މަސްވެރިންގެ މެދުގައި ތަފާތުނުކޮށް މިހާރަށްވުރެ ހެޔޮއަގުގައި ޑީސަލް ގަންގަން ލިބޭނެ އިންތިޒާމުތައް ހަމަޖައްސާދިނުމަށް ބޮޑުކަންނެލީގެ މަސްވެރިންގެ ޔޫނިއަން(ބީ.ކޭ.އެމް.ޔޫ) އިން ގޮވާލައިފިއެވެ. 

އެ ޔޫނިއަނުން ވަނީ އެކަމަށް ގޮވާލާ ބަޔާނެއްވެސް ނެރެފައެވެ. 

ބޮޑު ކަންނެލީގެ މަސްވެރިންގެ ޔޫނިއަނުން ބުނީ މިހާރުގެ ހާލަތަށް ބަލާއިރު މަސްވެރިންނަށް ދިމާވެފައިވާ އެންމެ ބޮޑު ގޮންޖެހުމަކީ ޑީސަލާއި ތަކެތީގެ އަގު ބޮޑުވުންކަމަށެވެ. މަސްވެރިންނަށް މިހާރު ޑީސަލް ލިޓަރެއް ލިބެން ހުރީ 20 ރުފިޔާ 2 ލާރިއަށްކަމަށް އެ ޔޫނިއަނުން ނެރުނު ބަޔާނުގައި ވަނީ ފާހަގަކޮށްފައެވެ. އެހެން ނަމަވެސް އުތުރާއި ދެކުނުގެ މަސްވެރިންނަށް ސަރުކާރުން ފެލިވަރު އަދި ކޫއްޑޫއިން 16 ރުފިޔާ 84 ލާރިއަށް ޑީސަލް ލިޓަރެއް ވިއްކަމުންދާކަމުގެ މައުލޫމާތު ލިބިފައިވާކަމަށް އެ ޔޫނިއަނުން ވަނީ ބުނެފައެވެ. 

ޑީސަލް ވިއްކުމުގައި މަސްވެރިންގެ މެދުގައި ތަފާތުކުރުންތައް ގެންގުޅޭކަން ފާހަގަކުރަމުން ބީ.ކޭ.އެމް.ޔޫ އިން ބުނީ ބޮޑު ކަންނެލި މަސްވެރިންނަކީ މުޅިންވެސް މާލެ ސަރަހައްދަށް މަސްކިރާ، ތެލާއި ކޮއްތާއި އަދި ބޯފެން މާލެ ސަރަހައްދުން އަރުވައިގެން މަސްވެރިކަން ކުރަމުންދާ ފަރާތްތަކެއްކަމަށްވުމުން އެހެން ބައެއް ސަރަހައްދުތަކުން ލިބޭ ގޮތަށް 16 ރުފިޔާއަށް ޑީސަލް ލިޓރެއް ގަންނަން އެ މަސްވެރިންނަށް ގަންނަން ލިބެން ނެތުމަކީ ކަންބޮޑުވާ ކަމެއްކަމަށެވެ. 

އެހެންކަމުން ދެކުނާއި އުތުރުގެ މަސްވެރިންނެކޭ އެއްފަދައިން މެދުރާއްޖެތެރެއާއި މާލެ ސަރަހައްދުންވެސް 16 ރުފިޔާ 84 ލާރިއަށް ޑީސަލް ލިޓަރެއް ގަންނަން ލިބޭނެ ގޮތް ހަމަޖައްސާދިނުމަށް އެ ޖަމުއިއްޔާއިން ވަނީ ގޮވާލާފައެވެ. އަދި މަސްވެރިންނަށް ޑީސަލް ވިއްކާއިރު ތަފާތު ނުކުރުމަށްވެސް ވަނީ ސަރުކާރަށް ގޮވާލާފައެވެ.