ހޮލެންޑުގެ އަޔަކްސްއިން އެ ޓީމުގެ ތަރި އެންޓޮނީ އިނގިރޭސި ވިލާތުގެ ވަރުގަދަ ބާރު މެންޗެސްޓާ ޔުނައިޓެޑާއި ވިއްކާލުމަށް  އެއްބަސްވެއްޖެއެވެ.

ބްރެޒިލްއަށް ނިސްބަތްވާ އެންޓޮނީ ޔުނައިޓެޑަށް ވިއްކާލުމަށް އަޔަކްސްއިން އެއްބަސްވެފައިވަނީ ބޯނަސްއާއި އެކު 100 މިލިއަން ޔޫރޯގެ އަގަކަށެވެ. މިއީ ހޮލެންޑު ލީގުގެ ޓީމަކުން މިހާތަނަށް ކުޅުންތެރިއަކު ވިއްކި އެންމެ ބޮޑު އަގުކަން ފާހަގަ ކޮށްލެވެއެވެ. އަދި ޔުނައިޓެޑާއި އެކު 2027 ވަނަ އަހަރާއި ހަމައަށް ކޮންޓްރެކްޓުގައި މާދާމާ އެންޓޮނީ ސޮއެކުރާނެ ކަމަށް ރިޕޯޓުތައް ބުނެއެވެ.

މިދިޔަ ސީޒަނުގައި އެންޓޮނީ ވަނީ އަޔަކްސްއަށް ކުޅުނު 23 މެޗުން އަށް ގޯލު އެ ޓީމަށް ކާމިޔާބު ކޮށްދީފައެވެ. އަދި މިހާރު ޔުނައިޓެޑުގެ ކޯޗު އަދި ކުރިން އެންޓޮނީއަށް އަޔަކްސްއަށް އިރުޝާދުދިން ކޯޗު، ޓެން ހާގް ގެ ކުޅުމުގެ ވައްޓަފާޅިއަށް އެންޓޮނީ އަކީ ވަރަށް މުހިންމު ކުޅުންތެރިއެކެވެ.

އެންޓޮނީ ވެގެން ގޮސްފައިވަނީ ޓެން ހާގް އަޔަކްސް ދޫކޮށް ޔުނައިޓެޑާއި ގުޅުނު ފަހުން، ޔުނައިޓެޑުން ގެނައި އަޔަކްސްގެ ދެވަނަ ކުޅުންތެރިޔާއަށެެވެ. އެގޮތުން އާޖެންޓީނާގެ ޑިފެންޑަރު ލިސާންޑްރޯ މާޓިނޭޒް ވެސް ވަނީ ޔުނައިޓެޑާއި ގުޅިފައެވެ. މީގެ އިތުރުން ޔުނައިޓެޑުން އަޔަކްސްގެ ޑިފެންޑަރު ޖުރިއެން ޓިމްބާ ގެނައުމަށްވެސް ވަނީ މަސައްކަތް ކޮށްފައެވެ. ނަމަވެސް ޓިމްބާ ވަނީ އަޔަކްސްގައި މަޑުކުރުމަށް ނިންމާފައެވެ.

މި އަހަރުގެ ޕްރިމިއާ ލީގުގައި ކުޅުނު ފުރަތަމަ ދެ މެޗުން ބަލިވުމާއި އެކު ޔުނައިޓެޑުން ވަނީ ޓްރާންސްފާ މާރކެޓުގައި ގިނަ މަސައްކަތް ތަކެއް ކޮށް ރެއާލްގެ ކަސެމީރޯވެސް ގެނެސްފައެވެ. އަދި ޔުނައިޓެޑުން ވަނީ އެ ޓީމުން ކުޅުނު ފަހު ދެ މެޗު ކާމިޔާބުކޮށް މި ސީޒަނުގެ އޮއެވަރު އަނބުރާލުމަށް އަމާޒު ހިފާފައެވެ.

ބެލެވޭ ގޮތުގައި ދެން ލީގުގައި ޔުނައިޓެޑުން ލެސްޓާއާއި ދެކޮޅަށް ކުޅޭ މެޗު ނުވަތަ އެއަށްފަހު އާސެނަލްއާއި ދެކޮޅަށް ކުޅޭ މެޗުގައި އެންތޮނީ ފެނުމުގެ ފުރުސަތު ބޮޑެވެ.