ޔޫއެފާ އިން ހޮވާ މި އަހަރުގެ އެންމެ މޮޅު ފިރިހެން ފުޓްބޯޅަ ކުޅުންތެރިއާގެ އެވޯޑް، ރިއާލް މެޑްރިޑުގެ ކެޕްޓަން ކަރީމް ބެންޒެމާ އަށް ދީފިއެވެ.

މި މަގާމަށް ބެންޒެމާ ހޮވުނުކަން އިއުލާން ކޮށްފައިވަނީ ޔޫއެފާއިންދޭ އަހަރުގެ އެވޯޑުތައް ދިނުމަށް އަދި ޔޫއެފާ ޗެމްޕިއަންސް ލީގުގެ ގުރޫޕު ސްޓޭޖުގެ ގުރުއަތުލުން ނެގުމަށް ތުރުކިޔޭގެ ވެރިރަށް އިސްތަންބޫލުގައި ބޭއްވި ހަފްލާއެއްގައެވެ.

މިދިޔަ ސީޒަނުގައި މޮޅު ކުޅުމެއް ދައްކާފައެވެ. އެގޮތުން ކުލަބް ލެވަލްގައި ޖުމްލަ 46 މެޗު ކުޅެ ބެންޒެމާ ވަނީ އެ ރެއާލަށް 44 ގޯލު ކާމިޔާބު ކޮށްދީފައެވެ.

Advertisement

ބެންޒެމާ އެންމެ މޮޅު ކުޅުންތެރިޔާގެ އެވޯޑް ހޯދީ 523 ޕޮއިންޓުންނެވެ. ދެ ވަނަ އަށް ދިޔައީ 122 ޕޮއިންޓް ހޯދި މެންޗެސްޓާ ސިޓީގެ ކެވިން ޑި ބްރޭނާ އެވެ. އަދި ތިން ވަނަ އަށް ދިޔައީ 118 ޕޮއިންޓް ހޯދި ރެއާލްގެ ކީޕަރު ތިބައު ކޯޓުއާ އެވެ.

ޔޫއެފާއިން ހޮވި މި އަހަރުގެ އެންމެ މޮޅު އަންހެން ކުޅުންތެރިއަކަށް ބާސެލޯނާގެ ތަރި އަލެކްސިއާ ޕުޓޭޔާސް އެވެ. މިދިޔަ ސީޒަނުގައި ބާސެލޯނާގެ އަންހެން ޓީމުން ކުޅުނު އެންމެ މެޗެއް ފިޔަވައި ހުރިހާ މެޗެެއް ވަނީ ކާމިޔާބު ކޮށްފައެވެ.

މި އަހަރުގެ އެންމެ މޮޅު ކޯޗަކަށް ހޮވިފައިވަނީ ރެއާލް މެޑްރިޑަށް 14 ވަނަ ފަހަރު ޗެމްޕިއަންސް ލީގު ކާމިޔާބު ކޮށްދިން ކާލޯ އަންޗެލޮޓީ އެވެ. އަންޗެލޮޓީ ވާދަކުރީ މެންޗެސްޓާ ސިޓީގެ ޕެޕް ގާޑިއޯލާ އާއި ލިވަޕޫލްގެ ޔާގެން ކްލޮޕްއާ އެވެ. އަންޗެލޮޓީ އަށް 526 ޕޮއިންޓް ލިބުނުއިރު، ކްލޮޕް ދެ ވަނަ އަށް ދިޔައީ 210 ޕޮއިންޓް ހޯދައިގެންނެވެ. ތިން ވަނަ ހޯދި ގާޑިއޯލާ އަށް ލިބުނީ 108 ޕޮއިންޓެވެ.