ޗެމްޕިއަންސް ލީގުގައި ސްޕެއިންގެ ބާސެލޯނާއިން އެންމެ ބޮޑު ނަތީޖާއަކުން އެ ޓީމެއްގެ ކައިރިން ބަލިވި ޖަރުމަނުގެ ބަޔާން މިއުނިކާއި އެއް ގުރޫޕެއްގައި ހިމެނިއްޖެއެވެ. 2020 ވަނަ އަހަރު އެ މުބާރާތުގެ ކުއާޓާ ފައިނަލުގައި ބަޔާން އަތުން ބާސާ ބަލިވީ 8-2 ގެ ނަތީޖާއަކުންނެވެ. އަދިވެސް އެ ނާކާމިޔާބީގެ ހަނދާންތައް ބާސާގެ ގިނަ ކުޅުންތެރިންނާއި ސަޕޯޓަރުންގެ ބޮލުން ނުފިލައެވެ.

ބާސާ އަދި ބަޔާންގެ އިތުރުން ގުރޫޕު ސީގައި ހިމެނެނީ އިޓަލީގެ އިންޓާ މިލާންގެ އިތުރުން ޗެކް ރިޕަބްލިކްގެ ވިކްޓޯރިއާ ޕްލެޒެން އެވެ. މިއީ މި ސީޒަނުގެ ޗެމްޕިއަންސް ލީގުގައި ފެނިގެންދާ އެންމެ ވަރުގަދަ ގުރޫޕެވެ.

ގްރޫޕް ސީ އަށްފަހު އެންމެ ވާދަވެރިކޮށް އޮތީ ގުރޫޕް އެޗް އަދި އޭ އެވެ.

Advertisement

ގުރޫޕް އޭގައި ހޮލެންޑުގެ ޗެމްޕިއަނުން އަޔަކްސްގެ އިތުރުން އިނގިރޭސި ވަރުގަދަ ކްލަބު ލިވަޕޫލް ހިމެނޭއިރު އިޓަލީގެ ނަޕޯލީ އަދި ސްކޮޓްލޭންޑުގެ ރޭންޖާސްވެސް ހިމެނެނީ އެ ގުރޫޕުގައެވެ. މިދިޔަ ސީޒަނުގައި ރަނގަޅު ކުޅުމެއް ދެއްކި އަޔަކްސް ވަނީ މި އަހަރުގެ ސީޒަންވެސް ވަރުގަދަކޮށް ފަށާފައެވެ. ނަމަވެސް ލިވަޕޫލުން މި ސީޒަނުގައި އަދި މެޗަކުން މޮޅުވެފައެއް ނުވެއެވެ.

ގުރޫޕު އެޗްގައިި ހިމެނެނީ ފްރާންސްގެ ޗެމްޕިއަން ޕީއެސްޖީގެ އިތުރުން އިޓަލީގެ ޔުވެންޓަސްއެވެ. ޕީއެސްޖީއިން ވިދިވިދިގެން ފްރާންސް ލީގު ހޯދަމުން ދިޔަ ނަމަވެސް އެ ކްލަބުން އެންމެ ބޮޑު ހަރަދެއް ކުރަނީ އެ ކްލަބުގެ ތާރީހުގައި ފުރަތަމަ ފަހަރަށް ޗެމްޕިއަންސް ލީގު ހޯދުމަށެވެ. ޔުވެންޓަސްއިންވެސް ޗެމްޕިއަންސް ލީގު ހޯދުމަށް ގިނަ މަސައްކަތްތަކެއް ކޮށްފައެވެ. ނަމަވެސް މުބާރާތުގެ އެންމެ ކާމިޔާބު ކުޅުންތެރިއާ ކްރިސްޓިއާނޯ ރޮނާލްޑޯ ގެންގޮސްގެންވެސް އެ ކުލަބަށް ވަނީ މި މުބާރާތް ކާމިޔާބު ކުރެވޭ ގޮތް ނުވެފައެވެ. މި ގުރޫޕުގައި ދެން ހިމެނެނީ ޕޯޗުގަލްގެ ބެންފިކާގެ އިތުރުން އިސްރާއިލުގެ މަކައްބި ހައިފާއެވެ.

ޗެމްޕިއަންސް ލީގުގެ އެންމެ ފަހުގެ ޗެމްޕިއަނުން ރެއާލް މެޑްރިޑު ހިމެނޭ ގްރޫޕް އެފް އަކީ މިފަހަރު މުބާރާތުގެ  އެންމެ ފަސޭހަ ގުރޫޕެވެ. އެ ގުރޫޕުގައި ދެން ހިމެނެނީ ޖަރުމަނުގެ އާރްބީ ލައިޕްޒިގު، ޔޫކްރޭންގެ ޝަހުތަރު ޑޮނެސްކް އަދި ސްކޮޓްލޭންޑުގެ ސެލްޓިކް އެވެ.

މި ސީޒަނުގެ ޗެމްޕިއަންސް ލީގުގެ ގުރޫޕް ސްޓޭޖުގެ މެޗުތައް ފެށުމަށް ހަމަޖެހިފައިވަނީ އަންނަ ސެޕްޓެމްބަރ މަހުގެ ހަވަނަ ދުވަހުއެވެ.