މޮރިޝަސް އިން ރާއްޖެއާ ގުޅުން ބަދަހިކުރަން އޮތީ ތައްޔާރަށް: ރައީސް ނަޝީދު

ޗާގޯސް މައްސަލާގައި މޮރިޝަސްއިން ރާއްޖެއާ ސިޔާސީ ގުޅުން ކަނޑާލިނަމަވެސް ގުޅުން އަލުން ބަދަހިކުރަން އެޤައުމުން ތައްޔާރަށް އޮތްކަމަށް ކުރީގެ ރައީސް މުހައްމަދު ނަޝީދު ވިދާޅުވެއްޖެއެވެ.

އިންޑިއާގައި ކުރިއަށްދިޔަ އިންޑިއަން އޯޝަން ޑައިލޮގް ބައްދަލުވުން ނިންމަވާކެއްވުމަށްފަހު އެނބުރި ރާއްޖެ ވަޑައިގަތުމަށްފަހު އެއާޕޯޓްގައި ނޫސްވެރިންނާ ވާހަކަދައްކަވަމުން ރައީސް ނަޝީދު ވަނީ މި ދަތުރުފުޅުގައި މައިގަނޑު ދެ ކަމެއް ފާހަގަކުރެވިގެން ދިޔަކަމަށެވެ. އެގޮތުން ބައްދަލުވުމުގައި މޮރިޝަސްގެ ހާރިޖީ ވަޒީރާ ބައްދަލުވެ ވަޑައިގެންނެވިކަމަށް ނަޝީދު ވިދާޅުވިއެވެ.

މި ބައްދަލުވުމުގައި ޑިޕްލޮމެޓިކް ގުޅުން ކަނޑާލާފައިވާ ދެ ޤައުމުގެ ގުޅުން ބަދަހިކުރުމުގެ މުހިންމުކަމާ ބެހޭގޮތުން ވާހަކަ ދެކެވުނުކަމަށް ރައީސް ނަޝިދު ވިދާޅުވިއެވެ.

އަޅުގަނޑު ވަރަށް ބޮޑަށް މިނިސްޓަރަށް ވެސް ދެންނެވިން ދިވެހިރާއްޖެއާ މިކަމުގަ ވާހަކަ ދައްކާ ދެގައުމު ސުލްހަވެރި ގޮތުގަ ކަންތައްތައް ނިންމޭނެ ގޮތެއް ހޯދުން. ދެން އެއްވެސް ހާލެއްގަ އަވަށްޓެރި ގައުމުތަކާ އެހެން ޑިޕްލޮމެޓިކް ގުޅުން ނެތުމަކީ ރަނގަޅުކަމެއް ނޫން. ދެން އެބޭފުޅުން ތިއްބެވީ ތައްޔާރަށް

ރައީސް މުހައްމަދު ނަޝީދު

ރައީސް ނަޝީދު ވިދާޅުވީ ދިވެހި ސަރުކާރުން މި ފުރުސަތުގެ ބޭނުން ހިފައިގެން މޮރިޝަސް ސަރުކާރާއެކު ވާހަކަތައް ކުރިއަށްގެންދާނެ ކަމަށް އުއްމީދުކުރާ ކަމަށެވެ.

މޮރިޝަސްއިން ރާއްޖެއާ ސިޔާސީގުޅުން ކަނޑާލާފައިވަނީ، މިއަހަރުގެ ފެބުރުއަރީމަހުގެ ތެރޭގައެވެ. އެޤައުމުން ރާއްޖެއާ ސިޔާސީގުޅުން ކަނޑާލާފައިވަނީ، ޗާގޯސް ލިބުން އެންމެ ހައްގުކަންބޮޑީ ރާއްޖެއަށް ކަމަށް ބުނެ އަދުގެ ސަރުކާރުން ވަކާލާތު ކުރާތީއެވެ. މީގެ އިތުރުން އިނގިރޭސިވިލާތާއި މޮރިޝަސްއާ ދެމެދު ވެފައިވާ އެއްބަސްވުމަށް ރާއްޖެއިން އިއުތިރާޒު ކުރަން ފެށުމަކީ ގުޅުން ކަނޑާލަން ޖެހުނު މައިގަނޑު ސަބަބު ކަމަށްވެސް މޮރިޝަސްއިން ވަނީ ބުނެފައެވެ.

ރާއްޖެ އާއި މޮރިޝަސްއާ ދެމެދު ހާރިޖީ ގުޅުން ގާއިމްކުރީ 15 ޖެނުއަރީ 1981ގަ އެވެ. އެ ގައުމަށް ރާއްޖެއިން ކަނޑައަޅާފައި ހުންނަނީ ސްރީލަންކާގައި ހުންނަވާ ދިވެހި ސަފީރު މަސްއޫދު އިމާދެވެ.