ގަތަރު އެއާވޭސްގެ ދަތުރުތައް އޭޕްރީލް 8 ގައި އަލުން ރާއްޖެއަށް ފަށަނީ

މެދުއިރުމަތީގެ މަސްރަޙަށް އައި ބަދަލުތަކާ ގުޅިގެން މެދުކަނޑާލާފައި އޮތް ގަތަރު އެއާވޭސްގެ ދަތުރުތައް، އަންނަ ބުދަ ދުވަހުން ފެށިގެން އަލުން ރާއްޖެއަށް ފެށުމަށް އެ އެއާލައިނުން ނިންމައިފިއެވެ.

މި ނިންމުމާއެކު ދޯހާ އާއި މާލެއާ ދެމެދު ކުރިއަށްދާ ވައިގެ ދަތުރުފަތުރުގެ ގުޅުން އަލުން އިއާދަވެގެންދާނެއެވެ.

އާ ތާވަލުގައިވާ ގޮތުން، އޭޕްރީލް 8 އިން ފެށިގެން ހަފްތާއަކު ފަސް ފްލައިޓް ރާއްޖެއަށް ބޭއްވުމަށް ވަނީ ހަމަޖެހިފައެވެ. މި ވަގުތީ ތާވަލު އޭޕްރީލް 15 ގެ ނިޔަލަށް ދެމިއޮންނާނެ ކަމަށާއި، އޭގެ ފަހުގެ ތާވަލު ކުރިއަށް އޮތް ތަނުގައި އިއުލާން ކުރާނެ ކަމަށް އެ އެއާލައިނުން މައުލޫމާތުދެއެވެ. ނަމަވެސް، އޮޕަރޭޝަނަލް ހާލަތަށް އަންނަ ބަދަލުތަކާއެކު ތާވަލަށް ބަދަލު އައުން އެކަށީގެންވާ ކަމަށްވެސް ބުނެފައިވެއެވެ.

ރާއްޖެއިންނާއި ރާއްޖެއަށް ދަތުރު ކުރާ ގިނަ ދަތުރުވެރިން ގަތަރުގެ ދޯހާ ހަމަދު އިންޓަނޭޝަނަލް އެއާޕޯޓްއިން ޓްރާންސިޓްވެއެވެ. އެގޮތުން، ގަތަރު އެއާވޭސް އިން ދަތުރުތައް މެނދުކަނޑާލާފައި އޮތުމުގެ ސަބަބުން ރާއްޖެއަށް އަންނަ ފަތުރުވެރިންގެ އަދަދު ވަނީ ދައްވެފައެވެ. މީގެ އިތުރުން، މެދުއިރުމަތިން ރާއްޖެއަށް އަންނަ އެހެނިހެންވެސް ފާހަގަ ކޮށްލެވޭ އެއާލައިންތަކުންވެސް ރާއްޖެއަށް ކުރާ ދަތުރުތައް ވަނީ މެނދުކަނޑާލާފައެވެ. އޭގެ ތެރޭގައި ނަން މަޝްހޫރު އެމިރޭޓްސްވެސް ހިމެނެއެވެ.

ދަތުރުވެރިންނަށް ލުއިފަސޭހަ ކޮށްދިނުމުގެ ގޮތުން، 15 ޖޫން 2026 ގެ ނިޔަލަށް ޓިކެޓް ނަގާފައިވާ ފަރާތްތަކަށް ފްލެކްސިބަލް ރީބުކިންގް ޕޮލިސީއެއްގެ ދަށުން ބަދަލުތައް ގެނައުމުގެ ފުރުސަތު ވަނީ ހުޅުވާލާފައެވެ. އަދި އޮޕަރޭޝަނަލް ބަދަލުތައް އައުން އެކަށީގެންވާތީ، ކޮންފާމްޑް ޓިކެޓެއް އޮތް ފަރާތްތަކުން ނޫނީ ދަތުރު ނުކުރުމަށް އެއާލައިނުން ވަނީ އިރުޝާދު ދީފައެވެ.