ޔޫތު މިނިސްޓަރ އަހްމަދު މަހްލޫފުގެ މައްޗައް ކުރާ ރިޝްވަތުގެ ދައުވާގެ ޝަރީއަތް މާދަމާއަށް ކްރިމިނަލް ކޯޓުން ތާވަލު ކޮށްފިއެވެ.
މިވަގުތު މިނިސްޓަރ މަހްލޫފު ހުންނެވީ ރައީސް ޞާލިހުގެ އަރިހުގައި އެމަނިކުފާނު މ. އަތޮޅަށް ކުރައްވަމުން ގެންދެވާ ދަތުރުފުޅުގައި ބައިވެރިވުމަށް މާލެއިިން ބޭރުގައެވެ. މިއަދު މ. ދިއްގަރުގައި ބޭއްވި އެކުވެރިކަމުގެ ވޮލީ މެޗެއްގައި ވެސް އެ ދެ ބޭފުޅުން އެއް ޓީމަކަށް ކުޅުއްވި އެވެ.
މާދަމާ ހެދުނު ނުވައެއް ޖަހާއިރަށް ތާވަލުކޮށްފައިވާ ޝަރީއަތުގެ އަޑުއެހުން ކުރިއަށް ގެންދިއުމަށް ހަމަޖެހިފައިވަނީ އޮންލައިންކޮށެވެ.
މީގެ ކުރިންވެސް މަހްލޫފުގެ މައްޗައް ކުރާ ރިޝްވަތުގެ ދައުވާ ކުރިއަށް ދިޔައިރު ރައީސް ޞާލިހް އާއި އެކު އެބޭފުޅާ އެކި ދަތުރު ތަކުގައި ބައިވެރި ވަމުން ގެންދެވުމުން ފާޑުކިޔުން އަމާޒުވެ އެ ފަހަރު މަހްލޫފު ވަނީ މިނިސްޓަރު ކަމުން ސަސްޕެންޑުވެސް ކުރައްވާފަކަން ފާހަގަ ކޮށްލެވެއެވެ. މައްސަލަ ފެށުނީއްސުރެވެސް މިނިސްޓަރ މަހްލޫފު ގެންދަވަނީ މި ދައުވާ އަށް އިންކާރު ކުރައްވަމުންނެވެ.
މަހްލޫފްގެ މައްޗަށް ރިޝްވަތުގެ ދައުވާކުރީ އޭބޭފުޅާ ރައްޔިތުންގެ މަޖިލީހުގެ މެމްބަރަކަށް ހުންނެވިއިރު އެސްއީޒެޑް ބިލަށް ވޯޓުު ދިނުމަށްޓަކައި 33،000 ޑޮލަރު ކުރީގެ ނައިބު ރައީސް އަހުމަދު އަދީބުގެ އަތުން ނެންގެވި ކަމަށް ބުނެ އެވެ. ނަމަވެސް މި ދައުވާ މީގެ ކުރިން ކްރިމިނަލް ކޯޓުން ވަނީ މަދަނީ މިންގަނޑުން ބަލާއިރު އެ މައްސަލަ ކުރިއަށް ގެންދެވޭނެ މިންވަރުގެ ހެކި ނެތް ކަމަށް ބުނެ ބޭރުކޮށްލައިފަ އެވެ.
ކްރިމިނަލް ކޯޓުން މައްސަލަ ބެއްލެވި ގާޒީ މުހައްމަދު މިސްބާހު ވިދާޅުވެފައިވަނީ މިނިސްޓަރ މަހްލޫފަށް 33،000 ޑޮލަރު ލިބުނުކަން ސާބިތު ކުރެވެން އޮތް ނަމަވެސް، އެ ފައިސާ އަކީ އެސްއީޒެޑް ބިލަށް ވޯޓު ދިނުމުން ރިޝްވަތުގެ ގޮތުގައި ދިން ފައިސާއެއް ކަން ސާބިތުކޮށްދެވޭނެ ކަމަށް ނުފެންނަ ކަމަށެވެ. އެހެންވެ، ޝަރީއަތުގެ މަރުހަލާ ކުރިއަށް ގެންގޮސް ހެކިބަސް ނެގިޔަސް އެ ދައުވާ ސާބިތު ކުރެވޭނެ ކަމަށް ނުފެންނާތީ އެ ދައުވާ ކުރިއަށް ނުގެންދަން ނިންމައި، ދައުވާ ބާތިލްކުރީ ކަމަށެވެ.
ނަމަވެސް ކްރިމިނަލް ކޯޓުގެ ނިންމުން ގޯސް ކަމަށާއި އެ މައްސަލަ އަލުން އެ ކޯޓުން ބަލަން ހައި ކޯޓުން ވަނީ ހުކުމް ކޮށްފައެވެ.
Advertisement
This content is created and paid for by advertisers and does not involve Voice Journalists
