އަންނަ އަހަރަށް ލަފާކުރާ ދައުލަތުގެ ބަޖެޓް ހުށަހެޅުން މިއަދު މެންދުރުފަހު

ކުރިއަށްއޮތް 2026 ވަނަ އަހަރަށް ލަފާކުރާ ދައުލަތުގެ ބަޖެޓް ހުށަހެޅުން މިއަދު މެންދުރުފަހަށް ތާވަލްކޮށްފިއެވެ.

ކުރިން މިއަދު ހެނދުނަށް ބަޖެޓް ހުށަހެޅުމަށް ތައްޔާރުވަމުންދާކަމަށް ހަބަރު ފެތުރުނު ނަމަވެސް ފިނޭންސުން ވަނީ އެކަން ދޮގުކޮށްފައެވެ. އެގޮތުން ބަޖެޓް ހުށަހެޅުމަށް ނިންމާފައިވަނީ މެންދުރުފަހު 14:00 ގައިކަމަށް އެ ވުޒާރާއިން ބުނެއެވެ.

އަންނައަހަރަށް ލަފާކުރާ ދައުލަތުގެ ބަޖެޓް ހުށަހެޅުމަށް މާލީ ވުޒާރާއިން ތައްޔާރުވަމުންދާއިރު، އަންނަ އަހަރުގެ ބަޖެޓްގައި މައިގަނޑު  އިސްކަމެއް ދޭނީ ސިއްހީ އަދި ތައުލީމީ ދާއިރާއަށްކަމަށް ރައީސް ޑރ.މުހައްމަދު މުއިއްޒު ވަނީ ވިދާޅުވެފައެވެ. ސަރުކާރުން މިއަހަރަށް ކަނޑައެޅި ބަޖެޓް ހާއްސަކޮށްފައިވަނީ ބޯހިޔާވަހިކަމަށެވެ. އެގޮތުން ސަރުކާރުން ވަނީ އަތްފޯރާ އަގެއްގައި ބޯހިޔާވަހިކަން ފޯރުކޮށްދިނުމަށް ހާއްސަ މަސައްކަތްތަކެއް ފަށާފައެވެ. މި މަސައްކަތްތަކުގެ ދަށުން މަރުކަޒީ ބޭންކުން ވަނީ ރާއްޖޭގެ ވިޔަފާރި ބޭންކްތައް މެދުވެރިކޮށް، ހެޔޮއަގުގައި ގޯތި ގެދޮރު ގަންނަން ލިބޭ ސްކީމެއް ތައާރަފްކުރުމަށް ނިންމާފައިވާކަން ހާމަކޮށްފައެވެ.

ސަރުކާރުން މިއަހަރަށް ފާސްކޮށްފައިވަނީ، 56.6 ބިލިއަން ރުފިޔާގެ ބަޖެޓެކެވެ. މިއަހަރަށް ލަފާކުރި ބަޖެޓްގައި ރިކަރަންޓް ޚަރަދުގެ ގޮތުގައި 35.9 ބިލިއަން ރުފިޔާއާއި ކެޕިޓަލް ޚަރަދުގެ ގޮތުގައި 13.3 ބިލިއަން ރުފިޔާ ވަނީ ކަނޑައަޅާފައެވެ. ޖުމުލަ އާމްދަނީއާއި ހިލޭ އެހީ 39.8 ބިލިއަން ރުފިޔާއަށް އަރާނެ ކަމަށްވަނީ އަންދާޒާކޮށްފައެވެ. އެއީ، ހިލޭ އެހީގެ ގޮތުގައި 2.5 ބިލިއަން ރުފިޔާ ހިމަނައިގެންނެވެ.

ދަރަނި އަނބުރާ ދައްކަން މި އަހަރުގެ ބަޖެޓުގައި 3.9 ބިލިއަން ރުފިޔާ ވަނީ ހިމެނިނަމަވެސް އަހަރުގެ މިހާތަނަށް ދަރަނި ދެއްކުމަށް 4.4 ބިލިއަން ރުފިޔާ ވަނީ ހޭދަކޮށްފައެވެ. ކުރިއަށްއޮތް އަހަރު ވެގެންދާނީ ރާއްޖޭގެ ތާރީހުގައިވެސް އެންމެ ބޮޑު އަދަދަކުން ދަރަނިތައް ދައްކަންޖެހޭނެ އަހަރަށްކަމަށް މާލީ ވުޒާރާއިން ވަނީ ބުނެފައެވެ. ކުރީ ސަރުކާރުތަކުން ބޭރުގެ އެކި ފަރާތްތަކުން ނަގާފައިވާ ކުރު މުއްދަތުގެ ލޯނުތަކުގެ އިންޓަރެސްޓާއެކު 1 ބިލިއަނަށްވުރެ ގިނަ ޑޮލަރު ދައްކަންޖެހޭަނޭކަމަށް މާލީ ވުޒާރާއިން ފާހަގަކުރެއެވެ. އެއީ ދިވެހި ރުފިޔާއިން ބަލާނަމަ 15 ބިލިއަނަށްވުރެ ގިނަ ރުފިޔާއެވެ. އެހެންކަމުން އަންނަ އަހަރުގެ ބަޖެޓް އެކުލަވާލުމުގައި ފިނޭންސް މިނިސްޓްރީން މިކަމަށް ވަރަށްބޮޑު އިސްކަމެއްދޭނޭކަމަށް އިގްތިސާދީ ފަރާތްތަކުން ފާހަގަކުރެއެވެ.