މަޖިލިސް އިންތިޚާބުގައި ޕީއެންސީން ހޯދި ކާމިޔާބީ އަށް ރައީސް ނަޝީދު މަރުޙަބާ ވިދާޅުވެއްޖެ!

އިއްޔެ ބޭއްވުނު 20 ވަނަ މަޖިލިސް އިންތިހާބުގައި ސަރުކާރު ހިންގާ މައި ޕާޓީ  ޕީއެންސީން ހޯދި ކާމިޔާބީ އަށް ކުރީގެ ރައީސް މުޙައްމަދު ނަޝީދު މަރުޙަބާ ވިދާޅުވެއްޖެއެވެ.

މިގޮތުން ރައީސް ނަޝީދު އެކްސްގައި ކުރެއްވި ޕޯސްޓެއްގައި އެމަނިކުފާނު ވަނީ، ޕީއެންސީން ހޯދި ފުރިހަމަ ކާމިޔާބީ އަށް ޕާޓިގެ ރައީސް، ރައީސުލްޖުމްހޫރިއްޔާ ޑރ.މުޙައްމަދު މުޢިއްޒު އަށާއި، ޕާޓީގެ މެމްބަރުންނަށާއި، ޕާޓީގެ އިސްވެރިންނަށް މަރުޙަބާ ވިދާޅުވެފައެވެ.

ރައީސް ނަޝީދު ނިސްބަތްވެވަޑައިގަންނަވާ ޑިމޮކްރެޓްސް ޕާޓީން މި އިންތިޚާބުގައި ވާދަ ކުރެއްވި އެއްވެސް ކެނޑިޑޭޓަކަށް ގޮނޑި ކަށަވަރުވެފައި ނުވާއިރު، އޭގެ ތެރޭގައި ޕާޓީގެ ރައީސް ހަސަން ލަތީފާއި އީވާ އަބްދު ﷲ ވެސް ހިމެނިވަޑައިގަންނަވައެވެ.

މި އިންތިހާބުގައި ޖުމުލަ 90 ދާއިރާއަކަށް ޕީއެންސީގެ ކެންޑިޑޭޓުން ވާދަކުރި އިރު އިދިކޮޅު އެމްޑީޕީން 89 ދާއިރާއަކަށް ވަނީ ވާދަކޮށްފައެވެ. ހަމައެއާއިއެކު، އަމިއްލަ 130 ކެންޑިޑޭޓުންނާއި، ޖުމްހޫރީ ޕާޓީ (ޖޭޕީ)ގެ 10 ކެންޑިޑޭޓުންނާއި ދަ ޑިމޮކްރެޓްސްގެ 39 ކެންޑިޑޭޓުން ވެސް މި އިންތިޚާބުގައި ވަނީ ވާދަކޮށްފައެވެ.

އިންތިޚާބުގެ ވަގުތީ ނަތީޖާތައް ދައްކާގޮތުން ސަރުކާރު ހިންގާ ޕީއެންސީ އަށް މަޖިލީހުގެ 71 ގޮނޑި ލިބި އެޕާޓީން ވަނީ 20 ވަނަ ރައްޔިތުންގެ މަޖިލީހުގެ ސުޕަމެޖޯރިޓީ ހޯދާފައެވެ. އަދި ޕާޓީގެ ތާއީދާއެކު ގޮނޑި ކާމިޔާބު ކުރި ކެންޑިޑޭޓުން ހިމަނައިގެން ސަރުކާރަށް އެއްބާރުލުން ދޭނެ 75 ކެންޑިޑޭޓުން މަޖިލީހުގައި ތިބޭނެއެވެ.