މަގޫދޫ އާއި ނިލަންދޫ އެއާޕޯޓު ކައިރިކައިރީގައި އޮތުމުން ގެއްލުމެއް ލިބޭނެކަމަކަށް ނުފެނޭ: ވަޒީރު މުއްޠަލިބް

ފ.މަގޫދޫ އާއި ފ.ނިލަންދޫ އެއާޕޯޓު ކައިރިކައިރީގައި އޮތުމުން ގެއްލުމެއް ލިބޭނެކަމަށް ފެނިވަޑައިނުގަންނަވާކަމަށް އިމާރާތްކުރުމާއި ބިނާރާއި ބެހޭ ވަޒީރު ޑރ.ޢަބްދުالله މުއްޠަލިބް ވިދާޅުވެއްޖެއެވެ.

މިއަދު އިމާރާތްކުރުމާއި ބިނާރާއި ބެހޭ ވުޒާރާއިން ބޭއްވި ނޫސްވެރިން ބައްދަލުވުމުގައި ވާހަކުފުޅު ދައްކަވަމުން ވަޒީރު މުއްޠަލިބް ވިދާޅުވީ، މަގޫދޫ އެއާޕޯޓުގެ 75 ޕަސެންޓް ނިމިފައިވާކަމަށާއި، މަގޫދޫ އެއާޕޯޓްގެ މަޝްރޫއު ހުއްޓާލުމަކީ ރައްޔިތުންނަށް ވެސް އަދި އެ ސަރަހައްދުގައި ހުރި ރިސޯޓްތަކަށް ވެސް ފައިދާވާނެ ކަމެއް ނޫންކަމަށެވެ.

އެހެންނަމަވެސް އިންވެސްޓަރުންވެސް މުސްތަގުބަލުގައި އެ ސަރަހައްދުގައި އިންޓަނޭޝަނަލް އެއާޕޯޓެއް ބޭނުންވާކަން ފާހަގަކުރައްވަމުން ވަޒީރު މުއްޠަލިބް ވިދާޅުވީ މަގޫދޫ އެއާޕޯޓުގެ އިތުރުން، ނިލަންދޫގައި އެއާޕޯޓެއް އެޅުމުން ލިބޭނެ ގެއްލުމެއް އޮތް ކަމަށް ފެނިވަޑައިނުގަންނަވާ ކަމަށެވެ.

"މުސްތަގުބަލަށް އެ ސަރަހައްދަށް އިންޓަނޭޝަނަލް އެއާޕޯޓެއް ބޭނުންވާތީއާއި އެކަމަކީ އިންވެސްޓަރުންވެސް އެދޭ ކަމަކަށްވާތީ އަޅުގަނޑަކަށް ނުފެނޭ ނިލަންދޫ އެއާޕޯޓު އެޅުމަށް، ކައިރިކައިރީގައި ދެ އެއާޕޯޓު އޮތުމުން އެކަމުން ލިބޭނެ ގެއްލުމެއް ސީދާ އޮތް ކަމަކަށެއް."

ވަޒީރު މުއްޠަލިބް ވިދާޅުވިއެވެ.

މަގޫދޫއަށް ބަދަލުކުރީ ކުރީގެ ރައީސް ޔާމީން އަބްދުލްޤައްޔޫމްގެ ސަރުކާރުގައި ނިލަންދޫގައި އެޅުމަށް ނިންމާފައިވާ އެއާޕޯޓެއް ކަމަށާއި،މަގޫދޫ އެއާޕޯޓުގެ މަސައްކަތް ވަކި ހިސާބަކަށް ނިމުނުނަމަވެސް، އިންވެސްޓަރުން ބޭނުންވަނީ ނިލަންދޫގައި އިންޓަނޭޝަނަލް އެއާޕޯޓެއް އެޅިގެން ދިޔުންކަމަށް ވަޒީރު ވިދާޅުވިއެވެ. އެހެންކަމުން، އެ ދެ ރަށުގައި އެއާޕޯޓު އެޅިގެން ދިޔުމަކީ ބޭކާރު ކަމެއް ނޫންކަމަށް އެބޭފުޅާ ވިދާޅުވިއެވެ.

ވަޒީރު މުއްޠަލިބް ވިދާޅުވީ، މަގޫދޫ އެއާޕޯޓު އެކި ގޮތްގޮތަށް ބޭނުންކުރެވިދާނެ ކަމަށާއި، އޭގެ ތެރޭގައި ޓްރެއިނިން އެއާޕޯޓެއް ނުވަތަ، އެމްއެންޑީއެފްގެ ޑްރޯން އޮޕަރޭޓް ކުރުމަށް ބޭނުންކުރުންވެސް ހިމެނޭ ކަމަށެވެ.

"އަޅުގަނޑުމެންނަށް މަގޫދޫ އެއާޕޯޓު ބޭނުންކުރެވޭނެ އެހެން ކިތަންމެ ގޮތްތަކެއް އެބަހުރި. ޓްރެއިނިން އެއާޕޯޓްތަކެއް ނޫނީ މިސާލަކަށް މިހާރު އެމްއެންޑީއެފުން ޑްރޯން ގެންގުޅޭއިރު އެބޭފުޅުންވެސް ބޭނުންވޭ ވަކި ހާއްސަ އެއާޕޯޓެއް ޑްރޯން އޮޕަރޭޓް ކުރަންވެސް."

ވަޒީރު މުއްޠަލިބް ވިދާޅުވިއެވެ.

އެހެންކަމުން، ކައިރިކައިރީގައި ދެ އެއާޕޯޓު އެޅުމަކީ އިސްރާފެއް ނޫން ކަމަށާއި، ބޭކާރު ކަމެއްކަމެއް ނޫންކަމަށް ވަޒީރު މުއްޠަލިބް ވިދާޅުވިއެވެ.