ދިވެހި ޕްރިމިއާ ލީގުގެ ކޮލިފިކޭޝަންގެ ފުރަތަމަ މެޗުގައި ސުޕަ ޔުނައިޓެޑް ސްޕޯޓްސް (ސަސް) އިން ދެ ވަނަ ޑިވިޝަންގެ ޗެމްޕިއަން ބުރު ސްޕޯޓްސް ކްލަބް ބަލިކޮށްފިއެވެ.
ގަލޮޅު ރަސްމީ ދަނޑުގައި ކުޅެވުނު މި މެޗުގައި ސަސް އިން ބުރު ބަލިކޮށްފައިވަނީ 0-2 ގެ ނަތީޖާއަކުންނެވެ. ސަސް އިން މެޗު ފަށައިފައިވަނީ ވަރުގަދަކޮށެވެ. އެގޮތުން ފުރަތަމަ ވިހި މިނަޓުގައި ބޯޅަ ކޮންޓްރޯލްކޮށް ގިނަ ހަމަލާތަކެއް އުފައްދާފައިވަނީ ސަސް އިންނެވެ. ނަމަވެސް އޭގެ ފަހުން ބުރުން ވަނީ މަޑުމަޑުން މެޗުގެ ތެރެއަށް ވަދެ ސަސް އަށް މާބޮޑު ކޮންޓްރޯލެއް ނުދީ ހަމަލާތައް އުފައްދަން ފަށާފައެވެ. މެޗުގެ ފުރަތަމަ ހާފުގައި ދެ ޓީމުގެ ޑިފެންޑަރުންގެ ހުށިޔާރު ކުޅުމާއި އެކު އެއްވެސް ޓީމަކަށް ގޯލެއް ކާމިޔާބު ކުރެވޭ ގޮތެއް ނުވިއެވެ.
ސަސް އިން ދެވަނަ ހާފަށް ނުކުތީ ވެސް މެޗު ފެށި ގޮތަށެވެ. އެގޮތުން ދެވަނަ ހާފުގެ ހަަތަރުވަނަ މިނަޓުގައި ސަސްއިން ވަނީ މެޗުގެ ފުރަތަމަ ގޯލު ޖަހާ ލީޑު ނަގާފައެވެ. މި ގޯލު ސަސް އަށް ކާމިޔާބު ކޮށްދިނީ އަހުމަދު ހަމީދު (އައްމަޑޭ) އެވެ. އެއަށްފަހު ބުރުގެ ހުނަރުވެރި ފޯވާޑު ތަޝްމީން ވަނީ ހިލޭ ޖެހުމަކުން ސަސްގެ ގޯލުގެ ހުރަސް ދަނޑީގައި ވެސް ޖަހައިފައެވެ.
އެއަށްފަހު ވެސް ބުރުން ވަނީ ފުރުސަތު ތަކެއް އުފައްދާ މެޗުގެ ނަތީޖާ އެއްވަރު ކުރުމަށް މަސައްކަތް ކޮށްފައެވެ. ނަމަވެސް ބުރަށް ނަތީޖާ އެއްވަރު ނުކުރެވި ސަސް އިން ދެވެނަ ގޯލެއް ޖެހީ މެޗުގެ އިތުރުވަގުތުގެ ފަހު ސިކުންތު ކޮޅުގައެވެ. މި ގޯލު އެ ޓީމަށް ކާމިޔާބު ކޮށްދިނީ އައިހަމް އަހުމަދު (އައިހު) އެވެ.
އަންނަ ސީޒަނުގެ ދިވެހި ޕްރިމިއާ ލީގަށް ކޮލިފައި ވުމަށް ކުޅެވޭ ކޮލިފިކޭޝަންގައި ބުރު އަދި ސަސްގެ އިތުރުން ދެން ވާދަކުރަނީ މި ސީޒަނުގެ ދިވެހި ޕްރިމިއާ ލީގުގެ ފުލަށް ދިޔަ، ދަ ގްރާންޑޭ ސްޕޯޓްސް ކްލަބާއި ދެ ވަނަ ޑިވިޝަންގެ ރަނަރަޕް ކްލަބް ޓީނޭޖް އެވެ. މި ހަތަރު ޓީމުގެ މެދުގައި ލީގު ބުރެއް ކުޅުމަށް ފަހު އެންމެ ގިނަ ޕޮއިންޓް ހޯދާ ދެ ޓީމެއް އަންނަ އަހަރުގެ ދިވެހި ޕްރިމިއާ ލީގަށް ކޮލިފައިވާނެ އެވެ.
Advertisement
This content is created and paid for by advertisers and does not involve Voice Journalists
