ދިވެހިރާއްޖޭގެ ސިޔާސީ ތާރީހުގެ ހަގީގަތް އޮޅުވާނުލުމަށް މޯލްޑިވްސް ރިފޯމް މޫވްމަންޓު(އެމްއާރުއެމް) އިން ގޮވާލައިފިއެވެ. 

އެމްއާރުއެމް އިން ނެރުނު ބަޔާނެއްގައި ވަނީ ރާއްޖޭގެ ސިޔާސީ މަޝްރަހުގައި ބައެއް ފަރާތްތައް ދައްކަމުންދާ ވާހަކަތަކުން ބައެއް ކަންކަން ރައްޔިތުންނަށް އޮޅުން އެކަށީގެންވާކަން ދެކޭކަން ފާހަގަކޮށް އެފަދަ ކަންކަމާއި މެދު އެމްއާރުއެމްއިން ދެކޭ ގޮތް ހާމަކޮށްފައެވެ. 

ރާއްޖޭގެ ޑިމޮކްރަސީގެ ތާރީޚަށް އަލިއަޅުވާލާ އެ ބަޔާނުގައި ބުނެފައިވަނީ ޒަމާނީ ޑިމޮކްރަސީ ރާއްޖެއަށް ގެނައުމަށް ކުރި މަސައްކަތަށް އެންމެ ބޮޑު ބާރެއް ލިބިގެން ދިޔައީ ކުރީގެ ރައީސް މައުމޫނު އަބްދުލްގައްޔޫމުގެ ވެރިކަމުގައި ގާނޫނު އަސާސީ އެކުލަވާލުމަށް ނިންމި ހިސާބުންކަމަށެވެ. 

Advertisement

އެ މަސައްކަތުގެ ތެރެއިން ދިވެހިން ބޭނުންވާ ވެރުކަމުގެ ނިޒާމެއް ކަނޑައަޅައި ވެރިކަމުގެ ބާރުތައް ވަކިކުރެވި އޭގެ މައްޗަށް އާ ގާނޫނު އަސާސީއެއް އެކުލެވުނުކަމަށެވެ. 

އެމްއާރުއެމްއިން ބުނި ގޮތުގައި ފެހި ގާނޫނު އަސާސީއަށް 14 އަހަރު ފުރެންދާއިރު މިއަދު ދިވެހިރައްޔިތުންގެ އެންމެ ބޮޑު ޝަކުވާއަކީ ޑިމޮކްރަސީ ގެނައުމަށް މައުމޫނުގެ ސަރުކާރުން ކުރު މުއްދަތެއްގެ ތެރޭގައި ކުރެއްވި ބުރަ މަސައްކަތާއި ތަފާތު ފިކުރުގެ އަހުލުވެރިންނަށް ދެއްވި އެއްބާރުލުމުގެ ނަތީޖާ، ކަންކަން އިސްލާހުކުރުމަށް މި ވޭތުވެ ދިޔަ 14 އަހަރު ވެރިކަން ކުރި ފަރާތްތަކަށް ނެރެދެވިފައި ނުވުންކަމަށެވެ. 

އެގޮތުން ރާއްޖޭގެ ޖަލުތަކުގެ ހާލަތާއި އިންސާނީ ހައްގުތަކުގެ ހާލަތާއި ވާނުވާ ޖަހައި ޖަލަށްލުމާއި އިޖުތިމާއީ ރައްކާތެރިކަމާއި ކޮރަޕްޝަނާއި، ކަންކަމުގައި ސިޔާސީ ނުފޫޒު ފޯރުވުން ފަދަ އެތައް ކަމަކަށް އެކަށޭނަ އިސްހާލާއި ކުރިއެރުން އައިސްފައިނުވާކަމަށް އެމްއާރުއެމްގެ ބަރާނުގައި ވަނީ ބުނެފައެވެ، 

މުޖުތަމައުގެ ރައްކާތެރިކަމާއި ދީނީ އެއްބައިވަންތަކަން ފަދަ ބައެއް ދާއިރާތަކުން މީގެ 14 އަހަރު ކުރިއާ އަޅާ ބަލާއިރު އެތައް ފިޔަވަޅެއް ފަހަތަށް ޖެހިފައިވާކަންވެސް އެމްއާރުއެމް އިން ފާހަގަކުރިއެވެ. 

އެކަންކަން ފާހަގަކޮށް އެ ޕާޓީއިން ވަނީ ދިވެހިރާއްޖޭގެ ސިޔާސީ ތާރީހުގެ ހަގީގަތް އަދުގެ ޖީލުތަކަށް އޮޅުވާނުލުމަށް ގޮވާލާފައެވެ. އަދި ސިޔާސީ ބޭނުމަށް މީހުން އަބުރު ކަތިލައި މުޖުތަމައުގައި ރުޅިވެރިކަން އުފެދޭފަދަ އަމަލުތައް ހިންގައިގެން ސިޔާސީ ކުރިއެރުން ހޯދަން އެއްވެސް ފަރާތަކުން މަސައްކަތް ނުކުރުމަށްވެސް އެމްއާރުމެނުން ވަނީ ގޮވާލާފައެވެ.