ލަލީގާގައި ރެއާލް މެޑްރިޑުން ރޭ ކުޅުނު މެޗުގައި އެސްޕަނިޔޯލް އާއި އެއްވަރުވާން ދަނިކޮށް ފަހުވަގުތު ޖެހި ދެގޯލުން ބެންޒެމާ އެ ޓީމު ސަލާމަތްކޮށްދީފިއެވެ.

ސްޕެނިޝް ލަލީގާގެ އެންމެ ފަހުގެ ޗެމްޕިއަނުން އެސްޕަނިޔޯލް ބަލިކުރީ 1-3 ގެ ނަތީޖާއަކުންނެވެ. މި މޮޅާއި އެކު ރެއާލް އޮތީ ކުޅުނު ތިން މެޗު ކާމިޔާބުކޮށް ތާވަލުގެ އެއްވަނައިގައެވެ. ދެވަނައިގައި ރެއާލާއި އެއްވަރަށް ޕޮއިންޓު ހޯދައިގެން ބެޓިސް އޮތްއިރު، އެންމެ ވާދަވެރި ބާސެލޯނާ އޮތީ ތިން މެޗުން ދެ މެޗު ކާމިޔާބުކޮށް ތިންވަނައިގައެވެ.

އެސްޕަނިޔޯލްގެ ދަނޑުގައި ކުޅުނު މެޗުގައި ފުރަތަމަ ގޯލު ޖަހާ ލީޑު ނެގީ ރެއާލް އިންނެވެ. މެޗުގެ 12 ވަނަ މިނަޓުގައި ރެއާލްގެ ފުރަތަމަ ގޯލު ޖަހައިދީފައިވަނީ ވިނިސަސް ޖޫނިއާ އެވެ. މި ގޯލަށްފަހު އެސްޕަނިޔޯލުން ވަނީ މެޗުގެ ތެރެއަށް ވަދެ ރެއާލުން ކުރަމުންދިޔަ ކޮންޓްރޯލް އަތުލައިގަނެފައެވެ. އެގޮތުން ފުރަތަމަ ހާފު ނިމެން ދެ މިނެޓަށް ވެފައިވަނިކޮށް އެސްޕަނިޔޯލުގެ ޖޮސެލޫ ވަނީ އެ ޓީމަށް ނަތީޖާ ހަމަހަމަ ކޮށްދީފައެވެ.

މެޗުގެ ދެވަނަ ހާފުގައި ރެއާލުން އަލުން ލީޑު ނެގުމަށް ގިނަ މަސައްކަތް ތަކެއްވަނީ ކޮށްފައެވެ. ނަމަވެސް އެސްޕަނިޔޯލުން ވަނީ ރެއާލްގެ ގިނަ ހަމަލާތަށް ދިފާއުކޮށްފައެވެ. މެޗުން ރެއާލް އެެއްވަރުވާން ދަނިކޮށް އެ ޓީމު ސަލާމަތް ކޮށްދިނީ ކޮށްދިނީ ކެޕްޓަން ކަރިމް ބެންޒެމާއެވެ. ބުރާސްފަތި ދުވަހު ޔޫއެފާގެ އެންމެ މޮޅު ކުޅުންތެރިޔާގެ މަގާމު ހޯދި ބެންޒެމާ ވަނީ މެޗުގެ 88 ވަނަ މިނަޓުގައި ގޯލެއް އިތުރު ވަގުތުގެ ތެރޭގައި ގޯލެއް ޖަހައި މެޗުން ރެއާލް މޮޅުކޮށްދީފައެވެ.

ލަލީގާގައި ދެން ރެއާލުން ނިކުންނާނީ ދެވަނައިގައި އޮތް ބެޓިސްއާއި ދެކޮޅަށެވެ. މި ދެ ޓީމުންވެސް މިހާތަނަށް ކުޅުނު ތިން މެޗު ކާމިޔާބު ކޮށްފައިވާއިރު އަންނަ ހޮނިހިރު ދުވަހު ކުޅެވޭ މި މެޗު ވެގެންދާނީ ވާދަވެރި މެޗަކަށެވެ.