ޕްރިމިއާ ލީގުގައި މެންޗެސްޓާ ޔުނައިޓެޑުން ވާދަވެރި ލިވަޕޫލް ބަލިކޮށް އަސްލު ސޫރަ ދައްކާލައިފިއެވެ.

މި ސީޒަނުގެ ޕްރިމިއާ ލީގުގައި މެންޗެސްޓާ ޔުނައިޓެޑުން ކުޅުނު ފުރަތަމަ ދެ މެޗުން ބަލިވުމުން އެ ޓީމަށް ގިނަ ފާޑު ކިޔުންތަކެއް އަމާޒުވެފައި ވަނިކޮށް އަމިއްލަ ދަނޑުގައި މިރޭ ލިވަޕޫލް ބަލިކުރީ 1-2 ގެ ނަތީޖާއަކުންނެވެ.

މިރޭގެ މެޗު ޔުނައިޓެޑުން ފަށާފައިވަނީ ވަރަށް ވަރުގަދަކޮށެވެ. އެގޮތުން ފުރަތަމަ 20 މިނަޓުގައި މުޅި މެޗު ކޮންޓްރޯލް ކޮށްގެން ކުޅުނީ ޔުނުއިޓެޑުންނެވެ. މި މެޗުގައި ޔުނައިޓެޑުގެ ފުރަތަމަ ގޯލު މެޗުގެ 16 ވަނަ މިނަޓުގައި ކާމިޔާބު ކޮށްދިނީ ޖޭޑަން ސަންޗޯއެވެ.

ނަމަވެސް ޔުނައިޓެޑުގެ ގޯލާއި އެކު ލިވަޕޫލުން ވަނީ މެޗުގެ އޮއެވަރު ބަދަލުކޮށްލާ ގިނަ ހަމަލާތަކެއް އުފައްދާފައެވެ. ނަމަވެސް ޔުނައިޓެޑުގެ ޑިފެންސް ލައިނުން މި މެޗުގައި ފެނިގެން ގޮސްފައިވަނީ މޮޅު ކުޅުމެކެވެ. އެގޮތުން އެ ޓީމަށް އަލަށް ގުޅުނު ލިސާންޑްރޯ މާޓިނޭޒްގެ ކުޅުން ފާހަގަ ކޮށްލެވެއެވެ.

މެޗުގެ ފުރަތަމަ ހާފު ނިމުނީ 0-1 އިން ޔުނައިޓެޑު ކުރީގަ އޮވެގެންނެވެ. ލިވަޕޫލުން ދެވަނަ ހާފުވެސް ފެށީ ވަރުގަދަ ކޮށެވެ. ނަމަވެސް އެ ޓީމަށް ގޯލެއް ކާމިޔާބު ކުރެވުމުގެ ކުރިން މެޗުގެ 53 ވަނަ މިނަޓުގައި މާކަސް ރަޝްފޯޑް ވަނީ ޔުނައިޓެޑަށް ލީޑު ފުޅާ ކޮށްދީފައެވެ. މެޗުގައި ލިވަޕޫލުން ޖެހި ހަމަ އެކަނި ގޯލު ފެނިގެން ގޮސްފައިވަނީ މެޗުގެ 81 ވަނަ މިނަޓުގައެވެ. މި ގޯލު އެ ޓީމަށް ކާމިޔާބު ކޮށްދިނީ މުހައްމަދު ޞަލާހެވެ.

ލީގުގެ ފުރަތަމަ ދެމެޗުން ބަލިވުމާއި އެކު މި މެޗަށް ޔުނައިޓެޑުން ނުކުތީ ގިނަ ބަދަލުތަކަކާއި އެކުއެވެ. އެގޮތުން ކޯޗު ޓެން ހާގު ވަނީ ކެޕްޓަން ހެރީ މެގުއާ ގެ އިތުރުން ކްރިސްޓިއާނޯ ރޮނާލްޑޯވެސް ފުރަތަމަ އެގާރައިން އުނިކޮށްފައެވެ.

ލިވަޕޫލުން އަދި ޕްރިމިއާ ލީގުގެ މި ސީޒަނުގައި މެޗަކުން މޮޅުވެފައި ނުވާއިރު މިއީ ފަހުގެ ތާރީހެއްގައި އެ ޓީމުން އެންމެ ދައްކޮށް ލީގު ފެށި ފަހަރެވެ.

ޕްރިމިއާ ލީގުގައި ދެން ޔުނައިޓެޑުން މި މަހުގެ 27 ވަނަ ދުވަހު ސައުތަމްޓަންއާއި ދެކޮޅަށް ނުކުންނަ އިރު ލިވަޕޫލުން ހަމަ އެދުވަހު ނިކުންނާނީ ބޯންމައުތާއި ދެކޮޅަށެވެ.