އިންޑިއާގެ ވެރިކަން ކުރާ ޕާޓީ، ބީޖޭޕީއަކީ އަބަދުވެސް މުސްލިމުންނާ ދެކޮޅު ޕާޓީއެކެވެ. އެ ޕާޓީގެ ނިވާފަތުގައި ތިބެ، ހިންދޫއިން ދަނީ، މުސްލިމުންނަށް އެކި ގޮތްގޮތުން ފުރައްސާރަކުރަމުންނެވެ. މުސްލިމުން ނިކަމެތި ކުރުމަށް މަސައްކަތް ކުރަމުންނެވެ. އިންޑިއާގެ އާބާދީގެ 80 ޕަސަންޓަކީ، ހިންދޫ ދީނުގެ މީހުން ކަމަށްވާއިރު، މުސްލިމުން ހިއްސާކުރަނީ އިންޑިއާގެ އާބާދީގެ 14.2 ޕަސަންޓެވެ. އެއީ، 204 މިލިއަން މުސްލިމުންނެވެ. މިއީ ދުނިޔޭގެ މުސްލިމުންގެ އާބާދީގެ 10.9 ޕަސަންޓެވެ.

އިންޑިއާގެ ބޮޑުވަޒީރު ނަރެންދްރަ މޯދީ ނިސްބަތްވާ ބީޖޭޕީއަށް މިފަހުން އެންމެ ބޮޑު ފާޑުކިޔުންތަކެއް އަމާޒުވީ، އެ ޕާޓީގެ އިސް ތަރުޖަމާނު ނުޕުރު ޝަރުމާ ކީރިތި ރަސޫލާއަށް ފުރައްސާރަކޮށް، ތައުހީނުކުރުމާ ގުޅިގެންނެވެ. ރަސޫލާގެ އަނބިކަނބަލުންނާއި ގުޅޭ ބުހުތާނު ދޮގު ހަދައި، ރަސޫލާގެ ޝަހްސިއްޔަތަށް އުނިކަން ލިބޭ ފަދަ ވާހަކަތައް އިސް ތަރުޖަމާނު ދެއްކީ، އިންޑިއާގެ ޓީވީ ޗެނަލެއްގައެވެ. އެތައް މިލިއަން ބައެއްގެ ކުރިމަތީގައެވެ. ނުފުރު ޝަރުމާ، ރަސޫލާއަށް ފުރައްސާރަކުރުމުން، އިސްލާމީ ގައުމުތަކާއި މުސްލިމުންނަށް ވާގިވެރިވާ ޖަމާއަތްތަކުގެ ލޭ ކެކުނެވެ.

ނުރުހުމުގެ ބަސްތައް، ބީޖޭޕީއަށް އަމާޒުކުރަން ފެށިއެވެ. ބަޔާންތައް ނެރި، ބީޖޭޕީގެ އިސް ތަރުޖަމާނުގެ ވާހަކަތައް ހަރުކަށި އިބާރާތުން ކުށްވެރިކުރިއެވެ. ހާއްސަކޮށް، އިންޑިއާގައި ދިިރިއުޅޭ މުސްލިމުންގެ ލޭ ކެކި، ނުހުރުމުގެ ޝުއޫރުތައް އިންޑިއާގެ ސަރުކާރަށާއި ބީޖޭޕީއަށް އަމާޒު ކުރިއެވެ. ބީޖޭޕީއަށް ޖަވާބުދާރީވާން މަޖުބޫރުކުރުވިއެވެ.

ބީޖޭޕީގެ ބަޔާން މުސްލިމު ގައުމުތަކުން ކުށްވެރިކުރިއިރު، އިންޑިއާއާ ގާތްގުޅުމެއް ބާއްވަމުން އަންނަ ރާއްޖޭގެ ސަރުކާރުންވެސް ވަނީ އެ މައްސަލަ ކުށްވެރިކޮށްފައެވެ. ނަމަވެސް، މުސްލިމު އެހެން ގައުމުތަކާއި އަޅައިބަލާއިރު، އެ މައްސަލައިގައި ރާއްޖޭގެ ސަރުކާރުގެ ލޮނުމަޑެވެ. ފޮރިން މިނިސްޓްރީ މެދުވެރިކޮށް ސަރުކާރުން ބަޔާނެއްވެސް ނެރުނީ، އެ މައްސަލައިގައި ބަޔާނެއް ނުނެރިގެން އެކަމުގެ ޕްރެޝަރު ސަރުކާރަށް އަމާޒުވަމުން ދަނިކޮށެވެ.