މިދިޔަ ސެޕްޓެމްބަރު މަހުގެ 20 ގެ ނިޔަލަށް ޖުމްލަ 3،926 ފްލެޓުތަކުގެ ތެރެއިން 564 ފްލެޓުން މަހުން މަހަށް ގަވާއިދުން ކުލި ނުދައްކާ ކަމަށް ހާމަވެއްޖެއެވެ.

މިކަން ހާމަވެފައިވަނީ، ފަހި ދިރިއުޅުން ކޯޕަރޭޝަން (އެފްޑީސީ) އިން 31 ސެޕްޓެމްބަރުގެ ނިޔަލަށް ޔުނިޓުތަކަށް ދޫކޮށްފައިވާ ޖޫރިމަނާ އާއި އިންޒާރުތަކުގެ މައުލޫމާތު ހިއްސާކުރުމުގެ ގޮތުން އެ ކުންފުނިން އެކްސްގައި ހިއްސާކުރި ޕޯސްޓަކުންނެވެ.

އެ ކުންފުނިން މައުލޫމާތު ދޭ ގޮތުގައި ޖުމްލަ 3،362 ޔުނިޓުން މަހުން މަހަށް ގަވާއިދުން ކުލި ދައްކާއިރު، ޖުމްލަ 564 ޔުނިޓެއް މަހުން މަހަށް ގަވާއިދުން ކުލި ނުދައްކައެވެ.

މީގެ އިތުރުން، ހުއްދަނެތި ކުއްޔަށް ދިނުމުގެ 16 މައްސަލައެއް އެ ކުންފުންޔަށް ހުށަހަޅާފާވާއިރު ހުއްދަނެތި ޔުނިޓުތަކަށް ބަދަލު ގެނައުމުގެ 28 މައްސަލައަކާއި އެންގުންތަކަށް އަމަލ ނުކުރުމުގެ 2 މައްސަލައެއް އެ ކުންފުންޔަށް ހުށަހަޅާފާވެއެވެ. ފާހަގަކޮށްލެވޭ ގޮތެއްގައި އަޑުގަދަ ކުރުމުގެ ޝަކުވާ އެއްވެސް ފަރާތަކުން އެ ކުންފުންޔަށް ހުށަހަޅާފައިނުވީ ނަމަވެސް އެ ކުންފުނިން ވަނީ އަޑުގަދަ ކުރުމުގެ 2 މައްސަލައެއް ހައްލުކޮށްފައެވެ.

ހަމަ އެއާއެކު، ކުނި އެޅުމުގެ 1 މައްސަލަ އައި ހުއްދަނެތި ކުއްޔަށް ދިނުމުގެ 9 މައްސަލަ އަކާއި ހުއްދަނެތި ޔުނިޓަށް ބަދަލު ގެނައުމުގެ 23 މައްސަލަ އަކާއި އެންގުންތަކަށް އަމަލުނުކުރުމުގެ 2 މައްސަލައެއް އެފްޑީސީން މިހާރުވެސް ދަނީ ބަލަމުންނެވެ.

ބަލާ ހައްލުކޮށްފައިވާ މައްސަލަތަކުގެ ތެރެއިން ކުނި އެޅުމުގެ ގަވާއިދާ ހިލާފުވުމުގެ ސަބަބުން 2 ފަރާތެއް ޖޫރީމަނާކޮށް ހުއްދަނެތި ޔުނިޓުތައް ކުއްޔަށް ދިނުމުން 5 ފަރާތެއް ޖޫރިމަނާކޮށް 2 ފަރާތަކަށް ނޯޓިސް ފޮނުވައި ހުއްދަނެތި ޔުނިޓުތަކަށް ބަދަލު ގެނައުމުން 5 ފަރާތެއް އެފްޑީސީން ޖޫރިމަނާކޮށްފާވެއެވެ.

އެ ގޮތުން، މި މައްސަލަތަކާއެކު އެފްޑީސީ އަށް މިދިޔަ ސެޕްޓެމްބަރު މަހުގެ 31 ގެ ނިޔަލަށް ޖުމްލަ 49 މައްސަލައެއް ހުށަހަޅާފާވެއެވެ.