ފުރަމާލޭގައި ދުއްވާއެއްޗެހި ޕާކުކުރުމަށް ޕާކިން ޒޯނުތައް ހެދުމުގެ މަސައްކަތް ކުރިއަށް ގެންދިއުމުގައި ސިޓީ ކައުންސިލުން ކުރަމުންދާ މަސައްކަތަކީ ސަރުކާރުން ދައްކާ ބިންތަކުގައި އެފަދަ ޒޯނުތަކެއް ހެދުމުގެ މަސައްކަތްކަމަށް މާލޭ ސިޓީގެ މޭޔަރު ޑރ. މުހައްމަދު މުއިއްޒު ވިދާޅުވެއްޖެއެވެ.
މިނީ ބަހުގެ ޚިދުމަތް ފުރަމާލޭގައި ފެށުމަށް މާލޭގެ ބޮޑެތި މަގުތަކުގައި ހުރި ސައުކަލުތައް ނަގާ، އެ އެއްޗެހި ޕާކުކުރުމަށް ޕާކިން ޒޯނުތަކެއް ހެދުމުގެ މަސައްކަތް ސަރުކާރާއި ސިޓީ ކައުންސިލް ގުޅިގެން ވަނީ ފަށާފައެވެ.
އެހެން ނަމަވެސް މި ގޮތަށް ކުރެވުނު މަސައްކަތުގެ ތެރެއިން މާފަންނު ސަހަރާގައި ހަދާ ޕާކިން ޒޯނާއި ގުޅިގެން ސަރުކާރު ހިންގާ މައި ޕާޓީ އެމްޑީޕީގެ ބައެއް އެކްޓިވިސްޓުން ގެންދަނީ ސަހަރާގައި ޕާކިން ޒޯނު ހެދުމާއި ދެކޮޅަށް ޝުއޫރުފާޅުކޮށް އެއީ މާލޭ ސިޓީއިން ކުރާކަމެއްގެ ގޮތުގައި ފާހަގަކޮށް ފާޑިކިޔަމުންނެވެ.
މާފަންނު ސަހަރާގައި ޕާކިން ޒޯނު ހެދުމަށް ނިންމާފައިވަނީ ޑރ. މުއިއްޒުކަމަށް ބުނެ އެމްޑީޕީގެ ބައެއް އެކްޓިވިސްޓުން ޝުއޫރު ފާޅުކުރަމުން ދިޔަނަމަވެސް ޕާކިން ޒޯނު ހެދުމަށް ބިން ކަނޑައަޅަނީ ސަރުކާރުންނެވެ.
މާފަންނު ސަހަރާގައި ޕާކިން ޒޯނެއް ހެދުމުގެ ނިންމުމަކީވެސް ސަރުކާރުގެ ނިންމުމެކެވެ. އެކަމަށް އިސްލާމިކް މިނިސްޓްރީއިން ވަނީ ހުއްދަވެސް ދީފައެވެ.
އެ މައްސަލައާއި ގުޅޭގޮތުން ޑރ. މުއިއްޒު ކުރެއްވި ޓްވީޓެއްގައި ވިދާޅުވީ، ޕާކިން ޒޯނު ހެދުމުގެ މަސައްކަތުގައި ސިޓީ ކައުންސިލުން އަދާކުރާ ޒިންމާއަކީ، ނުވަތަ ސިޓީ ކައުންސިލްގެ މަސްއޫލިއްޔަތަކީ ސަރުކާރުން ދައްކާ ބިންތަކުގައި ޕާކިން ޒޯނުތައް ހެދުމުގެ މަސައްކަތް ކަމަށެވެ.
ބިން ކަނޑައަޅާ، އެތަންތަން ސާފުކުރާނީވެސް ސަރުކާރުގެ ކަމާ ގުޅުންހުރި އިދާރާއަކުންކަމަށް ޑރ. މުއިއްޒު ވިދާޅުވިއެވެ.
މިނީ ބަހުގެ ޚިދުމަތް މާލޭގައި ފަށާފައިވާއިރު، މާލޭގެ ބޮޑެތި މަގުތައް ހުސްކޮށް ޕާކު ކުރެވޭނެ ތަންތަން ހެދުމުގެ މަސައްކަތް ސިޓީ ކައުންސިލުން ދަނީ ކުރަމުންނެވެ. މިހާރުވެސް އެކި ހިސާބުތަކުގައި ޕާކިން ޒޯނުތައް ވަނީ ހަދާ ނިންމާފައެވެ.
Advertisement
This content is created and paid for by advertisers and does not involve Voice Journalists
