 2028 ގެ ރިޔާސީ އިންތިޚާބަށް އެމްޑީޕީގެ ކެންޑިޑޭޓަކު ކަނޑައެޅުމަށް ބާއްވާ ޕްރައިމަރީގައި ވާދަކުރައްވަން ނިންމަވާފައިވާކަމަށް އެމަނިކްފާނުގެ އަރިސް ބޭފުޅުން ވަނީ މައުލޫމާތު ލިބިފައެވެ. ރައީސް ސޯލިހްގެ އިތުރުން އެމްޑީޕީގެ ރައީސް ޢަބްދުالله ޝާހިދު ވެސް ރިޔާސީ ރޭހަށް ނިކުންނެވުމަށް ދަނީ ތައްޔާރުވަމުންނެވެ.