މަޖިލިސް މެޖޯރިޓީ ޑިމޮކްރެޓިކް އުސޫލުން ބޭނުންކުރުމަށް ނާޒިމް ގޮވާލައްވައިފި

މަޖިލީހުގެ މެޖޯރިޓީ ޑިމޮކްރެޓިކް އުސޫލުން ބޭނުންކުރުމަށް ރައްޔިތުންގެ މަޖިލީހުގެ ދަނގެތި ދާއިރާގެ މެމްބަރު އަދި މޯލްޑިވްސް ނޭޝަނަލް ޕާޓީ (އެމްއެންޕީ) ގެ ލީޑަރު މުހައްމަދު ނާޒިމް ގޮވާލައްވައިފިއެވެ.

އެކްސް ގައި ކުރެއްވި ޕޯސްޓެއްގައި ނާޒިމް މިފަދައިން ވިދާޅުވީ ރައީސުލްޖުމްހޫރިއްޔާ ޑރ.މުހައްމަދު މުއިއްޒުގެ ސަރުކާރުގެ ކެބިނެޓްގައި ހިމެނޭ ބައެއް ވަޒީރުންނަށް ރުހުން ނުދިނުމަށް އިދިކޮޅުން ނިންމުމާއި ގުޅިގެން މަޖިލިސް ތެރެ ވަރަށް ހޫނު ވެފައިވާ ދަނޑިވަޅެއްގައެވެ.

މިގޮތުން ނާޒިމް ވަނީ މަޖިލީހުގެ ޖަލްސާއެއް ކުރިއަށް ގެންދެވޭނެ މާހައުލެއްނެތި، ޖަލްސާ ކުރިއަށް ގެންދަން ކުރާ މަސައްކަތް ހަރުކަށި އިބާރާތުން ކުށްވެރިކޮށްފައެވެ.

"މަޖިލީހުގެ ޖަލްސާއެއް ކުރިއަށް ގެންދެވޭނެ މާހައުލެއް ނެތި ޖަލްސާ ކުރިއަށް ގެންދަން ކުރާ މަސައްކަތް ހަރުކަށި އިބާރާތުން ކުށްވެރި ކުރަން. މަޖިލިސް މެޖޯރިޓީ ޑިމޮކްރެޓިކް އުސޫލުން ބޭނުންކުރުމަށް އިލްތިމާސް ކުރަން."

ނާޒިމް ވިދާޅުވިއެވެ.

މިއަދު ކުރިއަށްދިޔަ 19 ވަނަ ރައްޔިތުންގެ މަޖިލީހުގެ ދައުރުން ބޭރުގައި ބާއްވާ ހާއްސަ ޖަލްސާގައި މި ސަރުކާރުގެ ވަޒީރުންނަށް ރުހުން ދިނުން އެޖެންޑާ ކޮށްފައިވާއިރު މިކަމާއި ގުޅިގެން ބަހުސް ކުރި އިރު މަޖިލިސް ތެރޭގައި އެވަގުތުވެސް މެމްބަރުން ވަނީ އަޑު ގަދަކޮށްފައެވެ.

ސަރުކާރުގެ މަސްއޫލިއްޔަތު އަދާކުރާ މިންވަރު ބަލާ ކޮމިޓީއިން ވަނީ ވަޒީރުންނަށް ރުހުން ދޭން ފެންނަކަމަށް ނިންމި ނަމަވެސް އިދިކޮޅު އެމްޑީޕީން އާއި ދަ ޑިމޮކްރެޓްސް އިން ވަނީ ބައެއް ވަޒީރުންނަށް ރުހުން ނުދިނުމަށް ނިންމާފައެވެ.

މި ގޮތުން ދަ ޑިމޮކްރެޓްސް ނެރުނު ބަޔާނެއްގައި ބުނެފައިވަނީ އެ ޕާޓީން އިންތިހާއަށް ކަންބޮޑުވާ ސިޔާސަތުތަކެއް ރައީސް ޑރ.މުޙައްމަދު މުޢިއްޒުގެ ސަރުކާރުން ގެންގުޅުއްވާކަމަށް ފާހަގަކުރެވޭއިރު، މި ސަރުކާރުގެ ކެބިނެޓްގެ ބައެއް ވަޒީރުންނަށް ރުހުން ނުދިނުމަށް ދަ ޑިމޮކްރެޓްސްގެ ޕާލަމެންޓްރީ ގްރޫޕުގެ ބައްދަލުވުމުގެ މަޝްވަރާއަށް ފަހު އިއްތިފާގުން ވަނީ ނިންމާފައިކަމަށެވެ.

ރުހުން ނުދިނުމަށް އިދިކޮޅުން ނިންމާފައިވަނީ އެޓާނީ ޖެނެރަލް އަޝާމްއާއި ފޮރިން މިނިސްޓަރ މޫސާ ޒަމީރުއާއި އިސްލާމިކް މިނިސްޓަރ ޑރ.މުހައްމަދު ޝަހީމް އަލީ ސައީދުގެ އިތުރުން ހައުސިން މިނިސްޓަރ ޑރ.ހައިދަރުއެވެ.

އިދިކޮޅުން ވަޒީރުންނަށް ރުހުން ނުދިނުމަށް ނިންމުމާއި ގުޅިގެން ސަރުކާރު ހިންގާ ޕީޕީއެމް/ޕީއެންސީގެ މެމްބަރުން ވަނީ މަޖިލިސް ތެރޭގައި އަޑުގަދަކޮށް، މަޖިލީހަށް ވަދެވެން ހުރި ދޮރުތައް އެތެރެއިން ބަންދު ވެސް ކޮށްފައެވެ.

މަޖިލީހުގެ ތަޅުން ހޫނުވެ، މެމްބަރުންގެ މެދުގައި ހިނގި ހަމަ ނުޖެހުމެއްގެ ތެރޭގައި ކަނޑިތީމު ދާއިރާގެ މެމްބަރު އަބްދުالله ޝަހީމް އަބްދުލްހަކީމަށް އަނިޔާވެ، ލިބުނު އަނިޔާ ތަކަށް ފަރުވާ ކުރުމަށް އެމްބިއުލާންސް އަށް އަރުވައިގެން ހޮސްޕިޓަލަށް ގެންގޮސްފައި ވާއިރު, އޭނާގެ ބޮލަށް އަނިޔާ ވެފައިވާ ކަމަށް މައުލޫމާތު ލިބެއެވެ.

މި މައްސަލަ އާއި ގުޅިގެން މަޖިލީހުގެ ބޭރުގައި އާންމުންވެސް ދަނީ އިހުތިޖާޖް ކުރަމުންނެވެ.