ރައްޔިތުން އެދުނު ގޮތަށް މާފަރު ސިއްހީ މަރުކަޒުގެ އެއްބަސްވުން ބަދަލު ކުރާނަން: ރައީސް މުޢިއްޒު
މާފަރުގެ ރައްޔިތުން ބޭނުންވާ ގޮތަށް އެރަށު ސިއްހީ މަރުކަޒުގެ އެއްބަސްވުން ބަދަލު ކުރައްވާނެ ކަމުގެ ޔަގީންކަން ރައީސުލްޖުމްހޫރިއްޔާ ޑރ މުޙައްމަދު މުޢިއްޒު މިއަދު ދެއްވައިފިއެވެ.
މާފަރު ސިއްހީ މަރުކަޒު އަޕްގްރޭޑު ކުރުމުގެ މަސައްކަތް ރޭ ފެނަކަ ކޯޕަރޭޝަނާ ހަވާލު ކުރީ 10 މިލިއަން ރުފިޔާ އަށެވެ.
އެ މަޝްރޫއުގެ ދަށުން 4 އެނދުގެ ވޯޑަކާ އެކު ޕްރައިވެޓް ރޫމަކާއި ނާސް ސްޓޭޝަން އަދި މީޓިން ހޯލާއި ޕަބްލިކް ހެލްތު ޔުނިޓް ގާއިމްކޮށް ޕޯޓިކޯ ގާއިމް ކުރަން ނިންމާފައިވެ އެވެ.
ނަމަވެސް އެ އެގްރީމަންޓާއި ގުޅިގެން ހުރި ކަންބޮޑުވުންތައް މާފަރު ކައުންސިލާއެކު ބޭއްވުނު ބައްދަލުވުމުގައި އެ ކައުންސިލުން ވަނީ ފާހަގަކޮށްފައެވެ.
އެކަމަށް އިޝާރާތް ކުރައްވައި، މާފަރު ރައްޔިތުންނާއި ބައްދަލުކުރައްވައި ވާހަކަދައްކަވަމުން ރައީސް މުއިއްޒު ވިދާޅުވީ، މާފަރުގައި ކުރަން ހުރި މަސައްކަތް ތަކުގެ ތެރެއިން އެންމެ މުހިންމު ކަމަކީ ސިއްހީ ދާއިރާއަށް ކޮށްދެން ހުރި ކަންކަމަށް ވާއިރު، ސިއްހީ މަރުކަޒާއި ގުޅިގެން ރައްޔިތުންގެ ހުރި ކަންބޮޑުވުންތަކަށް އެދެވޭ ހައްލެއް ގެންނަވާނެ ކަމަށެވެ.
ރޭގައި ސޮއި ކުރެވުނު މަޝްރޫޢުގައި، އިތުރު ކަންތައްތަކެއް ރަނގަޅުކުރަން ހުރިކަމަށް އަޅުގަނޑަށް މިއަދު މި މައުލޫމާތު ލިބުނީ. އެހެންވީމާ އަޅުގަނޑު ދަންނަވާފައިވާނެ މިހާރު، މި ހަފްތާ ނިމުމުގެ ކުރިން ރައްޔިތުން ބޭނުންވާ ސްކޯޕްގައި، ނޫނިއްޔާ ބޭނުންވާ ގޮތަށް ބަދަލުކޮށް، މަދުވެގެން އިތުރު 15 އެނދު ހިމެނޭގޮތަށް ބަދަލުކޮށް ރަނގަޅު ފެންވަރުގެ ސިއްހީ މަރުކަޒެއްގެ ގޮތުގައި އެގްރީމަންޓް އަލުން ސޮއި ކޮށްގެން ފަށަން
ރައީސުލްޖުމްހޫރިއްޔާ ޑރ މުޙައްމަދު މުޢިއްޒު
މީގެ އިތުރުންވެސް އެމަނިކުފާނު ވަނީ، މާފަރު އިންޓަނޭޝަނަލް އެއާޕޯޓުގެ ޓާމިނަލް އިތުރަށް ފުޅާކޮށް ތަރައްގީ ކުރުމުގެ މަސައްކަތުގެ ތެރެއިން އެއާޕޯޓަށް ޒިޔާރަތް ކުރާ ފަތުރުވެރިންނާއި މެހެމާނުން މަޑުކޮށްލަން ހޮޓަލެއް އެއާޕޯޓުގައި ތަރައްގީ ކުރުމަށް ސަރުކާރުން ނިންމާފައިވާކަންވެސް ފާހަގަކުރައްވާފައެވެ.
ހަމަ އެހެންމެ، ބޯހިޔާވަހިކަމަށް އަންނަ އަހަރުގެ ބަޖެޓުގައި އެއް ބިލިޔަން ރުފިޔާ ކަނޑައަޅައިގެން ބޯހިޔާވަހިކަމުގެ މަޝްރޫއު ހިންގާ އާ ރަށްތަކުގެ ތެރޭގައި މާފަރު ހިމެނިގެންދާނެ ކަމަށާއި، އެރަށު ކަރަންޓުގެ މައްސަލަ ވެސް ވަރަށް އަވަހަށް ހައްލުވެގެންދާނެ ކަމަށް އެމަނިކުފާނު ވިދާޅުވިއެވެ.
މި ލިޔުން ކަމުދިޔަނަމަ، ލައިކެއް ދެއްވާ
ކޮމެންޓް ކުރޭ
ކޮމެންޓްސް
މިހާތަނަށް ކޮމެންޓެއް ނެތް
