ޓެކްސްތައް ބޮޑު ކުރުމުގެ ވިސްނުމެއް މި ސަރުކާރުން ނުގެންގުޅެން: ވަޒީރު ޝަފީޤު

ރައްޔިތުން އަތުން ނަގާ ޓެކްސްތައް ބޮޑުކުރުމުގެ ވިސްނުމެއް މި ސަރުކާރުގެ ނެތް ކަމަށް މާލީ ވަޒީރު ޑރ. ޢަބްދުالله ޝަފީގު ވިދާޅުވެއްޖެއެވެ.

މިނިސްޓްރީ އޮފް ފިނޭންސްއިން ފޮނުއްވާފައިވާ ކުއާޓަލީ ޑެޓް ބުލެޓިން، ފިސްކަލް ސްޓްރެޓަޖީ އަންގައިދޭ ބަޔާން އަދި މެދުރާސްތާގެ ދަރަނީގެ ސްޓްރެޓަޖީ އަންގައިދޭ ބަޔާނާ ގުޅޭގޮތުން އެ މިނިސްޓްރީގެ އިސް ބޭފުޅުން ވަނީ ރައްޔިތުންގެ މަޖިލީހުގެ މާލިއްޔަތު ކޮމިޓީއަށް މިއަދު ހާޒިރުކޮށްފައެވެ.

އަދި މިއަދު ކޮމިޓީ ބައްދަލުވުމުގައި، އިދިކޮޅު އެމްޑީޕީއަށް ނިސްބަތްވެވަޑައިގަންނަވާ ހަނިމާދޫ ދާއިރާގެ މެންބަރު އަބްދުލްޣަފޫރު އެއާޕޯޓް ޓެކްސް އާއި ޑިވޮލަޕްމަންޓް ފީ އާއި ގުޅިގެން ކުރެއްވި ސުވާލަށް ޖަވާބު ދެއްވަމުން ވަޒީރު ވިދާޅުވީ، މި ސަރުކާރުގެ ވިސްނުމަކީ ޓެކްސް ތަކާއި ފީ ތަކުން ރައްޔިތުންނަށް އޭގެ ބުރައެއް ނުވާ ގޮތަށް ކުރިއަށް ގެންދިޔުން ކަމަށެވެ.

މިގޮތުން ބަލާއިރު، ޖީއެސްޓީ، ޓީޖީއެސްޓީ، ބީޕީޓީ، ވިތްހޯލްޑިންގ ޓެކްސް، މިފަދަ ޓެކްސްތައް ބޮޑުކުރުމުގެ ވިސްނުމެއް ސަރުކާރުން ނުގެންގުޅޭ.

މާލީ ވަޒީރު ޑރ. ޢަބްދުالله ޝަފީގު

މިއާއެކު ވަޒީރު ވިދާޅުވީ، 2023 ވަނަ އަހަރުގެ ޖަނަވަރީ މަހުން ފެށިގެން ޓެކްސް ރޭޓްތަކެއް ބޮޑު ކޮށްފައުވާ ކަމަށެވެ. އެހެންނަމަވެސް ސަރުކާރުން އެފަދަ ވިސްނުމެއް ނުގެންގުޅޭ ކަމަށާ ސަރުކާރުގެ ވިސްނުމަކީ ޓެކްސް ބޭސް ފުޅާކޮށް އެއިން ދައުލަތައް ލިބޭ އާމްދަނީ ވޭހާވެސް ބޮޑުކުރުން ކަމަށް ވަޒީރު ވިދާޅުވިއެވެ.

“މީގެ އިތުރުން ބައެއް ފީ ތަކުގެ ވާހަކަ އަޅުގަނޑުމެން މި ދައްކަނީ، ދައްކަންޖެހިފައި ހުރި ބޮޑެތި ދަރަނިތަކެއް އެބަހުރި، އެ ދަރަނި ތަކަކީ ޑޮލަރުން ދައްކަންޖެހޭ ދަރަނި ތަކެއް. އެއަށް ބޭނުންވާ ބަފަރ އެއް ސޮވެރެން ޑިވޮލަޕްމަންޓް ފަންޑަށް ބިލްޑް ކުރެވޭ ގޮތަށް އެ އަމާޒުގައި މަސައްކަތް ކުރުމަކީ  ކޮންމެ ދިވެހި ރައްޔިތަކުވެސް ބޭނުންވާނެ ކަމެއް. އެކަން ވާންއޮތީ ސޮވެރެން ޑިވެލަޕްމަންޓް ފަންޑަށް ޖަމާކުރެވޭ ޑޮލަރު އިތުރުކޮށްގެން.”

މާލީ ވަޒީރު ޑރ. ޢަބްދުالله ޝަފީގު

މީގެ އިތުރުން ވަޒީރު ވިދާޅުވީ، ތެލަށްވާ ފައިސާ އާއި ބޭރުގެ ތަންތަނުން ސިއްޙީ ހިދުމަތް ހޯދުމަށް އާސަންދައިންވެސް ދައްކަންޖެހެނީ ޑޮލަރުން ކަމަށްވާއިރު ބޭރުފައިސާ ހޯދުމަކީ މިހާރުން މިހާރަށް ކުރަންޖެހުފައިވާ ކަމެއް ކަމަށެވެ.

އެހެންކަމުން، އެކަމަށްޓަކައި ފީތައް ބައްޓަން ކުރައްވާފައިވާ ކަމަށާ، އެހެން ނަމަވެސް ފީތައް ނަގަން ފެށުމުގެ ކުރިން ކަމާއިބެހޭ އިދާރާތަކާއި މަޝްވަރާ ކުރައްވައި މުޖުތަމަޢުއަށް އެންމެ ފައިދާވާ ގޮތަށް އެކަން ބައްޓަންކުރައްވާނެ ކަމަށް ވަޒީރު ވިދާޅުވިއެވެ.