މި ސީޒަނުގެ ޔޫއެފާ ޗެމްޕިއަންސް ލީގް ގްރޫޕު ސްޓޭޖްގެ ގުރުއަތުލުން މިރޭ ރާއްޖެ ގަޑިން 9:00 ގައި އޮންނާނެއެވެ.

ތުރުކިޔޭގެ ވެރި ރަށް އިސްތަންބޫލުގައި މިރޭ ބާއްވާ ޔޫރަޕުގެ އެންމެ ޝަރަފުވެރި ކްލަބު ފުޓްބޯޅަ މުބާރާތުގެ ގުރުއަތުލުމުގައި އެންމެ ފަހުގެ ޗެމްޕިއަން ރެއާލް މެޑްރިޑް އަދި މިސީޒަނުގެ މުބާރާތަށް ކޮލިފައިވި އިތުރު 31 ޓީމު ބައިވެރި ވާނެއެވެ. ޗެމްޕިއަންސް ލީގު ގުރުއަތު ލުމުގެ ހަފްލާގައި ކުރީގެ މަޝްހޫރު ގިނަ ކުޅުންތެރިންވެސް ފެނިގެންދާނެއެވެ. އެގޮތުން މިރޭގެ ހަފްލާގައި އިޓަލީގެ ލެޖެންޑަރީ ދެ ޑިފެންޑަރުން ކަމަށްވާ ހަވިއޭ ޒަނެޓީ އަދި ޕައުލޯ މަލްޑިނީ ވެސް ފެނިގެންދާނެއެވެ.

ޗްމްޕިއަންސް ލީގު ގުރުއަތުގައި މުބާރާތަށް ހޮވުނު 32 ޓީމު ޖުމްލަ 8 ގްރޫޕަކަށް ބެހިގެންދާއިރު ކޮންމެ ގްރޫޕެއްގައިވެސް 4 ޓީމު އޮންނާނެއެވެ. ގުރުއަތު ލުމުގައި ޓީމު ތަކުން ކޮލިފައިވި މިނަށް ބަލާ 8 ޓީމުގެ 4 ޕޮޓަކަށް ޓީމުތައް ވަނީ ބެހިފައެވެ. އެ ގޮތުން ފުރަތަމަ ޕޮޓުގައި ހިމެނެނީ ހުރިހާ ގައުމެއްގެ ލީގު ޗެމްޕިއަނުންނެވެ. ކޮންމެ ޕޮޓަކުން އެއް ޓީމެއް ނެގުމަށްފަހު ގްރޫޕުތައް ބެހިގެން ދާނެއެވެ.

ޗެމްޕިއަންސް ލީގް ގުރުއަތު ލުމުގެ ޕޮޓުތައް

މިރޭގެ ހަފްލާގައި ޗެމްޕިއަންސް ލީގު ގުރުއަތުލުމުގެ އިތުރުން ޔޫއެފާއިން ހޮވާ މަގާމުތަކައް އެވޯޑު ހަވާލުކުރުންވެސް ކުރިއަށްދާނެއެވެ. ރިޕޯޓުތައް ބުނާ ގޮތުން ޔޫއެފާއިން ހޮވާ އަހަރުގެ އެންމެ މޮޅު ފުޓްބޯޅަ ކުޅުންތެރިޔާގެ އެވޯޑު މިފަހަރު ލިބޭނީ ރެއާލް މެޑްރިޑުގެ ކެޕްޓަން ކަރީމް ބެންޒެމާއަށެވެ. މީގެ އިތުރުންވެސް އެންމެ މޮޅު ކޯޗު ގެ އެވޯޑު އަދި އަންހެން އެންމެ މޮޅު ކުޅުންތެރިޔާ އަދި ކޯޗުގެ އެވޯޑުވެސް މިރޭގެ ހަފްލާގައި ދެވޭނެއެވެ.