މެންޗެސްޓާ ޔުނައިޓެޑުގެ ކެޕްޓަން ހެރީ މެގުއާ ވިއްކާލަން އެ ޓީމުން ބޭނުން ނުވާ ކަމަށް ރިޕޯޓުތައް ބުނެފިއެވެ.

މެގުއާ ޔުނައިޓެޑު ދޫކޮށްލަން އުޅޭ ކަމުގެ އަޑުތައް ގަަދަވާން ފަށައިފައި ވަނީ ޗެލްސީއިން ލެސްޓާ ސިޓީގެ ޑިފެންޑަރ ވެސްލީ ފޮފާނާ ނުގެނެވިއްޖެ ހާލަތެއްގައި މެގުއާ ގެންދިއުމަށް މަސައްކަތް ކޮށްފާނެ ކަމަށް ރިޕޯޓު ތަކުން ބުނުމާއި އެކުގައެވެ. ލެސްޓާ އިން ވަނީ މިހާތަނަށް ޗެލްސީއިން ފޮފާނާ ގަތުމަށް ކުރި ތިން ބިޑުވެސް އަނބުރާ ފޮނުވާލާފައެވެ.

ނަމަވެސް ޔުނައިޓެޑުން އެ ޓީމުގެ ކެޕްޓަން ވިއްކާލަން ބޭނުން ނުވާ ކަމަށާއި ޗެލްސީއިން މިހާތަނަށް މެގުއާ ގަތުމަށް ޔުނައިޓެޑާއި މަޝްވަރާ ކޮށްފައިނުވާ ކަމަށް ރިޕޯޓުތައް ބުނެފައިވެއެވެ. ބެލެވޭ ގޮތުގައި ޗެލްސީއިން ފޮފާނާ ގަތުމަށް އިތުރު ބިޑެއް ލެސްޓާއަށް ހުށަހަޅާނެއެވެ.

Advertisement

ފާހަގަ ކޮށްލެވޭ ގޮތުގައި ޔުނައިޓެޑުގެ ކެޕްޓަން ކަމުގައި ވީނަމަވެސް އެންމެ ފަހުން އެ ޓީމުން ލިވަޕޫލް ބަލިކުރި މެޗުގައި ކޯޗު ޓެން ހާގު ވަނީ މެގުއާ ފުރަތަމަ އެގާރައިން އުނިކޮށްފައެވެ. އަދި އެ މެޗުގައި މެގުއާ ނުލާ ޔުނައިޓެޑުގެ ޑިފެންސް ލައިނުން މޮޅު ކުޅުމެއް ދައްކާފައިވާއިރު ދެން މެގުއާ އަށް ދެން ފުރަތަމަ އެގާރައިން ޖާގަ ހޯދުމަށް އުނދަގޫ ވާނެ ކަމަށް ބެލެވެއެވެ.

ރިޕޯޓުތައް ބުނާ ގޮތުގައި ޕްރިމިއާ ލީގުގައި ދެން ޔުނައިޓެޑުން އަންނަ ހޮނިހިރު ދުވަހު ކުޅޭ މެޗުގައި ވެސް މެގުއާ ފުރަތަމަ އެގާރައިގައި ނުހިމެނޭނެއެވެ.