ޑެސްޓިނޭޝަން ޕްރިންސިޕަލް ޓީޖީއެސްޓީއަށް ޢަމަލުކުރާ އޮނިގަނޑު އިސްލާހުކުރުމަށް ރައީސް ޑރ. މުޙައްމަދު މުޢިއްޒު ނިންމެވި ނިންމެވުމާ ގުޅިގެން, މޯލްޑިވްސް އެސޯސިއޭޝަން އޮފް ޓްރެވަލް އޭޖެންޓްސް އެންޑް ޓުއާ އޮޕަރޭޓާސް (މަޓާޓޯ) އިން މިއަދު އެ ނިންމެވުމަށް ތާއީދުކޮށް ޝުކުރު އަދާކޮށްފިއެވެ.

އެ ޖަމިއްޔާއިން މިއަދު ނެރުނު ބަޔާނުގައި ވަނީ، ފަތުރުވެރިކަމުގެ ދާއިރާގެ ފަރާތްތަކުން ފާޅުކުރި ކަންބޮޑުވުންތައް ސަރުކާރުން ބަލައިގަނެ ފިޔަވަޅު އެޅުމުން އެކަން ފާހަގަކޮށްފައެވެ.  އެ ޓެކްސްއަށް ބަދަލުގެނައުމަށް ނިންމިކަންމި އިއުލާނުކުރެއްވީ، ރޭ ބެއްވި ފަތުރުވެރިކަމުގެ އަހަރީ ހާއްސަ ޖަލްސާގައި ފަތުރުވެރިކަމާ ބެހޭ ވަޒީރު މުޙައްމަދު އަމީނެވެ. ވަޒީރު ރޭ ވިދާޅުވީ ފަތުރުވެރިކަމުގެ ސިނާއަތުގެ ތެރޭގައި މަސައްކަތްކުރާ ފަރާތްތަކާއި ޓްރެވަލް އޭޖެންޓުން ހުށަހެޅި ޝަކުވާތަކަށް ރިޢާޔަތް ކުރެއްވުމަށްފަހު ސަރުކާރުން އެ ބަދަލު ގެންނެވީ ކަމަށެވެ.

މަޓާޓޯގެ ސެކްރެޓަރީ ޖެނެރަލް ޢަބްދުﷲ ސުޢޫދު ވިދާޅުވީ މި ނިންމެވުމަކީ ވަރަށް ރަނގަޅު އަދި މުހިންމު ފިޔަވަޅެކެވެ. ފަތުރުވެރިކަމުގެ ސިނާއަތަށް ކާމިޔާބީ ލިބެނީ ސަރުކާރާއި ދާއިރާގެ ފަރާތްތައް ގުޅިގެން މަޝްވަރާގެ މަތީން ކުރިއަށް ދިޔުމުން ކަމަށް ސުޢޫދު ފާހަގަކުރެއްވިއެވެ.

ދައުލަތަށް ލިބޭ އާމްދަނީ ރައްކާތެރިކޮށްދޭ އަދި ހަމައެއާއެކު ބައިނަލްއަގުވާމީ ބާޒާރުގައި ރާއްޖެއަކީ ވާދަވެރި އަދި ވިއްކަން ފަސޭހަ މަންޒިލެއްގެ ގޮތުގައި ދެމިއޮންނާނެކަން ކަށަވަރުކޮށްދޭ ހަމަހަމަ އޮނިގަނޑެއް އެކުލަވާލުމުގައި ސަރުކާރަށް އެއްބާރުލުން ދިނުމަށް މަޓާޓޯ އޮތީ ތައްޔާރަށް ކަމަށް ސުޢޫދު ވިދާޅުވިއެވެ.

ފާއިތުވި ހަފުތާތަކުގައި މަޓާޓޯއިން ވަނީ ރާއްޖެއާއި ރާއްޖެއިން ބޭރުގެ ކަމާ ގުޅޭ ފަރާތްތަކާ މަޝްވަރާކޮށް އެ ބަދަލުތަކުގެ އަސަރު ދެނެގަތުމަށް މުޅި ސިނާއަތް ޝާމިލުވާ ސާވޭއެއް ވެސް ކުރިއަށް ގެންގޮސްފައެވެ.