ޢާއިލީ ތަރައްޤީއާ ބެހޭ ވުޒާރާއަށް ޖެނުވަރީ މަހު 64 ކުޑަކުދިންގެ އަނިޔާގެ މައްސަލަ
މި އަހަރުގެ ޖެނުވަރީ މަހު އިޖުތިމާޢީ އަދި ޢާއިލީ ތަރައްޤީއާ ބެހޭ ވުޒާރާއަށް ކުޑަކުދިންނަށް ކުރާ އެކި ބާވަތުގެ އަނިޔާއާ ގުޅޭ 64 މައްސަލައެއް ރިޕޯޓުކޮށްފައިވާ ކަމަށް އެ ވުޒާރާގެ ތަފާސްހިސާބުތަކުން ދައްކައިފިއެވެ.
މި މައްސަލަތަކުގެ ތެރެއިން އެންމެ ގިނައީ އިހުމާލުވުމުގެ މައްސަލަތަކެވެ. އެގޮތުން އިހުމާލުވުމުގެ 30 މައްސަލައެއް ރިޕޯޓުކޮށްފައިވާއިރު، އޭގެ ތެރޭގައި ހިމެނެނީ 19 ފިރިހެން ކުދިންނާއި 11 އަންހެން ކުދިންނެވެ. ދެވަނައަށް އެންމެ ގިނައިން ރިޕޯޓުކޮށްފައިވަނީ ޖިންސީ ހާނިއްކައިގެ މައްސަލަތަކެވެ. މި ބާވަތުގެ 13 މައްސަލައެއް ރިޕޯޓުކޮށްފައިވާއިރު، އޭގެ ތެރޭގައި 11 އަންހެން ކުދިންނާއި 2 ފިރިހެން ކުދިން ހިމެނެއެވެ.
މީގެ އިތުރުން، ގެވެށި އަނިޔާގެ އަމަލެއް ކުރާތަން ކުއްޖަކަށް ފެނުމުގެ 8 މައްސަލައާއި، ނަފްސާނީ ހާނިއްކައިގެ 7 މައްސަލައާއި، ޖިސްމާނީ ހާނިއްކައިގެ 4 މައްސަލަ ވެސް ވަނީ ހުށަހެޅިފައެވެ. އަދި ބްލެކްމެއިލް ކުރުމާއި ބަދުއަޚްލާގީ ވީޑިއޯއާ ގުޅުންހުރި މައްސަލަތައް ވެސް މި މަހުގެ ތަފާސްހިސާބުގައި ހިމެނެއެވެ.
ކުދިންގެ އަޚްލާގީ އަދި އާއިލީ މައްސަލަތައް:
ކުޑަކުދިންގެ އަޚްލާގީ މައްސަލަތަކާ ގުޅޭ 21 މައްސަލައެއް ޖެނުވަރީ މަހު ވަނީ ރިޕޯޓުކޮށްފައެވެ. މީގެ ތެރެއިން އެންމެ ގިނައީ ސްކޫލަށް ދާން ބޭނުން ނުވުމުގެ މައްސަލަތަކެވެ. އާއިލީ މައްސަލަތަކަށް ބަލާއިރު، ޖުމްލަ 46 މައްސަލައެއް ރިޕޯޓުކޮށްފައިވާއިރު، މީގެ ތެރޭގައި ކުދިން ބެލުމުގައި ޖެހޭ މައްސަލަތަކާއި، ހަޟާނާގެ މައްސަލަތަކުގެ އިތުރުން ދަރިންގެ ޚަރަދު ދިނުމުގެ މައްސަލަތައް ހިމެނެއެވެ.
ވަކި ޖިންސަކަށް ވީތީ ކުރާ އަނިޔާ:
ޖެނުވަރީ މަހު ވަކި ޖިންސަކަށް ވީތީ ކުރާ އަނިޔާ އަދި ގެވެށި އަނިޔާގެ 45 މައްސަލައެއް ވަނީ ހުށަހެޅިފައެވެ. މީގެ ތެރެއިން އެންމެ ގިނައީ ޖިސްމާނީ އަނިޔާކުރުމުގެ މައްސަލަތަކެވެ. މި ބާވަތުގެ މައްސަލަތައް އެންމެ ގިނައިން ރިޕޯޓުކޮށްފައިވަނީ އަންހެނުންނަށް ކުރާ އަނިޔާތަކާ ގުޅިގެންނެވެ.
އެހީތެރިކަމާއި ރައްކާތެރިކަން:
ނުކުޅެދުންތެރިކަން ހުންނަ ފަރާތްތަކާއި އުމުރުން ދުވަސްވީ މީހުންނަށް އަޅައިލުމުގެ 8 މައްސަލައަކާއި، އިޖުތިމާޢީ އެހީތެރިކަން ފޯރުކޮށްދިނުމާ ގުޅޭ 7 މައްސަލައެއް ވެސް ވަނީ ރިޕޯޓުކޮށްފައެވެ.
2026 ޖެނުވަރީ 31 ގެ ނިޔަލަށް ދައުލަތުގެ ބެލުމުގެ ދަށުގައި ޖުމްލަ 151 ކުދިން ތިބި އިރު، މި މަހުގެ ތެރޭގައި އެއް ކުއްޖަކު ވަނީ އަލުން އާއިލާއާ ހަވާލުކުރެވިފައެވެ. އަދި 3 ކުއްޖަކަށް ވަނީ ވަޒީފާގެ ފުރުޞަތު ހޯދައިދެވިފައެވެ.
މި މައްސަލަތަކާ ގުޅިގެން ވުޒާރާގެ ހެލްޕްލައިންތަކަށް ޖުމްލަ 2292 ކޯލު ލިބިފައިވާ އިރު، 62 ފަރާތަކަށް ކައުންސިލިން ސެޝަންތައް ވަނީ ފޯރުކޮށްދީފައެވެ. މި ސަރުކާރުން އަންނަނީ އިޖުތިމާޢީ ރައްކާތެރިކަން ކަށަވަރުކުރުމަށް ގިނަ މަސައްކަތްތަކެއް ކުރަމުންނެވެ.
މި ލިޔުން ކަމުދިޔަނަމަ، ލައިކެއް ދެއްވާ
ކޮމެންޓް ކުރޭ
ކޮމެންޓްސް
މިހާތަނަށް ކޮމެންޓެއް ނެތް
