ގާޒީ ސްކޫލުގެ ގްރޭޑް ހަތެއްގައި ކިޔަވަމުންދާ ދަރިވަރަކަށް ޖިންސީ ގޯނާ ކުރި ކަމުގެ ތުހުމަތުގައި ހަވަރަށް ދިން ޓީޗަރު ހުރީ އެ މައްސަލައިގައި ސަސްޕެންޑް ކޮޮށްފައި ކަމަށް އެޑުއިކޭޝަން މިނިސްޓްރީއިން ބުނެފިއެވެ.

މި މައްސަލައިގައި އެޑިއުކޭޝަން މިނިސްޓްރީއިން ބުނެފައިވަނީ ޓިއުޝަން ދިނުމަށް ކަމަށް ބުނެ ޓީޗަރުގެ ގެއަށް ގެންގޮސް ބަދު އަހުލާގީ މަންޒަރު ފެންނަ ވީޑިއޯއެއް ދެއްކި މައްސަލައެއް އެ މިނިސްޓްރީއަށް މި މަހުގެ 17 ވަނަ ދުވަހު ހުށަހަޅާފައިވާ ކަމަށެވެ. އަދި އެ މައްސަލައިގައި ތުހުމަތު ކުރެވޭ ޓީޗަރު ވަނީ ސްކޫލަށް ހާޒިރު ނުވެވޭ ގޮތަށް ސަސްޕެންޑްކޮށް ފުލުހުންނަށް މައްސަލަ ރިޕޯޓު ކޮށްފައިވާނެ ކަމަށްވެސް އެޑިއުކޭޝަން މިނިސްޓްރީއިން ބުނެފައިވެއެވެ.

ހުޅުމާލެ ދެވަނަ ފިޔަވަހީގައި މިރޭ ގާޒީ ސްކޫލުގެ ޓީޗަރަކު ހަވަރަށް ދީފައިވަނީ އެ ސްކޫލުގެ ގްރޭޑު 7 ގައި ކިޔަވަމުން އަންނަ ފިރިހެން ދަރިވަރަކަށް ޖިންސީ ގުޅުން ހިންގާ މަންޒަރު ފެންނަ ވީޑިއޯ ތަކެއް ދައްކައި ޖިންސީގޯނާކުރި ކަމުގެ ތުހުމަތުގައި އެ ކުއްޖާގެ އާއިލާ އަދި އާންމުން ނިކުމެފައެވެ.

މި މައްސަލައިގައި ފުލުހުން ބުނެފައިވަނީ ހުޅުމާލެ ދެވަނަ ފިޔަވަހީގައި މީހަކަށް ބަޔަކު އަނިޔާކުރާ ކަމުގެ ރިޕޯޓެއް ލިބުމާއި ގުޅިގެން ފުލުހުން އެތަނަށް ގޮސް އެކަން ހުއްޓުވާފައިވާ ކަމަށެވެ. އަދި އަނިޔާ ލިބުނު 29 އަހަރުގެ ދިވެހި ފިރިހެން މީހާ މިވަގުތު ހުރީ ފުލުހުންގެ ބެލުމުގެ ދަށުގައި ކަމަށްވެސް ފުލުހުން ވަނީ ބުނެފައެވެ. އަދި މި މައްސަލައިގައި ފުލުހުން ބަލަންޖެހޭ ކަންކަން ބަލަމުންދާ ކަމަށްވެސް އެ އިދާރާއިން ވަނީ ބުނެފައެވެ.

ފުލުހުންނަށް މި މައްސަލަ ހުށަހަޅާފައިވަނީ މި މަހުގެ 15 ވަނަ ދުވަހުގައި ކަމަސް ފުލުހުން މައުލޫމާތު ދެއެވެ. ނަމަވެސް މިހާތަނަށް އޭނާ ހައްޔަރުނުކޮށް ވަނީ ކީއްވެކަމެއް ފުލުހުން ހާމަކޮށްފައެއްނުވެއެވެ.