އީރާނުގެ ހަމަލާއެއްގައި އެމެރިކާގެ ދެ ސިފައިން މަރުވެއްޖެ؛ ބަދަލުގައި އެމެރިކާގެ ވަރުގަދަ ހަމަލާތަކެއް އީރާނަށް

އުރުދުންގައި ތިބި އެމެރިކާގެ ސިފައިންނަށް އަމާޒުކޮށް އީރާނުން ދިން ބެލިސްޓިކް މިސައިލާއި ޑްރޯން ހަމަލާތަކެއްގައި އެމެރިކާގެ ދެ ސިފައިން މަރުވެ، އެކަކު ގެއްލުމާ ގުޅިގެން، އީރާނަށް އަމާޒުކޮށް އެމެރިކާއިން ވަރުގަދަ ވައިގެ ހަމަލާތަކެއް ދޭން ފަށައިފިއެވެ.

އެމެރިކާގެ ސެންޓްރަލް ކޮމާންޑް (ސެންޓްކޮމް) އިން ހާމަކޮށްފައިވާ ގޮތުގައި، ރައީސް ޑޮނަލްޑް ޓްރަމްޕްގެ އަމުރަށް މި ހަމަލާތައް ދޭން ފަށާފައިވަނީ ހޮނިހިރު ދުވަހުގެ އިރުއޮއްސި 6 ޖެހިއިރުއެވެ.

މި ހަމަލާތަކުގެ މަގްސަދަކީ ހޯރްމޫޒް ކަނޑުއޮޅިން ދަތުރުކުރާ މުދާ އުފުލާ ބޯޓުފަހަރަށް އީރާނުން ދެމުންދާ ނުރައްކާތައް ކުޑަކުރުމާއި، އެމެރިކާ ސިފައިންނަށް ހަމަލާދިން އީރާނުގެ އިސްލާމިކް ރިވޮލިއުޝަނަރީ ގާޑް ކޯޕްސް (އައި.އާރު.ޖީ.ސީ) އަށް އަވަސް އަދަބެއް ދިނުން ކަމަށް ސެންޓްކޮމްއިން ނެރުނު ބަޔާނެއްގައިވެއެވެ.

މިދިޔަ ޖުލައި މަހުގެ 17 ވަނަ ދުވަހު އުރުދުންގައި އީރާނުން ދިން މިސައިލް ހަމަލާތަކުން ދިފާއުވުމަށް މަސައްކަތް ކުރަނިކޮށް އެމެރިކާގެ ދެ ސިފައިން މަރުވެފައިވާ ކަމަށް އަސްކަރިއްޔާއިން ކަށަވަރުކޮށްދެއެވެ. އަދި މި ހަމަލާތަކުގައި އެކަކު ގެއްލިފައިވާއިރު، އަނިޔާވި ބައެއް ސިފައިންނަށް އުރުދުންގެ ހޮސްޕިޓަލްތަކުގައި ފަރުވާދިނުމަށްފަހު މިހާރު ވަނީ ދޫކޮށްލާފައެވެ.

މަރުވި މީހުންގެ ވަނަވަރު ހާމަކުރާނީ އާއިލާތަކަށް އެކަން އެންގުމަށްފަހު 24 ގަޑިއިރު ފަހުން ކަމަށް ސެންޓްކޮމްއިން ބުނެފައިވެއެވެ.

މި ހާދިސާއާ ގުޅިގެން ރައީސް ޑޮނަލްޑް ޓްރަމްޕް ބުނީ، މިއީ ވަރަށް ދެރަ ހާދިސާއެއް ކަމަށާއި، މިފަދަ ކަންކަން ހިނގުމަކީ އެމެރިކާއިން އެދޭ ގޮތެއް ނޫން ކަމަށެވެ.

މި ހަމަލާތަކާ ގުޅިގެން މެދުއިރުމަތީގެ މަސްރަހު އިތުރަށް ގޯސްވެދާނެ ކަމުގެ ބިރު މިހާރު ވަނީ ބޮޑުވެފައެވެ.