ކޮންޓްރޯލް ބިލު ބޭރުވެއްޖެ، ފާސްކުރީ ރެގިއުލޭޓަރީ ބިލެއް: ވަޒީރު އަސްވާޑު

ރައްޔިތުންގެ މަޖިލީހުން ރޭ އިރާކޮޅު ފާސްކުރީ މީޑިއާތައް ކޮންޓްރޯލް ކުރުމުގެ ބިލެއްގެ ސިފަތައް ކަނޑުވާލުމަށްފަހު، މީޑިއާ ރެގިއުލޭޓަރީ ބިލެއް ކަމަށް އިންފޮމޭޝަން އެންޑް އާޓްސް މިނިސްޓަރު އިބްރާހިމް ވަހީދު (އަސްވާޑު) ވިދާޅުވެއްޖެއެވެ.

ދައުލަތުގެ މީޑިއާގެ ޕްރޮގްރާމެއްގައި ރޭ ވާހަކަފުޅު ދައްކަވަމުން އަސްވާޑް ވިދާޅުވީ، މިހާރު މަޖިލީހުން ފާސްކޮށްފައިވާ ބިލަކީ ނޫސްވެރިންގެ ކަންބޮޑުވުންތައް އައްސަވާ، ބޮޑެތި އިސްލާހުތަކެއް ގެނެސްފައިވާ ބިލެއްކަމަށާއި، އިއްޔެ އިސްލާހުވެގެން ފާސްކުރެވުނު ބިލުގައި ނޫސްވެރިންނާއި ސިޔާސީ އިދިކޮޅު ފަރާތްތަކުގެ ކަންބޮޑުވުންތައް ޙައްލު ނުލިބު ނުވާނެ ކަމަށެވެ.

އެގޮތުން ވަޒީރު ވިދާޅުވީ، އެ ބިލު އެންމެ ފުރަތަމަ މަޖިލީހަށް ހުށަހެޅުއްވި އިރު ހުރީ "ކޮންޓްރޯލް ކުރުމުގެ ސިފަތަކެއް" ކަމަށާއި، ނަމަވެސް މިހާރު "ކޮންޓްރޯލް ބިލު" ބޭރުކޮށްލައިފައިވާ ކަމަށެވެ. އެގޮތުން ކޮންޓްރޯލް ކުރުމުގެ ސިފަތައް މިހާރު އެ ބިލުން ކަނޑާލައިފައިވާ ކަމަށާއި، މިހާރު އެ ބިލަކީ މީޑިއާތައް ރެގިއުލޭޓްކުރާ ބިލެއް ކަމަށް ވަޒީރު ވިދާޅުވިއެވެ.

ކޮންޓްރޯލް ބިލު ބޭރުވެއްޖެ. މި ހުށަހެޅިއިރު އެ ދަންނަވާހެން ކޮންޓްރޯލްކުރުމުގެ ސިފަތަކެއް ހުރީ. އެހެން ނަމަވެސް ކޮންޓްރޯލް ބިލުގެ ސިފަތައް އަޅުގަނޑުމެން ކަނޑުވައިލައިފިން. މިހާރު މިއީ ރެގިއުލޭޓަރީ ބިލެއް

އިންފޮމޭޝަން އެންޑް އާޓްސް މިނިސްޓަރު އިބްރާހިމް ވަހީދު (އަސްވާޑު)

ވަޒީރު ވިދާޅުވި ގޮތުގައި، އެ ބިލު ހުށަހެޅިއިރު ނޫސްވެރިންގެ ފަރާތުން ހުރި ކަންބޮޑުވުންތަކާއި އެކު، އެ ބިލަށް އެމަނިކުފާނު ހުށަހަޅުއްވާނެ ކަމަށް މަޝްވަރާކުރެއްވި އިސްލާހުތައް ހަމަ ޔަގީނުން ވެސް އެ ބިލުގައި ހުންނާނެ ކަމަށެވެ. އަދި އެ މަޝްވަރާތަކާ ޚިލާފު އެއްވެސް މާއްދާއެއް އެ ބިލުގައި ނޯންނާނެ ކަމުގެ ޔަގީންކަން ވަޒީރު ވަނީ ދެއްވާފައެވެ.

މީގެ އިތުރުން، މީޑިއާ ކައުންސިލާއި ބްރޯޑްކާސްޓިން ކޮމިޝަނަށް އިޝާރަތްކުރައްވަމުން ވަޒީރު ވިދާޅުވީ،  މިހާރު ހިންގާ ދެ އިދާރާއަކީ ނޫސްވެރިންގެ އިތުބާރު ގެއްލިފައިވާ ދެ ތަންކަމަށާއި، މީޑިއާތަކަށް ދިމާވާ ކަންކަމުގެ ހައްލެއް މި ދެފަރާތައް ހޯދައި ނުދެވޭކަން ރާއްޖޭގެ ނޫސްވެރިން ފާހަގަކުރާ ކަމަށެވެ. އެހެންކަމުން  މިހާރު ފާސްކޮށްފައިވާ މީޑިއާ ރެގިއުލޭޝަން ބިލުން މި ދެތަން އެއްކޮއްލާ އުފައްދާ ކޮމިޝަންގެ މަސައްކަތް ވަޒަން ކުރުމަށް ވަޒީރު ވަނީ އެދިވަޑައިގަންނަވައިފައެވެ.

ބްރޯޑްކާސްޓިން ކޮމިޝަނަށް ބްރޯޑްކާސްޓަރުން އިތުބާރެއް ނުކުރޭ. އޮންލައިން މީޑިއާކުރެން އައްސަވާ މީޑިއާ ކައުންސިލަށް އިތުބާރު ކުރަންހޭ. އެތަނުގައި ރަނގަޅު ސިސްޓަމެއް ނެތޭ މައްސަލައެއް ނުބެލެޔޭ ބުނާނެ. އަބަދުވެސް ކުރާ ޝަކުވާއެއް. އެހެންވީމާ މިދެތަން ފެއިލްވެއްޖެ ކަމަށް މީޑިއާތަކުން އެއްބަސްވޭ.

އިންފޮމޭޝަން އެންޑް އާޓްސް މިނިސްޓަރު އިބްރާހިމް ވަހީދު (އަސްވާޑު)

ވަޒީރު އެފަދައިން ވިދާޅުވިއިރު، ތުޅާދޫ ދާއިރާގެ މެންބަރު އަބްދުލް ޙަންނާނު އަބޫބަކުރު މަޖިލީހަށް ހުށަހެޅުއްވި މޯލްޑިވްސް މީޑިޔާ އެންޑް ރެގިއުލޭޝަން ބިލު އިއްޔެ މަޖިލީހުން ފާސްކުރިއިރު ވެސް ގިނަ އަދަދެއްގެ ނޫސްވެރިންނާއި ޢާންމުން ގެންދިޔައީ އެ ބިލު ފާސްކުރުމާ ދެކޮޅަށް ގޮވާލަމުންނެވެ.

އެގޮތުން މަޖިލިސް ދޮށަށް ވެސް އެއްވެ ވަރަށް ގިނަ ފަރާތްތަކުން ކަންބޮޑުވުން ފާޅުކޮށްފައިވާއިރު، ހަމަ އެވަގުތު އެ ބިލު ފާސްކުރުމަށް ގޮވާލައި ވެސް ބައެއް ފަރާތްތަކުން ވަނީ ޚިޔާލުފާޅުކޮށްފައެވެ.

އެ ބިލު މަޖިލީހުން ފާސްކުރިއިރު، އެ ބިލު ފާސްވެފައިވަނީ އިއްޔެގެ މަޖިލީހުގެ ޖަލްސާއަށް ހާޟިރުވި 63 މެންބަރުންގެ ތެރެއިން 60 މެންބަރުންގެ ޣައުލަބިއްޔަތުންނެވެ. އެގޮތުން އެ ބިލާ އެއްކޮޅަށް 60 މެންބަރުން ވޯޓު ދެއްވިއިރު، ބިލާ ދެކޮޅަށް ވޯޓު ދެއްވާފައިވަނީ ވެލިދޫ ދާއިރާގެ މެންބަރު މުޙައްމަދު އައްބާސް އެކަންޏެވެ.