ލަލީގާގައި އެފް ސީ ބާސެލޯނާއިން ޖެހިޖެިހިގެން ދެވަނަ މެޗުގައި ހަތަރު ގޯލު ޖަހާ ވަލަޑޮލިޑް ބަލިކޮށްފިއެވެ.
ލީގު ތާވަލުގެ ފުލުން ދެވަނައިގައި އޮތް ވަލަޑޮލިޑާއި ދެކޮޅަށް އަމިއްލަ ދަނޑުގައި ބާސާއިން މެޗު ފެށީވެސް ވަރުގަދަ ކޮށެވެ. މި މެޗު ވެގެން ގޮސްފައިވަނީ މި ސީޒަނަަށް އެ ޓީމަށް ގުޅުނު ހުރިހާ ކުޅުންތެރިން ރަޖިސްޓްރީ ވެގެން ކުޅުނު ފުރަތަމަ މެޗަށެވެ. ރޭގެ މެޗުގައި ލީގުގައި ބާސާއަށް އަލަށް ކުޅުނު ޖޫލްސް ކުންޑޭ، ބާސާގެ ފުރަތަމަ ދެ މެޗުގައި ފެނިގެން ގޮސްފައިވަނީ ލަލީގާގައި ރަޖިސްޓްރީ ނުކުރެވިގެންނެވެ.
މެޗުގެ ކުރީކޮޅު މެޗުގެ ކޮންޓްރޮލް ނަގައި ބާސާއިން ވަނީ ވަލަޑޮލިޑުގެ ގޯލަށް ނުރައްކާ ކޮށްފައެވެ. އެގޮތުން ބާސާއަށް މެޗުގެ 24 ވަނަ މިނަޓުގައި ލީޑު ނަގައިދިނީ ރޮބާޓް ލެވަނޑޮސްކީއެވެ. ފުރަތަމަ ހާފު ނިމެން ދަނިކޮށް ބާސާއަށް ލީޑު ފުޅާ ކޮށްދީފައިވަނީ ޕެޑްރީއެވެ.
ދެވަނަ ހާފު ފެށިގެންވެސް ބާސާއިން ވަނީ ވަލަޑޮލިޑަށް މާގިނަ ފުރުސަތުތަކެއް އުފެއްދުމަށް ފުުރުސަތު ނުދީ ކޮންޓްރޯލިން ކުޅުމެއް ދައްކާފައެވެ. ބާސާއަށް މެޗުގައި ތިންވަނަ ގޯލު ޖަހައިދިނީ، އެ ޓީމަށް ފުރަތަމަ ގޯލުވެސް ޖަހައިދިން ލެވަނޑޮސްކީއެވެ. މިއީ ލަލީގާގައި އޭނާ ކުޅުނު ތިން މެޗުގައި ބާސާއަސް ޖަހައިދިން ހަތަރުވަނަ ގޯލެވެ. މެޗުގެ ނަތީޖާއަށް އަސަރު ކުރާވަރުގެ ކުޅުމެއް ވަލަޑޮލިޑުން ދެއްކިފައިނުވާއިރު، މެޗުގެ 90 މިނަޓު ހަމަވެ ދެއްކި އިތުރު ވަގުތުގެ ތެރޭގައި ބާސާއަށް ހަތަރުވަނަ ގޯލު ޖަހައިދިނީ ސާޖިއޯ ރޮބާޓޯއެވެ.
މި މޮޅާއި އެކު ބާސާ ވަނީ ލަލީގާ ތާވަލުގެ ތިންވަނަ އަށް ޖެހިލާފައެވެ. އެއްވަނައިގައި ކުޅުނު ތިން މެޗު ކާމިޔާބު ކޮށްގެން ނުވަ ޕޮއިންޓާއި އެކު ރެއާލް މެޑްރިޑް އޮތް އިރު ދެވަނައިގައި އޮތް ރެއާލް ބެޓިސްވެސް ވަނީ ހަމަ އެވަރަށް ޕޮއިންޓު ހޯދާފައެވެ. ބާސާއިން ދެން ލަލީގާގައި އަންނަ ހޮނިހިރު ދުވަހު ނުކުންނާނީ ވާދަވެރި ސެވިއްޔާއާއި ދެކޮޅަށެވެ.
Advertisement
This content is created and paid for by advertisers and does not involve Voice Journalists
