ރައީސް ނަޝީދުގެ ޑިމޮކްރަސީ އަކީ "ހުސް އަޑު" ކަމަށް ކުރީގެ ރައީސް އަބްދުالله ޔާމީން އަބްދުލްޤައްޔޫމް ވިދާޅުވެއްޖެ އެވެ.
ރައީސް ޔާމީން މިހެން ވިދާޅުވެފައިވަނީ އެމަނިކުފާނުގެ ޕާޓީ ޕީއެންއެފުން ރޭ އައްޑޫ ސިޓީ ފޭދުގައި ބޭއްވި ޖަލްސާއެއްގައި ވާހަކަދައްކަވަމުންނެވެ.
އެ ގޮތުން، ޔާމީން ވިދާޅުވީ ތަފާތު ވާހަކަފުޅުތައް ދެއްކެވި ނަމަވެސް އެއީ ޙަޤީޤަތަކަށް ވެފައި ނުވާ ކަމަށެވެ. ނަޝީދުގެ ވެރިކަމުގައި ޑިމޮކްރަސީގެ ނަމުގައި އާބިޓްރަރީކޮށް މީހުން ހައްޔަރުކުރި ކަމަށް ވިދާޅުވެ ނަޝީދު ވިދާޅުވާ ޑިމޮކްރަސީއަކީ "ހުސް އަޑު" ކަމަށް ޔާމީން ސިފަކުރެއްވިއެވެ.
ޑިމޮކްރަސީ އަކީ ހަމަ ނޮއިސް އެމްޓީ ނޮއިސް އިނގޭތޯ. ރައީސް ސޯލިހްގެ ވާހަކަ ދައްކާ ހިތެއްވެސް ނުވޭ.
ރައީސް ނަޝީދުގެ ވެރިކަމާބެހޭ ގޮތުން ރައީސް ޔާމީން ވިދާޅުވިއެވެ.
ކުރީގެ ވެރިކަންތަކާ އަޅައިކިޔުއްވައި ވާހަކަފުޅު ދައްކަވަމުން ޔާމީން ވިދާޅުވީ، ކުރީގެ ރައީސް މައުމޫން އަބްދުލްޤައްޔޫމާއި، ކުރީގެ ރައީސް މުޙައްމަދު ވަޙީދު ޙަސަން މަނިކު، ނުފުއްދެވޭ ވަރުގެ ވަޢުދުތައް ވެވަޑައިނުގެން ރައްޔިތުންގެ އިތުބާރު ހޯއްދެވި ކަމަށެވެ. އަދި، ކުރީގެ ރައީސް އިބްރާހީމް މުޙައްމަދު ޞާލިޙުގެ ވެރިކަމުގައި ކޮވިޑް-19 ގެ ޙާލަތަށް ފަހު ތަރައްޤީގެ މަސައްކަތަށް ލިބިވަޑައިގެންނެވި ދެ އަހަރާ ބައިގެ ތެރޭގައި ރައްޔިތުންގެ ދިރިއުޅުމަށް ފާހަގަކޮށްލެވޭ ބޮޑު ބަދަލެއް ގެނެސްދެވިފައި ނުވާ ކަމަށް ޔާމީން ވިދާޅުވިއެވެ.
އެ މަނިކުފާނުގެ އަމިއްލަފުޅު ވެރިކަމުގައި ވެވަޑައިގެންނެވި ވަޢުދުތައް ފުއްދަވައިދެއްވި ކަމަށާއި ނުކުރެއްވޭ ވަރުގެ ކަންކަމުގެ ވާހަކަ ރައްޔިތުންގެ ގާތުގައި ނުދައްކަވާ ކަމަށް ވިދާޅުވި އެވެ.
ރާއްޖޭގެ މިހާރުގެ ސިޔާސީ މަސްރަޙަށް އަލިއަޅުއްވައިލައްވައި ޔާމީން ވިދާޅުވީ، ސިޔާސީ ލީޑަރުން ދެކެ ރައްޔިތުން ފޫހިވެފައިވާ ކަމަށެވެ. ރައީސް ޑރ. މުޙައްމަދު މުޢިއްޒާ އެކު ތިއްބެވި ލީޑަރުން މަސައްކަތް ކުރައްވަނީ އަމިއްލަ މަންފާއަށް ކަމަށާއި ރައީސް މުޢިއްޒުގެ ޒަޢާމަތުގައި ރައްޔިތުންނަށް ފައިދާ ކުރާ ކަންކަން ނުވާ ކަމަށް ރައްޔިތުން ޤަބޫލުކުރާ ކަމަށް ވެސް ޔާމީން ތުހުމަތުކުރެއްވިއެވެ.
އެންމެ ބޮޑު އިދިކޮޅު ޕާޓީގެ ގޮތުގައި އޮތް އެމްޑީޕީން ކުރީގައި ކުރި ފަދަ މުޒާހަރާތަކާއި ހިތްވަރު މިހާރު ނުފެންނަ ކަމަށާއި ކޮރަޕްޝަންގެ މައްސަލަތައް އޭސީސީއަށް ހުށަހެޅުން ފަދަ ކަންކަން ވެސް ނުކުރާ ކަމަށް ޔާމީން ވިދާޅުވިއެވެ. މަޖިލީހުގައި ބައެއް މެންބަރުން އަޑު އުފުއްލެވި ނަމަވެސް ޕާޓީ އެއް ގަލެއްގެ މަތީގައި ޖެހި ސަރުކާރު ޖަވާބުދާރީ ކުރުވާތަން ނުފެންނަ ކަމަށް ތަކުރާރުކޮށް ވިދާޅުވެ އެމްޑީޕީގެ ލީޑަރުން ރައްޔިތުންގެ ފަޅިއަށް ނުކުމެ ވަޑައިގެން ސަރުކާރު ޖަވާބުދާރީ ކުރެއްވުމަށް ޔާމީން ގޮވައިލެއްވިއެވެ.
Advertisement
This content is created and paid for by advertisers and does not involve Voice Journalists
