ޗެލްސީ ދޫކޮށް އިޓަލީއަށް ނިސްބަތްވާ އުމުރުން 28 އަހަރުގެ ޑިފެންޑަރު އެމާސަން ޕަލްމެރީ ވެސްޓްހަމް ޔުނައިޓެޑަށް ބަދަލުވެއްޖެއެވެ.

ވެސްޓްހަމްއިން މިހާރު އެމާސަން ސޮއެ ކުރިކަން އާންމު ކޮށްފައިވާއިރު އެމާސަން އަކީ 2021 ވަނަ އަހަރު ޗެލްސީއިން ޔޫއެފާ ޗެމްޕިއަންސް ލީގުގެ ކާމިޔާބީގައި ބޮޑު ރޯލެއް އަދާ ކޮށްފައެވެ. ނަމަވެސް މިދިޔަ ސީޒަނުގައި އޭނާއަށް ވަނީ ފުރަތަމަ އެގާރައިން ފުރުސަތު ގެއްލި ލޯނު އެއްބަސްވުމެއްގެގެ ދަށުން ފްރާންސްގެ ލިޔޯންގައި މިދިޔަ ސީޒަން ހޭދަ ކޮށްފައެވެ.

ވެސްޓްހަމް އިން އެމާސަން ގެންދިއުމަށް ގިނަ ދުވަސްތަކަކަށް މަޝްވަރާ ކުރުމަށްފަހު ޗެލްސީއާއި އެކު އެއްބަސްވެފައިވަނީ 13 މިލިޔަން ޔޫރޯގެ އަގަކަށެވެ. މީގެ އިތުރުން މި އެއްބަސްވުމުގެ ދަށުން ބޯނަހުގެ ގޮތުގައި ވެސްޓްހަމްއިން 2 މިލިޔަން ޔޫރޯ ދައްކަން ޖެހޭނެއެވެ. މިއީ މި ހޫނު މޫސުމުގެ ޓްރާންސްފާ ވިންޑޯގައި ވެސްޓްހަމްއިން ސޮއިކުރި ހަތްވަނަ ކުޅުންތެރިޔާކަން ފާހަގަ ކޮށްލެވެއެވެ.

އެމާސަން ވެސްޓަހަމް އާއިއެކު އެއްބަސްވުން ހަދާފައިވަނީ ހަތަރު އަހަރުގެ މުއްދަތަކަށެވެ. ބެލެވޭ ގޮތުގައި ވެސްޓްހަމް އިން މި މަހުގެ 28 ވަނަ ދުވަހު އެސްޓަން ވިލާއާއި ދެކޮޅަށް ކުޅޭ މެޗުގައި އެމާސަން ފެނިގެންދާނެއެވެ.