ދެމަފިރިން އެއްވަރަކަށް ސިޔާސީވީމަ ލިބޭ ގެއްލުން ބަކިންބޮޑުކަމަށް ރައީސް ޔާމީންގެ ސަރުކާރުގެ ޑިފެންސް މިނިސްޓަރުކަން ކުރެއްވި އާދަމް ޝަރީފް އުމަރު ވިދާޅުވެއްޖެއެވެ.

އާދަމް ޝަރީފް މިހެން ވިދާޅުވެފައިވަނީ މިއަދު އޭނާ ފޭސްބުކްގައި ޖެހި ސްޓޭޓަސްއެއްގައެވެ. ނަމަވެސް މިހާރު ވަނީ މި ސްޓޭޓަސް ޑިލީޓު ކުރައްވާފައެވެ.

އާދަމް ޝަރީފް މިހެން ވިދާޅުވެފައިވާ އިރު އާދަމް ޝަރީފްގެ އަނބިކަނބަލުންނަކީވެސް ސިޔާސީ ގޮތުން ޕީޕީއެމްގައި ވަރަށް ހަރަކާތްތެރި ކަނބަލެއްކަން ފާހަގަކޮށްލެވެއެވެ. އެގޮތުން އޭނާއަކީ ޕީޕީއެމްގެ ކައުންސިލް މެންބަރެއްގެ އިތުރުން ރައީސް ޔާމީންގެ އަނބިކަނބަލުން މެޑަމް ފާތުމަތު އިބްރާހިމްއާއި ވަރަށް ގާތް ބޭފުޅެއްކަން ފާހަގަކޮށްލަންޖެހެއެވެ. މީގެ އިތުރުން އާދަމް ޝަރީފްގެ އަނބިކަނބަލުންނަކީ ވެސް ސިޔާސީ އާއިލާއަކަށް ނިސްބަތްވެވަޑައިގަންނަވާ ބޭފުޅެކެވެ. އެގޮތުން އެއީ މިހާރުގެ ނައިބް ރައީސް ފައިސަލް އާއި މަޖިލިސް ކުރީގެ ރައީސް އަބްދުﷲ މަސީހްގެ އާއިލާއަށް ނިސްބަތްވެވަޑައިގަންނަވާ ބޭފުޅެކެވެ.

ފަހަރުގައި މިއީ މިދެބޭފުޅުންނަށް ނިސްބަތްކުރައްވައި ލިޔުއްވި ލިޔުމެއްކަމީ އެކަށީގެންވާ ކަމެކެވެ.

އާދަމް ޝަރީފަކީ އަންނަ މަޖިލިސް އިންތިހާބުގައި ވާދަކުރައްވާނެކަން އިއުލާންކުރައްވާފައިވާ ފަރާތެކެވެ. ނަމަވެސް ޕީޕީއެމް އިން ޕްރައިމެރީއަކާ ނުލައި ގިނަ ފަރާތްތަކަކަށް ޓިކެޓް ހަވާލުކޮށްފައިވާ އިރު މިހާތަނަށްވެސް އޭނާއަށް ޓިކެޓް ހަވާނުކުރާކަން ފާހަގަކުރެވެއެވެ. އަދި މިއީ ރައީސް ޔާމީން ނުވަތަ މެޑަމް ފާތުންގެ އިތުބާތު ނެތުމުން ޓިކެޓް ނުލިބެނީކަމަށް ބެލެވެއެވެ.

އާދަމް ޝަރީފަކީ ރައީސް ޔާމީންގެ ގާތް އިތުބާރު ކުރެވޭ މިނިސްޓަރުންގެ ތެރޭގައި ހިމެނޭ ބޭފުޅެއްކަން ފާހަގަކޮށްލަންޖެހެއެވެ.