ހުޅުމާލޭގައި ބިނާކުރާ، ޤައުމީ ސްޓޭޑިއަމްގެ އަމަލީ މަސައްކަތް އަންނަ އަހަރުގެ ތެރޭގައި ފަށަނީ
ލިޔުންތެރިޔާ
އަބްދުﷲ ހުސައިން
ހުޅުމާލޭގައި ބިނާކުރުމަށް ހަމަޖެހިފައިވާ ޤައުމީ ފުޓްބޯޅަ ސްޓޭޑިއަމްގެ އަމަލީ މަސައްކަތް އަންނަ އަހަރުގެ ތެރޭގައި ފެށގެންދާނޭކަމަށް ސްޕޯޓްސް މިނިސްޓަރު އަބްދުالله ރާފިއު ވިދާޅުވެއްޖެއެވެ.
މިއަދު ބޭއްވި ނޫސްވެރިންގެ ބައްދަލުވުމުގައި ނޫސްވެރިއަކު ކުރި ސުވާލަކަށް ޖަވާބުދެއްވަމުން މިނިސްޓަރު ވިދާޅުވީ، ފުޓްބޯޅަ ސްޓޭޑިއަމެއް ބިނާކުރުމަކީ ވަރަށް ބޮޑު ބަޖެޓެއް ލިބިގެން ނޫނީ ކުރެވޭނެ ކަމެއް ނޫންކަމަށާއި، ސްޓޭޑިއަމް އެޅުމަށްޓަކައި ކުރަންޖެހޭ މަސައްކަތްތައް ކުރިއަށްދާކަމަށެވެ.
ސަރުކާރުން ނިންމާފައިވަނީ ޤައުމީ ފުޓްބޯޅަ ސްޓޭޑިއަމް ގަލޮޅު ދަނޑުހުރިތަނުގެ ބަދަލުގައި ހުޅުމާލެ ފޭސް އެކެއްގައި ބިނާކުރާށެވެ. މިނިސްޓަރު ވިދާޅުވީ ދަނޑު ބިނާކުރުމާ ގުޅޭގޮތުން ޗައިނާ އަދި ސައުދީގެ ކަމާބެހޭ ފަރާތްތަކާއެު މުއާމަލާތް ކުރަމުންގެންދާކަމަށެވެ. މިހާރު ވާހަކަތައް ކުރިއަށްދާގޮތުން ނަމަ ކަރުދާހުގެ މަސައްކަތް ނިމި އަންނަ އަހަރުގެ ތެރޭގައި ސްޓޭޑިއަމްގެ އަމަލީ މަސައްކަތް ފެށިގެންދާނޭކަމަށް މިނިސްޓަރު ރާފިއު ވިދާޅުވިއެވެ.
މިނިސްޓަރު ވިދާޅުވީ ކުރިއަށްއޮތް ތަނުގައި ގަލޮޅު ދަނޑު ފެނިގެންދާނީ ކުޅިވަރުތައް ކުޅެވޭނޭފަދަ ތަނެއްގެ ގޮތުގައެވެ. ގަލޮޅު ދަނޑު ވަރަށްބޮޑަށް ބާވެފައިވާއިރު ވެމްކޯއާ ގުޅިގެން އެތަން ތަޅާލުމުގެ މަސައްްކަތް ވަރަށް އަވަހަށް ފެށިގެންދާނޭކަމަށްވެސް މިނިސްޓަރު ރާފިއު ވިދާޅުވިއެވެ.
ވެމްކޯއާ ވާހަކަ ދެކެވިގެން އެބަދޭ، އެބޭފުޅުން އެކަން ކޮށްދެއްވާ ގޮތަށް ތިބީ. އެހެންވީމަ އިރާދަކުރެއްވިއްޔާ ދާދިއަވަހަށް އަޅުގަނޑުމެން މީ އެ ވީރާނާ އެންމެ ބޮޑަށް ވެފަ އޮތް ހިސާބު އަޅުގަނޑުމެން މީ ޑިމޮލިޝް ކުރުމުގެ މަސައްކަތް ވަރަށް އަވަހަށް އަޅުގަނޑުމެން ފަށާނެ
މިނިސްޓަރު ރާފިއު
މިދިޔަ ސަރުކާރުގެ ދުވަސްވަރުވެސް ގަލޮޅު ދަނޑުހުރިތަނުގައި އާ ސްޓޭޑިއަމެއް އެޅުމުގެ ވާހަކަދެކެވުނެވެ. އެގޮތުން ގަލޮޅު ދަނޑުގައި އެޅުމަށް ނިންމި އާ ސްޓޭޑިއަމްގެ ކުރެހުންތައްވެސް މިދިޔަ ވެރިކަމުގައި އޭރު ކުޅިވަރާ ބެހޭ މިނިސްޓަރު އަހުމަދު މަހްލޫފް ވަނީ ދައްކާލާފައެވެ.
އޭރު މިނިސްޓަރު މަހްލޫފް ވިދާޅުވެފައިވަނީ ގަލޮޅު ދަނޑު ހުރިތަނުގައި އާ ސްޓޭޑިއަމެއް އެޅުމަށް ނިންމާފައިވަނީ، އިންޑިއާގެ ލައިން އޮފް ކްރެޑިޓް (އެލްއޯސީ) ގެ ދަށުން ބަޖެޓު ކުރެވިގެން ކަމަށެވެ. ކުރީ ސަރުކާރުން އޭރު ބުނެފައިވަނީ އާ ސްޓޭޑިއަމް ހެދުމަށް 42 މިލިއަން ޑޮލަރު އިންޑިއާގެ އެހީގައި ހަމަޖެހިފައިވާކަމަށެވެ.
ޤައުމީ ފުޓްބޯޅަ ސްޓޭޑިއަމް ހުޅުމާލޭގައި ބިނާކުރުމަށް ނިންމާފައިވާކަން މި ސަރުކާރުން ހާމަކުރީ މިއަހަރުގެ ޖެނުއަރީމަހުގެ ތެރޭގައެވެ. ޕަބްލިކް ސާވިސް މީޑިއާ އާ ވާހަކަދައްކަވަމުން ސްޕޯޓްސް މިނިސްޓަރު ރާފިއު ވިދާޅުވީ، ގަލޮޅު ދަނޑަކީ ރާއްޖޭގެ ތާރީޚާ ވަރަށް ބޮޑު ގުޅުމެއް އޮތް ތަނެއް ކަމަށެވެ.
އެހެން ނަމަވެސް، އެތަނަކީ ބައިނަލްއަޤުވާމީ ސްޓޭޑިއަމް އެއްގެ ސިފައިގައި ގާއިމް ކުރަން އެންމެ އެދެވޭ ތަން ނޫން ކަމަށާއި ސަރުކާރުގެ ސިޔާސަތަކީ ޤައުމީ ސްޓޭޑިއަމް ހުޅުމާލެ ފޭސް އެކަކަށް ބަދަލުކުރުން ކަމަށެވެ.
މި ލިޔުން ކަމުދިޔަނަމަ، ލައިކެއް ދެއްވާ
ކޮމެންޓް ކުރޭ
ކޮމެންޓްސް
މިހާތަނަށް ކޮމެންޓެއް ނެތް
