މަސްތުވާތަކެތީގެ ވަބާގައި ޖެހިފައި ތިބި ގައިދީންނަށް ޚާއްސަކޮށްގެން ހިންގި ޕްރިޒަން ބޭސް ރިހިބިލިޓޭޝަން ޕްރޮގްރާމު ފުރިހަމަކޮށް އެ މީހުން މުޖުތަމައަށް ނުމަކީ މުޖުތަމައުގެ ސަލާމަތަށް އެޅުނު އުސްފިޔަވަޅެއްކަމަށް ހޯމް މިނިސްޓަރު އިމްރާނު އަބްދުﷲ ވިދާޅުވެއްޖެއެވެ. 

ޕްރިޒަން ބޭސް ރިހިބިލިޓޭޝަން ޕްރޮގްރާމު މުހިމަކުރި 32 ގައިދީނަށް ޝަރުތުތަކާއެކު އާއިލާއެކު އުޅުމުގެ ފުރުސަތު ފަހިކޮށްދެވިފައިވާކަން މޯލްޑިވްސް ކަރެކްޝަނަލް ސާރވިސްއިން ވަނީ ހާމަކޮށްފައެވެ. 

އެ ޕްރޮގްރާމަކީ ރާއްޖޭގައި މިފަދައިން ހިންގުނު ފުރަތަމަ ޕްރޮގްރާމެވެ. 

Advertisement

ކާމިޔާބުކަމާއެކު އެފަދަ ޕްރޮގްރާމެއް ނިންމާލެވުނުކަން ފާހަގަކުރައްވާ ހޯމް މިނިސްޓަރު ކުރެއްވި ޓްވީޓެއްގައި ވިދާޅުވީ ޖަލުގައި ހިންގުނު އެ ޕްރޮގާމު ފުރިހަމަ ކުރި ފަރާތްތައް މުޖުތަމައަށް ނެރުމަކީ މަސްތުވާތަކެތީގެ ވަބާއިން މުޖުތަމައު ސަލާމަތް ކުރުމަށް އެޅުނު އުސް ފިޔަވަޅެއްކަމަށެވެ. 

"ރާއްޖޭގެ ތާރީހުގައި ފުރަތަމަ ފަހަރަށް ޖަލުގެ ތެރޭގައި ޑްރަގް ރިހިބިލިޓޭޝަން ޕްރޮގްރާމު ކުރި ގައިދީން ކޮމިއުނިޓީއަށް ރީ-އިންޓަރގްރޭޓް ކުރުމަކީ މަސްތުވާތަކެތީގެ ވަބާއިން މުޖުތަމައު ސަލާމަތް ކުރުމަށް އެޅުނު އުސް ފިޔަވަޅެއް" އިމްރާނު ވިދާޅުވިއެވެ. 

ކަރެކްޝަނަލް ސާވިސްއިން އާންމުކޮށްފައިވާ ގޮތުން، ޖަލުގައި ކުރިއަށް ގެންދިޔަ ރިހެބިލިޓޭޝަން ޕްރޮގްރާމްގެ ދަށުން އާއިލާތަކާއި ހަވާލު ކުރެވިފައިވާ ގައިދީންތައްވަނީ އެއް އަަހަރު ދުވަހުގެ މުއްދަތަކަށް ޝަރުތުތަކެއް ކުރެވިފައެވެ.

އެމީހުން އާއިލާތަކާއި ހަވާލުކޮށްފައިވަނީ ކަރެކްޝަންއިން އެމީހުންގެ ކަންކަން މޮނިޓަރ ކުރާގޮތަށެވެ.