400 މިލިއަން ޑޮލަރުގެ ދަރަނި: ”ޕާޓީތައް ގުޅިގެން އިންޑިއާ އާއެކު މަޝްވަރާކުރުމުން ކާމިޔާބުވުމުގެ ފުރުސަތު ބޮޑުވާނެ“

މިމަހު އިންޑިޔާއަށް ދައްކަންޖެހޭ 400 މިލިއަން ޑޮލަރު ދެއްކުން ފަސްކުރުމާ ގުޅޭގޮތުން، ހުރިހާ ޕާޓީތައް ގުޅިގެން އިންޑިޔާއާއެކު މަޝްވަރާކޮށްފިނަމަ، އެކަން ކާމިޔާބުވުމުގެ ފުރުސަތު ބޮޑުވާނެ ކަމަށް ކުރީގެ ރައީސް މުޙައްމަދު ނަޝީދު ވިދާޅުވެއްޖެއެވެ.

ރައީސް ނަޝީދު މިހެން ވިދާޅުވީ އެމަނިކުފާނު އެކްސްގައި ކުރެއްވި ޕޯސްޓެއްގައެވެ.

ނަޝީދު ވިދާޅުވި ގޮތުގައި އިންޑިއާއިން ރާއްޖެއަށް ދީފައިވާ 400 މިލިއަން ޑޮލަރުގެ ދަރަނި މި އޭޕްރީލް މަހުގެ ތެރޭގައި އަނބުރާ ދައްކަންޖެހެއެވެ. މި ފައިސާ އަނބުރާ ދެއްކުން މިހާތަނަށް ދެ ފަހަރެއްގެ މަތިން ލަސްކޮށްދީފައިވާއިރު، ތިންވަނަ ފަހަރަށް އެ މުއްދަތު ލަސްކޮށްދިނުމަކީ އިންޑިއާގެ މާލީ ގަވާއިދުތައް ތަންދޭ ކަމެއް ނޫން ކަމަށް އެ ގައުމުގެ ނޫސްތަކުން ބުނަމުންދާ ކަމަށްވެސް އެމަނިކުފާނު ވިދާޅުވިއެވެ.

ރާއްޖޭގެ މާލީ ހާލަތަށް އަލިއަޅުއްވާލައްވަމުން ނަޝީދު ވިދާޅުވީ، 550 މިލިއަން ޑޮލަރުގެ ސުކޫކް ބޮންޑުގެ ފައިސާވެސް މި މަހުގެ ތެރޭގައި ސަރުކާރުން ދައްކާފައިވާ ކަމަށެވެ. ނަމަވެސް، މިވަގުތު ރާއްޖޭގެ ޑޮލަރު ރިޒާވްގައި ފައިސާ ނެތްކަމަށް އެމަނިކުފާނު ވިދާޅުވިއެވެ.

ރާއްޖެއިން ދަރަނި ނުދެއްކި "ޑިފޯލްޓް" ވެއްޖެނަމަ، މުޅި މާލީ ނިޒާމަށާއި، ސަރުކާރަށާއި އަދި އަމިއްލަ ވިޔަފާރިތަކަށް އޭގެ ނޭދެވޭ އަސަރު ވަރަށް ބޮޑަށް ކުރާނެ ކަމަށްވެސް ނަޝީދު ވިދާޅުވިއެވެ.

ނަޝީދު އިތުރަށް ވިދާޅުވީ، އެމަނިކުފާނާ އެމްޑީޕީގެ ކުރީގެ ޗެއާޕާސަން ފައްޔާޒް އިސްމާއީލް ގުޅިގެން ހުށަހަޅާފައިވާ "ބޮޑު ބަދަލު" އިސްލާހީ ފިޔަވަޅުތަކުގެ އެންމެ މުހިންމު އެއް ބޭނުމަކީ ދަރަނީގެ ކަންކަމާ ގުޅޭގޮތުން ފުޅާ ދާއިރާއެއްގައި މަޝްވަރާކުރުން ކަމަށެވެ.

"އިންޑިއާ ސަރުކާރާއެކު ދައްކާ ވާހަކައަކީ ހުރިހާ ޕާޓީއެއް އެއްބަސްވެގެން ދެކެވޭ ވާހަކައަކަށް ވެއްޖެނަމަ، އެ ވާހަކަތައް ކާމިޔާބުވުމުގެ ފުރުސަތު ބޮޑުވާނެ،" ރައީސް ނަޝީދު ވިދާޅުވިއެވެ.

ނަޝީދު ވަނީ މި މައްސަލައިގައި ސަރުކާރުން މަޝްވަރާގެ މޭޒަށް އައުމަށް އެދިވަޑައިގެންފައެވެ.